La̠ta makli̠t cala̠huá lacaquilhní̠calh xlá ne̠cxnicú cala̠huá kalhtí̠nalh; acxni̠ ma̠pa̠ti̠ní̠calh xlá ne̠cxnicú lacpúhua para naca̠ma̠lakxoke̠y la̠ta tú xtlahuanimá̠calh, huata hua̠k Dios xmacahuili̠y xtapa̠tí̠n hua̠nti̠ xli̠ca̠na aksti̠tum naca̠ma̠xoko̠ni̠y cha̠tunu cha̠tunu cristianos la̠tachá túcu tatitlahuani̠t nac xlatama̠tcán.
Ni̠tí tu̠ csquinima̠náhu para túcu, huata cli̠scujá̠hu quimacancán la̠qui̠ nacua̠yaná̠hu; acxni̠ para tícu cala̠huá quinca̠li̠kalhkama̠naná̠n aquinín lacuán tachuhuí̠n cli̠kalhti̠yá̠hu. Ma̠squi ankalhi̠ná quinca̠lacputzanima̠cán hua̠ntu̠ ni̠tlá̠n hasta quinca̠putzasta̠lacaná̠n, pero aquinín chunatiyá cpa̠xcatle̠ma̠náhu.