Toro wimo'nyo'moneyokwe Gooti toolluro a'mwo abolo ajesajuko su tonyu gamiyomno abupureyokwe me'no doma'dowodekono. Toro doma'dowodo su ton gamoro sumdo tovi sugudo wimo'nyo'moneyokwe ilaiyo molloma'dowodekono. Aki ilaiyo molloma'dowodo su tonyu gamoro bako bwotonyo pwopiyodowodo toru me'no kuulomorumwallodowodekono. Gooti tool gamoro a'mwo abolo tonyu toro wiyodowodekono.
Hibruu 9:15 - Gooti Toolluro Yogalokwono15 Krais tool Gooti toollu me'no kwiroudapinoka su tov Gooti toolluro subuu'yamju muuduko tovi jurogudo imwojodowodekono. Krais su tool subuu'yamju muuduko su tovi'aro Gooti tooke'aro nevuge'aro akuuto toru momgurovonekubweyodowodekono. Aro tovino'mokwono. Yiuwi'nokai Gooti toolluro a'mwo abolo doma'dowodo ton aiyo yiunokuudo mujomwekovlaiyo'moneyokwe subuu'yamju wiyodowodo su tov kuvinono nomapinogano. Aki a'mwo abolo su ton sumdomguda'ai subuu'yamju tovi dolago tomuu amwallajupo tovida'ai ma'no ma'no pasudo tooraino kirumwallo tovida'ai mollurolowapiyo'moneyokwe Krais tool me'no abolokaikono. Su toro tovino'mokwono. 参见章节 |
Hibruu 9:15
52 交叉引用
Aki nevu aro kuudo me'no youroma'dowadonogano. Gooti gavnokwe tool adonekumaroka tonol gamoro a'mwo abolo me'no wimo'nodowa gamino kalo buuropino nekullunodowodonogano. Toro tonollu buro'nyo buro'nyo sugudodeyo kaiya'nododeyo yiuwi'nokai abaneki'mopi su ton nemi yiuno ilaiyo to'no yanekullugollo'moneyokweyogano.
Toro te Krais tool muunyu kai'muuda'ai Gooti toolluro pwekwapto kuunodo su toru yiuno puru'monodo toga'no aulokaikono. Toro tool meme toorogai'aro buulmokau taiyo toorogai'aro tooravuro mujako tokwe amokaulokalmaiyo. Toro kwol kuruv gavnokweyolluro mujako abwoloka tokwe amokaulokaikono. Gamoro mujako abwoloka su tovi'aro a'mwo abolo tonol aiyo yiunokuudo mujomwekovlaiyo'moneyokwe nemi ma'no ma'nodo tovuro kirumwallo tovida'ai abomollurolovonekumokalokwokaikono.
Neya duu'nyulo. Buro'nyo buro'nyo jul'nyodeyo pun kemi aikullumo'no'ji toga kevu jurogudo to'no neya dodavogaulo. Su tov aro tovino'mokwono. Kevu Gooti toolluro ilaiyo winodowo'jure tovi kuvinono kuumjunpi toga Gooti toolluro ato tovida'ai noonyumwonyu subuu'yamju daikullodowodo tollovai nokwo mapino tovino'mokwono.
Aki kevu Jisasollu wobo toru me'no bai'mo'mdupudogaikikono. Jisasol nevu Gooti toollu wobo toru momuugurovonekubweyo'moneyokwe subuu'yamju muuduko tovi jurogudo imwojodowodekono. Aki kevu Jisasolluro mujako abwoloka tovi wobo toru me'no bai'mo'mdupudogaikikono. Jisasolluro mujako abwoloka su tovida'ai yogalo dodoluwosodowodo to'gwowi Ebelolluro mujako abwoloka tovida'ai yogalo dodoluwosodowodo tovi kuuwolovokakwono.
Kuudo neya jaullulo. Krais kwol kuruv a'mwo abolo tonyuro ma'no ma'nodo tovi modukwopiyo'moneyokwe danyu'nyuwuulo ton yiuno puru'monodo toga'no amarokaikono. Krais su tool yiuno sugudo to'no imo'nodowodo kwol kuruv nevu sugudo mimo'nodowado tonolluro aiko toru maro'no abolokaikono. Aki nemi Gooti toollu wobo toru nekumokabiyo'moneyokwe abolokaikono. Krais toolluro kulako tov me'no aboloka kuvi kuruv aiyo aiko te adukavoka toga'no'gwowi Kuullo sumo'nokaikono.
Gooti su tool sumwoluko kavo wosunyo'moneyokwekono. Toro tool nemi Aguto Jisasollu aiyo aiko te me'no amodukavokaikono. Jisasol nemi nekullo'mwojo'moneyokwe gamoro mujako tov me'no abwoloka tovino tov sipsip moduvomwallokwe aguto toolbusuko anekullumo'nokaikono. Aki gamoro mujako abwoloka su tovi'aro subuu'yamju muuduko tov me'no sumo'nokakwono. Subuu'yamju su tov aiyo yiunokuudo mujo'movlaiyo'moneyokweyokwono.
Nevu muudu'nodo toga nemi ma'no ma'nodo tonyu modukwopinyo'moneyokwe jurogudo nonaguto sumo'nyajuwonogano. Toro imo'nodowore kuvi kuruv Krais toolno'gwowi nevu kirovanyuvanyu kuumwiyo tonollu nekullo'mwojo'moneyokwe abwolabolokaikono. Gooti gavnokwe toolluro me'no ajesoka kuunodo toga kuvinono abwolabolokaikono.
Toro to'busuko kubalno Krais tool yiuno puru'monodo toga'no abolokaikono. Toro aboloka su tov noonyumwonyu kwiroudapiyajupo pwolbusuko imo'no'no gavnokwe tool a'mwo abolo ma'no ma'nodokwe bwotonyago tonyuro aiko toru maro'no abolokaikono. Lukomgu Krais su tool kwako akavi aki aiko te noolabwonekono. Su toro kwolabwo'ji toga'no'gwowi nemoro ma'no ma'nodo tonyu yovo'dogallo'moneyokwe wolabwonolmaiyo. Toro kuvi kuruv yiuwi'nokai a'mwo abolo gavuge mwallo'moneyokwe tovino sogwollo winodupudo su tobuurai gamoro ago muunyu kai'muuno nomollurolovomokailawonekono.
Aiyoga Gooti tool Eburaiyamollu subuu'yamju kwiyoka tovino kuudo neya jaullulo. Gooti toollu muunyu toru'aro aguto uuwolo'mdowodo pwol nonagutomuugono. Toro tovino tov Gooti tool, Nebal'no agudadokwoneyo'mo, tovino subuu'yamju duuwiyo'mo tool muunyu toru'aro uuwolo'mdowodo a'mwo gabovo pwolluro yovo tovi'aro muudokaikono. Toro kuvi kuruv Gooti tool gavnokweyolluro yovo tovi'aro to'gwowi Eburaiyamollu subuu'yamju aduuwiyokaikono.
Krais toolluro mi a'mwo abolo avalobuuravoo, muunyu kai'muuda'ai mwalodowodo Gooti tool mi adonumaroka to'busuko kubalno kevu gavnokweyolluro a'mwo abolo kugaikullu kuruv aval'no me'no dekuma'dowodekono. Kevu Jisasolluno kuudo neya jaurogaulo. Su tool Gooti toolluro yogalo tokwe kuurotokwe imo'nodowodekono. Aki toro tool nemi pris aguto nonekullumo'nodowodekono. Aki toro toolluno kuudo uubweyodowado tonol gamino kuu'maiyo toru'no dodowiyoku'bworosodowadekono.
Gamoro kwoloraiyo tobuurobusuko su ton a'mwo abolo kulakokwe kuunodo imo'nodupudogano. Toro tovino tov Jisasol kwol kuruv a'mwo kulakokwe kuunodo sumo'nokaikono. Jisasolluro su toro sumo'noka tovino kavlo tov arokwono. Yiuno a'mwo kuunodo toolno nokwo bolonekono. Aki Jisasolluro abolo'ji tovi'aro bolnodo tovuro jurogudo tovi mwora'dowodo Satanyollu kaiyako nomollounapiyonekono.
Aki aiyokwe aral aral toorogai'aro 24-pela a'mwono moduvomwallokwe toorogai'aro tooro Sipsip Muugunyo toollu ilomoropiyo'moneyokwe dato muuduko puruv aro adoporogano. “Guvu judo tookuno puukwollikwiyo aweyogunyugolowosungiko su tovi maro'bi gamoro 7-pela gwomalo amugutowopingiko su tonyu nokwo modogaipolodukwopibinekugono. Yo'bi puukwollikwiyo su tovi guu nokwo kuusogunyugolowosubinekugono. Su tov aro tovinokwono. Gumi aromiyagubweyopo toga guu judo tookujuro mujako abwoloka tokwe Gooti tool a'mwo abolo tonyu abiyomarokagano. A'mwo abolo abiyomaroka su ton yiuwi'nokai judo'no judo'no yovodolobunyo togai'aro aki judo'no judo'no yogaljo togai'aro aki judo'no judo'no kula'nokakwe togai'aro aki judo'no judo'no kantri tovida'ai togai'aro yiuwi'nokai su tonyuda'ai a'mwo abolo tonyu Gooti tool gamiyo'mo abiyomarokagano.
Aki Gooti tool gamoro yasuwa'wino sugumaluko tov me'no anekubweyokaikono. Toro tovi'aro nevu gamoro sumdo tovi sugudo me'no wimo'nodowadonogano. Aki toro tonol aiyo yiunokuudo mujomwekovlaiyo'moneyokwe tovi, kuvinono nomaranonoldeyo, kuudo yau'dowadonogano. Su toro kuudo yaurowa'ji sogwollo to'no kingovla'mdowadonogano.
Su toro uumjungovlavopi aiyo yiunokuudo mujomwekovlaiyo'moneyokwe tov kuvinono mallo'mo sogwollo to'no kingovla'mwalpinogano. Aiyo mujomwekovlaiyo'moneyokwe su tovino aiyoga yiuwi'nokai ton yere mimo'nyodopure toga Gooti tool subuu'yamju me'no kwiyajukekono. Aki subuu'yamju kwiyajuko Gooti su tool kuunano yogalo puru'monodo kuruv miyoukuu'najokwekono.
Su toro tovino a'mwo pworavuro yiuwi'nokai buro'nyo buro'nyo kaiyako yanyugolodopure kuruv nuvu kavo to'no mwalodum mido mamallokwenyugono. Moro su toro yodumdo tov a'mwo abolo Gooti toolluro me'no ajesungiko tobuuraiyo'mokwono. A'mwo abolo su ton Krais Jisasollu kuuguro'mwonyupi tovi'aro kemi ma'no ma'nodo tovuro kirumwallo tovida'ai nokwo abirolo'nugolokuupuro. Aki a'mwo abolo su ton Gooti tooke gamoro bako bwotonyo anakuuto tomuu aiyo yiunokuudo mujomwekovlaiyo'moneyokwe kuruv nokwo amapuro.
Aki a'mwo abolo mino kuudo anubwepi ton kwako akavi kuuno mwalopi toga kemi agodeyo oo kuugwai'yagorodeyo oo jo'mwodeyo oo kuuneyagodeyo oo kuunumiyagorodeyo oo kwoloraiyodeyo oo womdodeyo tonyu nuugollu'mopinogano. Yiuwi'nokai kuugollu'mopi su tonyuno lukomgu muuduko pun nomapinogano. Yiuwi'nokai noonyumwonyu kuugollu'mopi su ton muuduko amapi toga Gooti tool 100-pela pugai'aro muunyu toru nuuwiyonekono. Aki a'mwo abolo su ton aiyo yiunokuudo mujomwekovlaiyo'moneyokwe tovi maropi yiunokuudo nomjomwekovla'mwalpinogano.
Gooti tool yiuwi'nokai toga gamoro yasuwa'wino sugumaluko tov nekullabiyokwekono. Aki Gooti tool kevu Krais Jisasollu uuguro'mwonyodupudo su toollu'aro gamoro bako su tovi anakuuto tomuu yiunokuudo mujomwekovlaiyo'moneyokwe kemi me'no adekumarokaikono. Toro tovino tov kemoro tabunyuwuulo amo'movla'mwakopo su ton manyu toga guureji mamjo'movla'mwalpinogano. Yiuno kula'nyo toga'gwono mokavlavopi kevu sugudo imo'nupino'moneyokwe Gooti tool aki aiko te yere yekuvo'dogalmwalonekono. Toro yekuvo'dogalowo'ji kemi sobanyo mollekuda'mwalonekono. Toro mollekudavowo'ji aki jurogudo yogullumwojekwapimwalonekono. Aki kemi jurogudo nomekudapimwalonekono. Gooti tool kemi tono tono yaikullugolmwalonekono.
A'mwo pwol yamju wiyoganyo'mo jul'nyo pun bwi'mo'mdowo'jure kuga kuruv gamoro kuudo kuubwengiko tovi neya agudupolarogawono. A'mwo agudupolaro'ji su tool ilaiyo nokwo yonekono. Su tov aro tovinokwono. A'mwo su tool wiyoganyo'mo jul'nyo bwi'mo'mdowo'jure tovi pi'mwono kuuwolowo'ji tov resis tovuro mubiyo ma'dupudo to'busuko kubalno Gooti tool aiyo yiunokuudo mujomwekovlaiyo'moneyokwe tov a'mwo su toollu nuubiyonekono. Gooti tool yiuwi'nokai a'mwo abolo gamino kalo buuropino winodupudo tonyu mubiyo su toro tov nuuwiyonekono. Toro wiyono su tovino subuu'yamju me'no aduuwiyajukekono.
Yiuwi'nokai a'mwo Gooti toollu kuudo kuubwemelabiyajupo su tooro me'no abollajuporogano. A'mwo su tooro kwako akavi kuuno mwalodopure toga Gooti toolluro subuu'yamju kwiyajuko tonyu yere mamallajuporogano. Gooti toolluro subuu'yamju su tonyu manyu tomuuda'ai to'busuko amuugonallajuporogano. Toro muugona'dupudo kuvi kuruv subuu'yamju su tonyu wonyo'mo ilaiyo kwinyajuporogano. Aki a'mwo su tooro aro adodoluwosunyajuporogano. “Oo nevu a'mwo pumuuda'ai toonolbusuko kwako akavi kula'nyo toga'gwo bomwalodowadonogano.” Toro adodoluwosunyajuporogano.
Kevu kuudo neya jaullulo. A'mwo abolo ma'no ma'nodo tovi dolago tomuu mwalodupudo ton kemi mubiyo tov ma'dupudogano. Mubiyo su tov bolnodo tokwono. Toro kuvi kuruv nemi Aguto Krais Jisasolluro womdo sopiyoka tovida'ai Gooti toolno'gwowi aiyo yiunokuudo mujomwekovlaiyo'moneyokwe tov yiuno yasuwa'no nekullabodowodekono.
Kuudo pun jaullulo. A'mwo pwol yere mabolo'ji toga gamoro kuto ivito tonyu ala'mwol maronoldukoneyokwe tovino pepa tovi yokwollosonekono. Toro sokwolloso'ji kuvi kuruv a'mwo su tool aiyo kuuno amwalo'ji toga pepa su tov womdo nonaguto imo'numwalonokwono. Toro kuvi kuruv a'mwo pepa sakwollo'ji su tool me'no abolo'ji toga'no'gwowi a'mwo pworo kuvinono me'no abolmokaldukoneyokwe tovino neya wonomapinekono. Su toro me'no kwonomapi toga pepa su tov womdo kurukwe imo'nonokwono.
Toro te nevu gamoro jurogudo nekubweyodowo'jure tokwe subuu'yamju muuduko tovino kuuguudo to'gwowi nokwo moruudomollanonogano. Subuu'yamju muuduko su tov loowo tovida'ai puukwollo to'busuko sokwollopiyabingiko'maiyo. Toro kuvi kuruv Gooti toolluro Kuullo toolluda'ai abingikokwono. Kuudo neya jaullulo. Loowo tov a'mwo abolo tonyu romiyosodowodo kuvi kuruv Gooti toolluro Kuullo toolno'gwowi aiyo yiunokuudo mujomwekovlaiyo'moneyokwe tov wiyodowodekono.
Toro tovino tov Gooti tooke gamoro sugudo su toru ilomwallo'moneyokwe nevu Juu tonolluda'ai punollu me'no janekubweyodowodekono. Toro kuvi kuruv yiuno nevu Juu tonolluno to'no janekubweyodowodolmaiyo. A'mwo abolo Juu tonolluro miyawosunodowado kunyu kuruv doma'dowo aval'no gavuge ilomwallo'moneyokwe jesodowodekono.
Aki nevu Gooti toolluro ikomago kwimo'nyajuuwo kunol kuruv gamoro Kwolaiyo toolluro aboloka tovida'ai Gooti tool nemi amomgurovanekubweyokaikono. Toro amomgurovanekubweyoka tovida'ai nevu gamoro ibwoto'nyo wimo'nodowadonogano. Toro tovino tov aro nonekullumo'nononogano. Jisasol aiko te me'no dukavo'no aiyo mwallokwekono. Nevu toro tooke aiyo mwalodowado tovino tov Gooti toolluro kirumwallo tovi nobirolo'nugolokwanonogano.
Su toro toga aguto kig toonyu a'mwo abolo anato tomgu amwalpi tonyu aro wuudumonyugono. “Oo moro Nyunumiyago toolluro sugudo pun ikubweyodowodogaikikono. Toro togaikul aguto kig mido mollomwalo tovida'ai sugudo ton kuvinono mapino'moneyokwe dobiloo.” Wuudumonyugono. Sugudo mapino su ton aiyoga kwako akavi muudu'no sokwollosoka togada'ai kemiyo'mo me'no sovrovaikubweyokagano.
Toro wosuno sumaiyokwe a'mwo aguto kig su tool lubullu doto su tovi biyonomwallo'moneyokwe a'mwo abolo me'no ajesungiko ton abupureyokwe gamoro ki'nato womdokwe pworai amodapiyokaikono. Toro amodapiyoka su tooro plaino sumaveyokwe a'mwo abolo lubullu doto tovi biyonomwallo'moneyokwe me'no ajesungiko tonyu kuudoporogano. Toro kuudopo kuvi kuruv a'mwo abolo su ton lubullu doto tovi biyonomwallo'mo tovino mwinopogano.
Toruda'ai Jisasol bret amaroka to'busuko kubalno kapwo puruv wain wonyo tokwe surosungiko tov amarokaikono. Toro malluno sumaiyokwe gami uumjunyokwe toorai aro kuudokaikono. “Kapwo akavi moro mujako tovino'busuko surosungikokwono. Moro mujako su tov kemi ikullo'mwojo'moneyokwe bwolawonokwono. Aki mujako su tov Gooti toolluro subuu'yamju muuduko puruv imo'nonokwono.” Kuudokaikono.
Toro te aga Gooti gavnokwe tool kemi mollekumwalmwalono'moneyokwe gamoro ato tovi amaikubwemono. Gooti su tool gamoro yasuwa'wino sugumaluko tollovaino kuuguudo tov ikubweyodowodekono. Yasuwa'wino sugumaluko su tov kevu Gooti toolluro a'mwo abolo kuunodo wimo'nodupudo togaikullu jurogudo daikullumwojumwalonokwono. Toro togaikul Gooti toolluro yiuwi'nokai kemiyo'mo jesodowodo ton lukomgu kuvinono nomapinogaikikono. Aki gamoro yiuwi'nokai a'mwo abolo kuunodo wimo'nodupudo su togai aval'no nomapinogaikikono.
Aki kevu aro sajupogaikikono. Kemida'ai a'mwo abolo pubuuro wuulo killo'mo ago tovi kuule'na'dopure su tobuuraino kalo aikullunyajukogaikikono. Aki a'mwo pworo kevu Jisasolluro a'mwo abolo togaikulluro kuto ivito tonyu ipolekuma'dopure kuga kuruv kevu ilaiyo to'no amwallajupogaikikono. Kemoro ilaiyo amwallajupo su tovino kavlo tov arokwono. Gooti toolluro noonyumwonyu kemi ikullabwono ton kwako akavida'ai tonyuno'gwowi uuwolo'mdupudogano. Aki Gooti toolluro ikullabwono su ton yiuwi'nokai toga kevuge yiunokuudo mujo'movla'mwalpinogano. Kevu su toro tonyuno sogwollo to'no kingovla'mdupudogaikikono. Su toro kuudo me'no youroma'dupudo tovino tov kemoro noonyumwonyu ton ipolekuma'dopure kuga kuruv kevu ilaiyo to'no amwallajupogaikikono.
广告