Matyuu 7:21 - Gooti Toolluro Yogalokwono

²¹ A'mwo abolo bwotonyago ton mi aro nyudodupudogano. “Mi Agutoloo, Mi Agutoloo,” nyudodupudo kuvi kuruv yiuwi'nokai su ton muunyu kai'muuda'ai aguto kig mido mollomwalo tovi ku'nono maulomwalpinogano. Yiuno moro Nyunumiyago muunyu kai'muu mwalodowodo toolluro ilaiyo winodowo'jure kuudo tonyu kuumjuno'ji su toolno'gwowi kuvinono nokwo kuulomwalonekono.

Matyuu 7:21 交叉引用

Room 2:13

Su tov aro tovinokwono. A'mwo abolo pun Gooti toolluro loowo tovi wuu'nopi muu'nyubusuko supi tov Gooti toolluro sumdo tovi ilaiyo mwimo'nupinogano. Toro kuvi kuruv pun Gooti toolluro loowo tovi kuumjunpi tonyuno'gwowi Gooti tool, “Sugudogano,” dowo'ji gamoro sumdo tovi sugudo wimo'nupinogano.

Luuk 6:46

Aki Jisasol aro kuudokaikono. “Kevu mino Agutoloo, Agutoloo, anyudupi tov moro yogalo ikudodumdo tonyu kisuvolo nyumwalpiyo.

Jems 1:22

Aki kevu yogalo kuu'nupi su tovi muu'nyubusuko nyumwalpiyo. Toro kuvi kuruv yogalo kuu'nupi su tovi kuvinono neya duumjunogaulo. Yogalo su tovi muu'nyubusuko to'no supi to'gwowi kevnokwe togaikul nyoukuu'najunmwalpinogaikikono.

Luuk 11:28

Toro kuudoka kuvi kuruv Jisasol abolo su tovi aro kuudokaikono. “Ilaiyo bwotonyo uuwo'dowodo to'gwowi arokwono. A'mwo abolo Gooti toolluro yogalo tovi wuu'nopi kuvinono uumjunodupudo su tonyu ilaiyo bwotonyo tov uuwo'dowodokwono.” Kuudokaikono.

Taitos 1:16

A'mwo abolo su ton yiuno kemi mago tokwe to'no aro dodupudogano. “Nevu Gooti toolluno kuudo me'no youroma'dowadonogano.” Su toro dodupudo kuvi kuruv kemoro yomjomwekovla'mdupudo to'gwowi kemi yogalo su tovi muumjunodupudo tovino kuu'maiyo toru'no aro wuuduuwallunodupudogano. Gooti toollu ku'nono muumjunmwakuuwono. Kuu'maiyo toru'no su toro wuuduuwallunodupudogano. Toro te a'mwo abolo su ton kisuvolo yodupudogano. Aki toro ton sugupasudo yo'moneyokwe kuruv ku'nono mipinogano. Gooti tool a'mwo abolo su toro yodopure tonyuno kwoda'molo sumdo to'no yodowodekono.

Hibruu 4:6

Toro te neya duu'nyulo. Aiyogasuro a'mwo abolo ton kuuguudo sugudo tovi me'no kuu'nyajupo su ton Gooti toollu kisuvolo to'no kwiyajupogano. Toro tovino tov gamoro iruko mwallo'moneyokwe su toru ku'nono maulai'movopogano. Toro kuvi kuruv a'mwo abolo puno'gwowi Gooti toolluro iruko mwallo'moneyokwe toru kuvinono noulai'mopinogano.

Joon 6:40

Aki Nyunumiyago toolluro ilaiyo winodowodo tov aro tovinokwono. Yiuwi'nokai a'mwo abolo pwolno puru'monodo ton gamoro Kwolaiyo toonyu nuwonopi kuudo anubwepi tov aiyo yiunokuudo mujomwekovlaiyo'moneyokwe tov nomapinogano. Aki toro tonyu aiyowo'mo toga nuvu aiyo aiko te nomoduka'monyugono.” Kuudokaikono.

Adodolukuu'nosungiko 3:5

Nuu yiuwi'nokai a'mwo abolo Satanyolluro molo tovi kuuwolopi su tonyu youro wiya'jo tousogai nuuwiropimonyugono. Aki kemi yovo ton Aiyo Yiunokuudo Mujomwekovla'mwalpino tonyuno Buukiyo tovi puukwollo me'no sokwollosungiko su tonyu mamollouropimonyugono. Toro kuvi kuruv nuu mi Nyunumiyago tooke'aro gamoro ensel toorogai'aro toorai kuu'maiyo toru aro nuudumonyugono. “Oo a'mwo abolo akan numorogano.” Nuudumonyugono.

1 Pita 4:2

Toro yuu'dapiyodowodo su tool gamoro kulako tokwe aiyo kuuno amjomwekovlawo'ji toga kulako su tovuro ilaiyo igollunyo'moneyokwe toorai aki aiko te nuumjungovla'mwalo'jo. Toro kwol kuruv Gooti toolluro ilaiyo winodowodo tovino'gwowi neya uumjungovla'mwalonekono.

Hibruu 13:21

Toro te kevu Gooti toolluro ilaiyo winodowo'jure tovi uumjunmwalpino'moneyokwe yiuwi'nokai supto supi ton Gooti su tool kemi nomollovrovaikubwemwalonekono. Aki Gooti tool Jisas Kraisollu'aro nemoro poowokalago tovi anakuuto tomuu womdo jurogudo noulanekullonekono. Womdo jurogudo nekullodowo'jure su tov nevu Gooti toolluro pasudo ilaiyo winodowodo tonyu yomjomwekovlaiyo'moneyokwe nomollerovonekudapiyonekono. Toro te nevu Gooti su toolluno yovo tovi yiunokuudo ilomoropino ilomoropino neya imwolowanonogano. Nebal'nodokwono.

Matyuu 12:50

Toro wuujuno sumaiyokwe aki aro kuudokaikono. “Mi nyugwai'yagoldeyo oo mi nyo'mwo'mdeyo oo mi nyuneyago'mdeyo ton yiuno moro Nyunumiyago muunyu kai'muuda'ai toolluro ilaiyo winodowo'jure tovi uumjunodupudo su ton kugano.” Kuudokaikono.

Adodolukuu'nosungiko 22:14

Toro te a'mwo abolo pun kemoro youro kumi'yago touso wonyo tovi yal'mo'mdupudo su ton kemi poowokalago togai ilaiyo bwotonyo ibwosunpinogano. Toro ton wagwolago tovi noullo tovi'aro kuulapi iko aiyo yiunokuudo mujomwekovlaiyo'moneyokwe toolluro ikulsulo ton nokwo kuulomuudanupinogano.

Joon 3:5

Toro kuudoka toollu Jisasol aro kuudokaikono. “Nuvu nebal'no kuunodo agudadokwono. “A'mwo pwol wonyo tokwe'aro Gooti toolluro Kuullo tooke'aro tovalluda'ai aiyo aiko te mimo'no'ji su tool aguto kig Gooti toolluro mido mollomwalo tovi ku'nono maulomwalonekono.

Matyuu 18:3

Toro molludapino sumaiyokwe toga aro kuudokaikono. “Nuvu nebal'no ikudumo'mokwono. Kevu kemi ma'no ma'no pasudo toorai buulo muugunyumopiyopi kwoloraiyo pubuurobusuko mimo'nupi tov muunyu kai'muuda'ai aguto kig toolluro mido mollomwalo tovi ku'nono maulomwalpinorekikono.

Joon 7:17

Toro te a'mwo pwol Gooti toolluro ilaiyo winodowo'jure tovi uumjunyo'mo kwino'ji su tool aro tovino kuudo youreyo'mgonomaronekono. Moro yodubwasodumdo tov Gooti toolluda'aiyo'mdukono oo nuvnokwenyuro kuudo tovida'aiyo'mdukono, su toro tovalluno kuudo tov kuvinono nyouromaronekono.

Room 12:2

Aki toro togaikul kwako akavida'ai a'mwo abolo punyuro mujumovla'mdopure tomgu'aro nuumjungovla'mwalpiyo. Toro kuvi kuruv Gooti tool kemoro poowokalago kuudo tonyu aiyo aiko te yokwollaikubweyodowo'jure tovi ilaiyo neya domollomarogaulo. Gooti tool kemoro poowokalago kuudo tonyu aiyo aiko te me'no sokwollaikubweyo'ji toga gamoro ilaiyo winodowodo tonyuno kuudo nokwo youroma'mwalpinogaikikono. Toro togaikul sugupasudo yo'mo togai'aro Gooti toollu ilaiyo igollo'moneyokwe togai'aro aki pasudo pun kaiya'no puru'monodo kuruv muumgu'mo'nodowodo togai'aro tonyuno nokwo youroma'mwalpinogaikikono.

Kuuguudo Sugudo akav Makolluro sakwollokakwono Mak 3:35

Toro wuujuno sumaiyokwe kuudokaikono. “A'mwo abolo Gooti toolluro ilaiyo winodowo'jure tovi uumjunodupudo su ton mi nyugwai'yago nyo'mwo nyuneyago nyumo'nodupudogano.” Kuudokaikono.

1 Tesaloonaika 5:18

Buro'nyo buro'nyodeyo pun aikullumo'no'ji kuga kuruv, “Nenoloo,” to'no subusu'nyogalo neya duudumovlavogaulo. Kevu Krais Jisasolluro a'mwo abolo wimo'nodupudo togaikul su toro neya mujumovla'mwapino'moneyokwe tovino Gooti tool winodowodekono.

Efesos 6:6

Aki toro togaikul kemi mido mollekumwalokwe toorai ilaiyo igollo'moneyokwe kevnokwe tooro muugonaikwo'dopure toga'no to'no womdo guureji nyumwalpiyo. Kevu su toro supi tov sugudo mipinogaikikono. Toro kuvi kuruv kevu Krais toolluro ki'nato womdokwe togaikulno'gwowi Gooti toolluro ilaiyo winodowodo ton kemoro poowokalago tovi kuulaikwo'dowodokwono. Su toro kuulaikwo'dowodo tovi uumjunopi kemi mido mollekumwalokwe tooravuro womdo tovi ilaiyo to'no neya duuwimovlavogaulo.

1 Pita 2:15

Toro te Gooti toolluro ilaiyo winodowodo tov arokwono. Kevu a'mwo aguto su toorai kwako tomuu'aro neya duuwimovlavogaulo. Kemoro sugupasudo yodopure su tovi a'mwo abolo kuudo maiyokwe ton aikwonpi toga kemi bwolomekumwogapiyo'moneyokwe junoru'yogalo madumwalpinogano.

Matyuu 25:21

Toro kuudoka tovi a'mwo aguto tool kuudokaikono. “Oo guu ki'nato womdokwe ilaiyekugono. Moro womdo tovi pi'mwono mollodumdekugono. Toro tooku moro womdo kula'nyo tekwoji pi'mwono yodumdo tovino tov aga'no'gwowi nuvu womdo aguto pugai'aro bwotonyago ton nogubwemonyugono. Toro te guu moro ilaiyo tovi anakuuto tomuu kuulabo'bi nuuge boulomwalogawono.” Kuudokaikono.

1 Tesaloonaika 4:3

Gooti tool kemino tov aro tovino winyokwekono. Kevu gamoro ilaiyo winodowo'jure tonyuno to'no uumjunopi yiuwi'nokai kwonyalpasudo toorai mamjumovlapinono.

Kooloosi 4:12

Aki kemida'ai a'mwo pwolluno yovo tov Epafrosolekono. A'mwo su tool nuuge akawai mwalodowo Krais Jisasolluro ki'nato womdo wiyodowodekono. Toro tool kemi, “Ilaiyokwono,” adekwopiyamaiyo. Aki a'mwo su tool kemiyo'mo Gooti toollu subusu'nyogalo guurejuno aro wuudodowodekono. “Kooloosida'ai Jisasolluro a'mwo abolo ton a'mwono tonbusuko jurogudo neya imo'nopi kevnokwe ton kuudo neya yaurogapuro. Oo nevu yiuwi'nokai Gooti toolluro ilaiyo winodowo'jure tonyu yiuno ilaiyo to'no duumjunmwakuuwono. Kuudo yaurogapuro.” Gooti tool kemi jurogudo adaikullumwojoneyokwe tovino'mo a'mwo su tool subusu'nyogalo wuudodowodekono.

Luuk 13:25

Toro te ago tovuro a'mwo aguto tool dukavowo'ji kudo'aiko tovi me'no amallukuro'ji toga kevu ago tovi kwa'mgu tomuu ada'mdupi togaikul kudo'aiko tovi iwago romipinogaikikono. Toro romiyopi aro wuudupinogaikikono. “Agutoloo, nevu noulabwano'moneyokwe kudo'aiko dousanekubweyonoo.” Wuudupinogaikikono. Toro kuudupi kuvi kuruv aro ikudonekono. “Nuu kemino kuudo miyaikuu'mwakono. Kevu gadomuuda'aiyogaikuldeyo?” Ikudonekono.

Kuurotokwe 14:22

Toro tooral wagwolago go'no go'nodo su tonyu bai'mo'mdubul a'mwo abolo Jisasolluro uumjunyokwe tobuurai kemi poowokalago tonyu jurogudo duuwimwojo'moneyokwe kuuguudo aro kuujajulorakono. “Nevu aguto kig Gooti toolluro mido mollomwalo tovi dolago tomuu kuulomwallo'mo tov kavo kavo yovlavowa'ji maulomwalanonogano. Toro kunol kuruv kwako akavi mwalowa'ji toga jul'nyo go'no go'nodo ton nobaneki'mo'mwalononogano. Toro baneki'mo'mdowo'jure tonyu neya yodo'movlavowa'ji Gooti toolluro mido mollomwalo tovi dolago tomuu kuvinono kuulomwalanonogano. Toro tovino tov kevu jul'nyo ton baiki'mo'mdowo'jure toga nobwolorapiyokwe kuuguudo sugudo tovi kuudo uubweyodupudo su tovino guureji neya dogudupolarogaulo.” Aduuwimwojajulorakono.

Luuk 18:25

Aro to'busukokwono. Sa'ai kemel pwol lodo tovi wuulo kuulopiyodapudo nodobuullo tovi'aro kuullo'mo tov kavenodo'maiyo. Su toro to'busuko kubalno a'mwo kuto ivito bwotonyagokwe tekwo aguto kig Gooti toolluro mido mollomwallo tovi kuullo'moneyokwe to'gwowi kaveno mwimo'nonekwogano.” Kuudokaikono.

Kuuguudo Sugudo akav Makolluro sakwollokakwono Mak 9:47

Aki puruv aro kuudokaikono. “Guu, Du'muudo maduuwiyopiyodowodo tovi novla'miyo, adubi tooku gumoro sumdo puruv ma'no ma'no yo'mo tovi ame'nogumokwo'ji tov dogalowojopiyono. Toro tooku sumnowojokwe sumo'nubi kweku kuruv aguto kig Gooti toolluro mido mollomwalo tovi kuulomwallo'mo tov ilaiyokwono. Guu sumdo puruvalokwe tooku ma'no ma'nodo tov kuuno gwo'dowo'jure tookuno'gwowi du'muudo maduuwiyopiyodowodo tovi novla'biyo.

Matyuu 19:24

Toro te aki aiko te ikudumo'mokwono. Sa'ai kemel pwol lodo tovi wuulo kuulopiyodapudo nodobuullo tovi'aro kuullo'mo tov kavenodo'maiyo. Su toro to'busuko kubalno a'mwo kuto ivito bwotonyagokwe tekwo aguto kig Gooti toolluro mido mollomwallo tovi kuullo'moneyokwe to'gwowi kaveno mwimo'nonekwogano.” Kuudokaikono.

Matyuu 18:35

Toro te moro Nyunumiyago muunyu kai'muuda'ai tool kemi su toro tomgu'aro aval'no nyaikullugolo'jo. Toro tovino tov kevu kemi avalo tellugwai'yago ikullumo'nodupudo tekwojavuro kaiyako saikullugolpi tov kevu su to kworavuro ma'no ma'no pasudo tovi kemi poowokalago kuunodo togai yiunokuudo neya domodukwopiyogaulo. Toro kuvi kuruv kevu su toro mipi to'gwowi moro Nyunumiyago muunyu kai'muuda'ai tool yovekurajo to'busuko tomgu'aro aval'no nyaikullugolmwalonekono.” Jisasol su toro kuudokaikono.

Joon 15:23

Toro te a'mwo pwol numino surodo kuuno'ji su tool moro Nyunumiyago kwolluno kuruv surodo wuunonekono.

Matyuu 26:42

Jisasol toro wuujuno sumaiyokwe aikomgu uuwo'no sumdomguda'ai subusu'nyogalo kuudoka to'busuko kubalno aki aiko te aro kuudokaikono. “Mi Nyunumiyagoloo, moro dado mallo'mo sadokwo tovi amanyudukwopiyoneyokwe anyunadopiyo. Toro kuvi kuruv moro anyunadopiko su tovi muumjunbinono. Yiuno guvnokwekujuro yo'mo agujunadopiko tovino duumjunono.”

Matyuu 16:17

Toro kuudoka toollu Jisasol aro kuudokaikono. “Joona'wolluro kwolaiyo Saimoonoloo, gumoro anyudumodo su tovino kwako akavida'ai a'mwo pwol miyodogubwasokaikugono. Toro kuvi kuruv moro Nyunumiyago muunyu kai'muuda'ai toolno'gwowi gumoro sumdo tovi kuu'maiyo toru abomollolupto'nagubwemokaikugono. Toro tovino guu ilaiyo nokwo ibinekugono.

Adodolukuu'nosungiko 2:27

Su toro kwimi tool kantri tonyu mido mollomwalo guureji to'no momjumovlawonekono. Aro to'busukokwono. A'mwo pwol aiyon yodeko tokwe kwa'bootoollu puuwasi kirowiyapiyodowodo to'busuko kubalno mido mollomwalo guurejuno momjumovlawonekono. Womdo su tovi yo'moneyokwe jurogudo tov mi Nyunumiyago tool me'no anyaboka to'busuko kubalno a'mwo Satanyolluro molo tovi kuuwolowo'ji su to kweke'aro aval'no nomaronekono.

Joon 14:7

Kevu numino kuudo po'dogalo souronumaropujuko'mno'juki kevu moro Nyunumiyago kwolluno kuruv kuudo nokwo souromaropujukorekikono. Toro kuvi kuruv kevu mi sumdo me'no nuwonodupudo tovi'aro mi Nyunumiyago kwollu kuruv me'no wonodupudorekikono. Toro te agada'ai kevu kwolluno kuudo nyouromo'movla'mwalpinorekikono.” Kuudokaikono.

Joon 5:17

Jul'nyo toro wiyodopure kworai kuruv Jisasol aro kuudokaikono. “Moro Nyunumiyago tool womdo mujumelabino mujumelabino yodowo iruko Sabat aka kullugwoji kuruv womdo kuuno yodowodekono. Aki nuu kwonyu kuruv iruko akallugwoji womdo yodumdonyugono.” Kuudokaikono.

Matyuu 26:39

Toro wuujuno sumaiyokwe kuru'gwo uuwo'no gamoro sumdomago tov kwako tovi wolomuulo'na'no sumaiyokwe subusu'nyogalo tov aro adokaikono. “Mi Nyunumiyagoloo, nuu dado su tovi mama'miyokwe puuto puruv nokwo youlanubwebinekudukono? Toro kuvi kuruv moro anyunadopiko su tovi muumjunbinono. Yiuno guvnokwekujuro yo'mo agujunadopiko tovino duumjunono.” Kuudokaikono.

Matyuu 18:10

Toro te kevu kwoloraiyo su tobuuraino biyolo noduu'mwojumwalpiyo. Su tovino aro ikudumo'mokwono. Muunyu kai'muuda'ai ensel pworo kwoloraiyo su tobuurai mollomwalodupudorogano. Ensel mollomwalodupudo su tooro moro Nyunumiyago muunyu kai'muuda'ai toolluro sumdomago toru yiuwi'nokai toga kuuloda'mdupudorogano. Toro tovino tov kevu kwoloraiyo su tobuuraino biyolo noduu'mwojumwalpiyo.”

Matyuu 18:19

Toro wuujuno sumaiyokwe kuudokaikono. “Aki puruv nuu aro ikudumo'monyugono. Kevu kwako akavi mwalopi buro'nyo buro'nyo yamuugojo punyuno kuudo aval'no wosopi anyudoganpi tov moro Nyunumiyago muunyu kai'muuda'ai tool kemiyo'mo kuvinono yonekono.

Matyuu 25:10

Toro wuujuno sumaveyokwe sujuraiyo kuudo maiyokwe ton oolip munyupto pun biyomallo'moneyokwe avlavopogano. Toro ton kuuno yogalodopure toga a'mwo nuumaso'moneyokwe tool abai'movokaikono. Toro abai'movoka toga a'mwo su tooke'aro yiuwi'nokai sujuraiyo me'no sovrowosunyajupo togai'aro ton kwolabolo yoma'nyo'mo lubullu doto tovi yonomwallo'moneyokwe ago tovino aulapogano. Toro kuulno sumaveyokwe kudo'aiko tov amallukuropokwono.