Dielulula 15:19 - MUKANDA WA MYIDI MUKULU

¹⁹ Bamuanabute balume bonsu, ba ngombe, mikoku ne mbuji yenu, nubajidile mu dina dia Maweja-Nangila Mvidi Mukulu wenu. Muanabute mulume wa ngombe, kanuena mua kumuenzeja mudimu to. Kabidi kuena mua kukosa miosa ya muanabute wa mukoku.

Mukanda wa Nzambi Dihungila Dikulukulu ne Dihungila Dihia-dihia 2003

¹⁹ Nenujidile Yehowa, Nzambi wenu, banʼa bute balume ba ngombe ne ba mikoko; kanuenzeshi banʼa bute ba ngombe mudimu, kanukoshi banʼa bute ba mikoko miosa.

Dielulula 15:19 交叉引用

Ekesode 13:2

— Muanabute yonsu wa balume wa bena Izrayele, udi mukaji ulela, nansha wa tshimuna, umujidile, ashale wanyi.

Ekesode 13:12

nujidile muanabute yonsu wa muntu nansha wa tshimuna, bua ashale wa Maweja-Nangila.

Dielulula 16:14

Nanku nuenu bena Izrayele bonsu, bana benu, bena mudimu benu, bena Levi, benyi banudi nabu, bana ba nshiya, ne bakaji bakamba badi munkatshi muenu, nusanke bua tshibilu etshi.

Dielulula 12:17

Milambu yonsu inudi nulambula Maweja-Nangila: ya ntete ya kuenza bukula, ya maluvu, ya mafuta, ya bamuanabute ba bimuna bienu, ngombe, mikoku, mbuji, milambu ya budisuile ne ya mapiku, kanuena mua kudila bintu bia ku milambu ayi mu nzubu yenu to.

Dibadika 18:17

Kadi muanabute wa ngombe, wa mukoku, nansha wa mbuji, kubena mua kumupikula to, bualu nnyama ya tshijila. Nenuele mashi ayi ku tshilambuilu. Nenungoshile kabidi mafuta a nyama ayi bua nganyishe dipembu diawu dimpe.

Dibadika 18:15

Bamuanabute bonsu badibu bandambula, ba bantu ne ba nyama mbebe wewe. Kadi nebapikule muanabute wa balume wa muntu, nebapikule kabidi muanabute wa nyama udi ne mikiya.

Lewitiki 27:26

“Muntu nansha umue kena ne bumfumu bua kulambula mu dina diende yeye nkayende, muanabute wa ngombe, lukungulu lua mbuji, nansha muana wa mukoku to. Bualu nyama yonsu idi mikale banabute, ikadi ya Maweja-Nangila.

Ebrewu 12:23

Nudi basemena pabuipi ne tshisangilu tshia tshibilu tshia banabute ba Mvidi Mukulu badi ne mena abu mafunda mulu. Nudi basemena pabuipi ne Mvidi Mukulu, mulumbuluishi wa bantu bonsu. Nudi basemena pabuipi ne mieyelu ya bantu batata benze bidi Mvidi Mukulu musue, bafike ku bujima buabu.

Dielulula 16:11

Nuye ku nzubu wikale Maweja-Nangila musungule bua nuenu kumonangana nende. Muaba wa tshijila awu, nuenu bena Izrayele, nusanke ne bana benu, bena midimu benu, bena Levi, benyi banudi nabu, bana ba nshiya, ne bakaji bakamba badi munkatshi muenu.

Dielulula 14:23

Pashishe nuye mu nzubu wa Maweja-Nangila Mvidi Mukulu wenu, muaba wikalaye musungule bua nuenu kumonangana nende, ne bua kulambulamu tshia dikumi tshia bintu ebi: ntete ya kuenza bukula, maluvu a mvinyo, mafuta, bamuanabute ba ngombe, ba mikoku ne ba mbuji. Ke munudi mua kulomba, munudi mua kunemeka kashidi Maweja-Nangila Mvidi Mukulu wenu.

Dibadika 3:13

Bualu dituku di-mvua mufuishe bamuanabute ba bena Ejipitu, mvua mushiye bamuanabute bonsu ba bena Izrayele too ne ba bimuna biabu ne muoyi bua bikale bianyi. Meme ndi Maweja-Nangila.

Ekesode 34:19

“Bamuanabute mbanyi meme. Nanku, muanabute mulume wa ngombe, wa mukoku nansha wa mbuji, numundambule meme.

Rome 8:29

Bualu bavua Mvidi Mukulu mudianze kusungula, ukavua mudianza kujadika bua kubenza bafuanangane ne Muanende, bua Muanende ashale muanabute munkatshi mua bana babu bavule.

Ekesode 22:30

“Nuenu nenuikale bantu banyi ba tshijila, kanuena mua kudia munyinyi wa nyama wa tshisuku uvua nyama ya lonji mishipe. Munyinyi awu nuwelele mbwa.

Dielulula 15:18

Kanuikadi ne kanyinganyinga bua kupesha mupika budikadidi to. Bualu bidimu bisambombu bidiye munuenzele mudimu, mmunupeteshe bintu bia bungi, bipite misangu ibidi binuvua mua kupeta kudi muena mudimu unudi nufuta. Nanku mupika apete anu budikadidi, bua Maweja-Nangila Mvidi Mukulu wenu anusankishe mu bionsu binudi nuenza.

Ekesode 22:29

“Nundambule muanabute wa ngombe yenu, mikoku yenu, mbuji yenu. Muana wa balume wa bimuna abi, neashale kudi mamuende anu matuku muanda mutekete. Dituku dia muanda mukulu numundambule.

Dielulula 12:11

Diba adi, muaba wikala Maweja-Nangila Mvidi Mukulu wenu musungule bua kusomba, nenumutuadile milambu eyi mishilangane, imvua munuambile: ya kuosha, ya bobumue, ya tshia dikumi tshia bintu bia mu madimi, ya budisuile, ne ya mapiku, inuvua bamulaye.