Didimanyisha 22:5 - MUKANDA WA MYIDI MUKULU

⁵ Butuku kabuakuikala kabidi to. Kabakukengela munya, nansha muendu. Bualu Maweja-Nangila Mvidi Mukulu neabakenkeshile butoke buende. Nebadie bumfumu kashidi.

Mukanda wa Nzambi Dihungila Dikulukulu ne Dihungila Dihia-dihia 2003

⁵ Kakuena kuikala butuku kabidi; ne kabena bakengela dinkenka dia muinda, nasha munya wa diba; bualu bua Mukelenge Nzambi neabatemene; ne bobo nebakokeshe tshiendelele.

Didimanyisha 22:5 交叉引用

Didimanyisha 20:4

Pashishe meme kumona nkuasa ya butumbi. Bavua basombamu, bavua bapete bumfumu bua kulumbuluisha bantu. Meme kumona kabidi bantu bavuabu bashipe, bualu bavua bajadike malu malelela avua Yezu mumanyishe, bajadike ne muaku wa Mvidi Mukulu. Bantu aba kabavua bakukuile nyama, nansha tshimfuanyi tshiende. Kabavua babatue tshitampi tshia nyama pa mpala, nansha pa tshianza to. Kufululukabu, kudiabu bukalenga pamue ne Kristu bidimu tshinunu.

Danyele 7:18

Kunyima kuabu tshisamba tshia tshijila tshia Mvidi Mukulu, Muena kulu, netshiangate bukalenga. Netshibulame kashidi.’

Danyele 7:27

Nebapeshe tshisamba tshia tshijila tshia Mvidi Mukulu, Muena kulu, bukalenga, bukokeshi, ne lumu, bia makalenga onsu a pa buloba. Bukalenga bua tshisamba etshi nebushale kashidi. Makokeshi onsu a pa buloba neatshitumikile, atshienzela mudimu.’

Rome 5:17

Bushuwa, lufu luvua ne bumfumu, anu bualu bua tshilema tshia muntu umue, tshienza kudi muntu umuepele. Kadi kudi Yezu Kristu nkayende ke kutudi tupetela bipite bungi: bualu kudiye bantu bonsu nebikale ne muoyi, nebadie bumfumu. Ke bonsu bavua Mvidi Mukulu muleje dinanga dipite bunene, bavuaye mubingishe patupu ku luse luende.

Misambu 36:9

Udi utudisha ne bilenga bia mu nzubu muebe, tuukuta, utunuisha ku misulu ya dinanga diebe.

Didimanyisha 11:15

Pashishe mutumibue wa muanda mutekete kuela mpungi. Meyi makole kumvuika mu diulu, amba ne: “Bumfumu bua kulombola buloba budi kudi Maweja-Nangila wetu ne kudi Meshiya wende. Nebashale mu bukalenga kashidi.”

Didimanyisha 3:21

Badi batshimuna, nenganyishe bua basombe pabuipi nanyi mu nkuasa wanyi wa butumbi, bu mumvua meme mutshimune, nsomba pabuipi ne Tatu wanyi mu nkuasa wende wa butumbi.

2 Timote 2:12

Bituikala bumvue makenga ne lutuulu, netudie nende bumfumu; Bituamuvila, Yeye kabidi neatuvile;

Matayi 25:34

Nenku mukalenga neambile bantu badi ku diende dia balume ne: “Vuayi, nuenu badi Tatu wanyi muele lupemba. Angatayi Bukalenga buvuabu banulongoluele, katshia bafuka bukua panu.

Misambu 84:11

Bualu kusomba dituku dimue mu lubanza lua nzubu webe wa kutendelela, nkupite kusomba matuku tshinunu munga muaba. Mvidi Mukulu wanyi, kuimana kumbelu kua nzubu webe, nkupite kusomba mu ntenta ya bantu babi.

Didimanyisha 18:23

Muendu kawakukenka kabidi muebe nansha musangu umue. Kabakumvua kabidi muebe mbila ya disanka ya badi babuela mu dibaka. Bangenda mushinga ba muebe ke bavua bapite ba buloba bujima. Kadi udi mushime bisamba bionsu ne malu ebe a majimbu.”

Matayi 25:46

Bavua benza bibi aba, nebaye mu dinyoka dia tshiendelele. Bavua benza bimpe, nebaye mu muoyi wa kashidi.

Yeshaya 24:23

Pashishe ngondu neakunzubile, diba nedibuitshidile ne bundu. Bualu Maweja-Nangila muena bukole buonsu, neadie bumfumu mu Yerushalayime pa mukuna wa Siyone. Bakulu ba ditunga, nebamone butumbi buende.

Yeshaya 30:26

Dituku dikale Maweja-Nangila muele buanga, pa mputa ya bantu bende, muondape mputa yabu ivuaye mubatape, ngondu neakenke bu diba. Bukenke bua diba nebupite bua matuku onsu, misangu muanda mutekete, bu bukenke bua lumingu lujima, bukenka dituku dimue.

Zekâya 14:7

Dituku dia pabuadi adi, didi Maweja-Nangila nkayende mumanye, amu munya newikaleku. Bantu kabakusunguluja kabidi munya ne butuku. Nansha dilolu, munya neuteme.

Matayi 19:28

Yezu kubambila ne: — Ndi nnujadikila bulelela ne: pasomba Muana wa muntu mu nkuasa wende wa lumu mu buloba bupiabupia, nuenu bavua bandonde, nenusombe penu mu nkuasa dikumi ne ibidi, bua kulumbuluisha bisamba dikumi ne bibidi bia bena Izrayele.

Didimanyisha 20:6

Bantu bavua bafululuka musangu wa kumpala awu mbena diakalenga, badi Mvidi Mukulu muele lupemba mushindu musunguluke! Lufu luibidi kaluena lubakuata to. Nebakuatshile Mvidi Mukulu ne Kristu mudimu wa butuangaji. Nebadie bukalenga pamue ne Kristu bidimu tshinunu.

Didimanyisha 21:11

Tshimenga tshivua tshiwule ne butumbi bua Mvidi Mukulu, tshibalakana bu dibue dia mushinga mukole, bu dibue dia yaspise, dimueneka munda ne panyima bu lusoka lua kristale.