Zekâya 14:10 - Mukanda wa Nzambi Dihungila Dikulukulu ne Dihungila Dihia-dihia 2003

¹⁰ Buloba buonso nebukudimuke bu mpata, ku Geba tô ne ku Limona, ku luseke lua Sude lua Yelushalema. Musoko wa Yelushalema newikale ha mukuna, neushale mu muaba wau, ku tshibi tshia Benyamina tô ne ku muaba wa tshibi tshia diambedi, ku tshibi tshia ku ditumba ne ku tshibumba tshia Hananele tô ne ku bikaminu bia nvinyo bia mukelenge.

MUKANDA WA MYIDI MUKULU

¹⁰ Ditunga dijima didi dinyunguluka Yerushalayime, nedishale mpata, biangatshile ku Ngeba ku mutu wa ditunga, too ne ku Rimone, kuinshi mu ditunga. Yerushalayime neikale ku mutu kua misoku idi mimunyunguluke. Tshimenga etshi netshituadije ku tshiibi tshia Binyamine, too ne ku tshiibi tshia ku Ditumba, ku muaba uvua tshiibi tshia kale, ne ku kaleya ka Ananeyele, too ne ku bikaminu bia nwinyo bia Mukalenga.

Zekâya 14:10 交叉引用

Zekâya 12:6

Mu dituku adi nenvuishe banfumu ba biota bia Bena Yuda bu dilonga dia kahia munkatshi mua nkunyi, ne bu tshimunyi munkatshi mua bisumbu bia blé; neboshe ba mu bisamba bionso bidi bibanyunguluka, ku tshianza tshia balume ne ku tshianza tshia bakashi; kadi ba mu Yelushalema nebashikame mu muaba wabo, mu Yelushalema mene.

Yoshua 15:32

ne Lebaota ne Shilihima ne Ayina ne Limona: bimenga bionso bidi makumi abidi ne tshitema ne misoko yabi.

Yirmeya 37:13

Hakafikeye ku mbelu kua tshibi tshia Benyamina, kahita ka bansentedi kakadiku, dina diandi Iliya, muana wa Shelemeya, muana wa Hananya. Kakakuata Yelemiya muprofete, kakamba ne, Wewe udi mulekela bua kuya ku luseke lua Bena Kasada.

Yirmeya 30:18

Yehowa udi wamba ne, Nempingashe ba mu ntenta ya Yakoba, nenfuile ba mu nsubu yandi luse; nebase musoko eu ha mukuna wau, nebashimike nsubu wa mukelenge ha muaba wakadiye diambedi.

1 Bakalenga 15:22

Hashishe mukelenge Asa wakela dî kudi Bena Yuda bonso, nansha muntu umue kashadi. Bakangata mabue a ku Lama ne mabaya akadi Bâsha wasa nʼau; mukelenge Asa wakasa nʼau Geba wa mu Benyamina ne Misepa.

Zekâya 2:4

wakamuambila ne, Ya lubilu, ambila nsongalume eu ne, Yelushalema neikale ne bantu muomumue ne misoko idi kayiyi ne ngumbu, bualu bua bisumbu bivule bia bantu ne bia bimuna nebikalemu.

Yirmeya 38:7

Hakunvua Ebede-meleke, Muena Atiopa, muntu mutungula wakadi mu nsubu wa mukelenge, ne, Bakubuesha Yelemiya mu dina dia mai (mu diba adi mukelenge wakadi ushikama hehi ne Tshibi tshia Benyamina),

Nehemya 3:1

Hashishe Eleyashiba muakuidi munene wakabika ne hana babo bakuidi, bakibaka lumbu lua ku luseke lua tshibi tshia mikoko; bakalujidila, bakateka bibi bialu, bakalujidila tô ne ku tshibumba tshia Hamea ne ku tshibumba tshia Hananele.

Balombodi 20:47

Bantu nkama isambombo bakâhuka, bakanyema ku tshihela ku dibue dia Limona, bakalalaku ngondo inai.

Balombodi 20:45

Bakâhuka, bakanyema ku tshihela ku dibue dia Limona; balongolola bantu binunu bitanu mu nshila minene; bakananukila kubihata tô ne ku Gidoma; bakashiha bantu binunu bibidi.

Amosa 9:11

Mu dituku adi nengibake kabidi nsubu wa Davidi wakadi muhuke, nengibake kabidi bituha bia bimanu biandi bidi bishimbuke; nengibake bituha biandi biakanyanguka, nemmuase bua kuikaleye bu muvueye diambedi.

Yeshaya 10:29

Wakumana kuhitshila ku tshibuelelu tshia mu luhongo; badi bamba ne, Geba ntshitudilu tshietu tshia butuku. Ba mu Lama badi bazakala, ba mu Gibea wa Shaula badi banyema.

Yeshaya 2:2

Mu matuku atshidi alua mukuna wa nsubu wa Yehowa neujadikibue bu mukuna muhite mikuabo bule, neubandishibue ha mutu ha mikuna mikese; ne ba mu bisamba bionso nebabuelemu.

Nehemya 12:39

ha mutu ha tshibi tshia Efelayima ne hehi ne tshibi tshia diambedi ne tshibi tshia ku luseke lua minyinyi ya mu mai ne tshibumba tshia Hananele ne tshibumba tshia Hamea tô ne ku tshibi tshia mikoko; bakimana talalâ ku tshibi tshia balami ba musoko.

2 Kulondolola 25:23

Yoasha, mukelenge wa Isalele, wakakuata Amasaya, mukelenge wa Yuda, muana wa Yoasha, muana wa Yehoaza, ku Bete-shemesha, wakalua nʼandi ku Yelushalema, wakashimbula lumbu lua Yelushalema ku tshibi tshia Efelayima tô ne ku tshibi tshia ku ditumba bu coudées nkama inai.

1 Kulondolola 6:77

Bakaha Bena Lewi bakuabo, bana ba balume ba Melali, mu tshisamba tshia Zebuluna, Limono ne miaba ya ku mpenge, ne Tabô ne miaba ya ku mpenge;

1 Kulondolola 4:32

Misoko yabo yakadi Etama ne Ayina, Limona ne Tokene ne Ashana, misoko itanu;

Balombodi 21:13

Bena disangisha bonso bakatumina Bena Benyamina bakadi ku dibue dia Limona dî dia kubadisha nʼadi ditalala.

Yoshua 21:17

Mu tshisamba tshia Benyamina, Gibeona ne miaba ya ku matshika, ne Geba ne miaba ya ku matshika,

2 Bakalenga 14:13

Yehoasha, mukelenge wa Isalele, wakakuata Amasaya, mukelenge wa Yuda, muana wa Yehoasha, muana wa Ahazaya, ku Bete-shemeshe; wakaya ku Yelushalema, wakashimbula lumbu lua Yelushalema ku tshibi tshia Efelayima tô ne ku tshibi tshikuabo tshia ku ditumba ntanta wa coudées nkama mai.

Yirmeya 20:2

Hashishe Pashû wakakuma muprofete Yelemiya, wakamubuesha mu bikunyi biakadi hehi ne tshibi tshia Benyamina tshia ha mutu, tshiakadi mu nsubu wa Yehowa.

2 Kulondolola 26:9

Uziya wakasa bibumba mu Yelushalema ku tshibi tshia ku ditumba dia lumbu, ne ku tshibi tshia mu tshibanda, ne ku ditumba dikuabo dia lumbu, wakatekamu bintu bia nvita.

Mika 4:1

Mu matuku alualua mukuna wa nsubu wa Yehowa neujadikibue bu mukuna wa ha mutu ha mikuna minene, neubandishibue ha mutu na mikuna mikese; ne ba mu bisamba bionso nebabuelemu.

Zekâya 8:3

Yehowa udi wamba ne, Nempingane ku Siona, nenshikame munkatshi mua Yelushalema; nebabikile Yelushalema ne, Musoko wa kungeyemena; nebabikile mukuna wa Yehowa wa misumba ne, Mukuna wa tshijila.