Toro te kevu kwako akavida'ai pasudo kuuno kuulaikwo'dupudo toorai neya joromiyosogaulo. Kwonyalo pasudo toorogai'aro kaiyako igolamo'nyo'mo toorogai'aro kwanyu sumdo kinuwiyo'mo toorogai'aro aki kirovanyuvanyu kiroungovlaiyo'mo kuudo toorogai'aro su toorai kevu manyu tomuu'aro neya domwalogaulo. Aki a'mwo pwolluro noonyumwonyu tonyuno magwesumdo kuruv nenuwimwalpiyo. Su tov aro tovinokwono. Guu a'mwo pwolluro kwako akavida'ai noonyumwonyu tonyuno magwesumdo ainuwibi su tov noonyumwonyu su ton gumi kuunano gooti toorobusuko gujumo'nopi kworai ilomoropiyabinekugono.
Efesos 5:3 - Gooti Toolluro Yogalokwono3 Aki kevu Gooti toolluro a'mwo abolo kuunodo me'no wimo'nodupudo togaikulluno tov kaiya'no pasudo akarai nomjumovla'mwalpiyo. Kwonyalo yo'mo toorogai'aro kemi kulako tokwe kaiyako igolamo'nyo'mo pasudo toorogai'aro kwanyu sumdo kinuwiyo'moneyokwe toorogai'aro ma'no ma'no pasudo su toorai kemida'ai pwolnodo kwol kuruv nyumwalo'jo. 参见章节 |
Efesos 5:3
58 交叉引用
Kevu kuudo neya jaullulo. A'mwo pwol kwonyalo yodowodoldeyo oo kaiyako igolamo'nodowodoldeyo oo kwanyu sumdo kinuwiyodowodoldeyo pasudo su toorai yodowodo tool Gooti tooke'aro Krais tooke'aro tooralluro aguto kig mido mollomwalo tomuu ku'nono maulomwalonekono. A'mwo abolo kwanyu sumdo kinuwiyodupudo ton kwako akavida'ai noonyumwonyu pun kemi kuunano gooti pwollubusuko ilomoropiyodapudogano.
Aki pugaikul aro dodupudogaikikono. “Oo wosamujuko ton nemoro sumwoluko tovino'mokwono. Aki nemoro sumwoluko tov wosamujuko tovino'mokwono.” Su toro dodupudo tov nebalokwono. Nemoro sumwoluko tov wosamujuko ton kuulomnallo'moneyokweyokwono. Toro kuvi kuruv lukomgu Gooti tool nemoro sumwoluko tokwe'aro wosamujuko tokwe'aro tovallu kaiyako nomollounapiyonekono. Kevu sumwoluko tovino su toro dodupudo kuvi kuruv aro to'gwowi nodumwalpiyo. “Nemoro kulako tov kwonyalo tovino'mokwono.” Nodumwalpiyo. Gooti tool nemoro kulako tov kwonyalo'moneyokwe sokwollanekubweyokalmaiyo. Toro kuvi kuruv nemi Aguto toollu ilomoropimwolowano'moneyokwe to'gwowi sokwollanekubweyokakwono. Aki Gooti gavnokwe tool nemoro kulako tonyu mido mollomwalmwalono'moneyokwe sakwollosokakwono.
Toro kuvi kuruv a'mwo abolo puno'gwowi wagwolago su tovi kwa'mgu tomuu mwalpinogano. A'mwo abolo jul pasudo yodupudo togai'aro bulapto yodupudo togai'aro kwonyalo yodupudo togai'aro a'mwo pworai romiyosodupudo togai'aro kuunano gooti toorai ilomoropiyodapudo togai'aro aki yiuwi'nokai a'mwo abolo kevnokwenyuro kuunano pasudo tovino ilaiyo winopi youkuu'nuudodupudo togai'aro yiuwi'nokai su ton wagwolago tovi kwa'mgu tomuu mujomwekovla'mwalpinogano.
Toro kuvi kuruv a'mwo abolo puno'gwowi luko yodupudo su togai'aro kuudo muubweyodupudo togai'aro kaiyako igolamo'nodupudo togai'aro romiyosodupudo togai'aro kwonyalo yodupudo togai'aro bulapto yodupudo togai'aro kuunano gooti toorai ilomoropiyodapudo togai'aro kuunano yogalo youkuu'nuudodupudo togai'aro yiuwi'nokai su tonyuno'gwowi dukworokakwe salfa sulo tokwe du'muudo nugovla'mdowo'jure tovi noulapinogano. Du'muudo su tovino, naba 2 bolnodovo, dodupudokwono.”
Toro kuvi kuruv gumi yogalo pun aro mojurugologumollumo'monyugono. Aiyogasuro a'mwo pwolluno yovo tov Balamolekono. Toro tool a'mwo gabovo pwollu aro sodubwasajukekono. Isuraiyolda'ai a'mwo abolo ton ma'no ma'no yopi bwolorapino'moneyokwe guu neya dode'nomarogawono. Sodubwasajukekono. A'mwo gabovo su toolluno yovo tov Balakolekono. Toro tool Isuraiyolda'ai tonyu ki'nomallo'moneyokwe wosamujuko ton kuunano gooti toorai me'no kwiroudapingiko tonyu nonyo'mo tokwe'aro aki kwonyalo yo'mo tokwe'aro tovalluno sodubwasajukekono. Su toro yodubwasoduke tovida'ai Isuraiyolda'ai ton uumjunodupu kuunano gooti su toorai sulomoropiyajupogano. Agasuro kemida'ai a'mwo pworo Balamolbusuko pasudo su toorai aval'no yodupudorogano. Su toro yodopure toorai guu wonyapino to'no yodumdo tovino nuu yogalo amodagujurogolmono.
Nuvu kuuguudo pworo aro tovi kuu'numwakonyugono. Kemi anakuuto tomuuda'ai kwonyalo pumgu'aro pworo sumo'nadokwoporogano. Kuuguudo su toro tovino nyudodopure tovi me'no kuu'numwakonyugono. Kwonyalo pumgu'aro sumo'nadopiko su tov kirovanyuvanyu pasudo kuunodokwono. Aki kaiya'no pasudo su tov a'mwo abolo Gooti toolluno kuudo muubweyodupudo ton miyodupudokwono. Toro kuvi kuruv kemida'ai pworono'gwowi kaiya'no pasudo su tovi me'no sadokwopokwono. Kwonyalo pumgu'aro su tov arokwono. Kevu Jisasolluro mollu'bwoto togaikulluda'ai a'mwo pwol gami ganuwawiyo tovi ma'dowo amollomolladopikekono.
Aki a'mwo abolo su ton kaiya'no pasudo aro toorai buulo muugunyumopiyajupogano. A'mwo abolo punyu romiyosodupudo'mdeyo oo bulapto yodupudo'mdeyo oo kwonyalo yodupudo'mdeyo oo kuuko yodupudo'mdeyo kemi kaiya'no pasudo su toorai yomjomwekovla'mdupudo ton mimwogapiyajupogano. Kemi pasudo su toorai kuuno kuumjungovlaiyajupogano.
A'mwo kuunano ibwasokwe su tooro nuugwiyo bwotonyago tonyu ki'nomallo'mo guureji winyokwerogano. Toro tooro kemoro nuugwiyo tonyu ki'nekumallo'moneyokwe kuunano yogalo togai yekubwasupinorogano. Gooti tool kooti yogalo tovi mollomwalokwekono. Toro tool a'mwo kuunano ibwasokwe su toorai nerumwallo'moneyokwe tovino aiyoga me'no adomdukuurosokaikono. Toro te kuunano ibwasokwe su toorai kaiyako nomollounapiyono tool sa mwollokwekono. Toro kwol kuruv a'mwo su toorai lukomgu nerumwallono tovino yiuwi'nokai toga sogwollo to'no kinyokwekono.
Aki kemida'ai pwolnodo kwol kuruv kwonyalo pasudorodeyo oo Gooti toolluda'ai mabodupudo pasudo toorai mamolludo'movlapiyo. Pasudo su toorai amolludo'movlaiyajuko Isoo'wolbusuko nyumo'numwalpiyo. Aiyoga Isoo'wol wosamujuko yiuno puru'monodo toga nonyo'moneyokwe tekwogai gami ganumiyago toolluro kuto ivito yiuwi'nokai lukomgu nomarono ton gami gagwai'yago Jekoopollu sodolovomarokaikono.
Aki aro tovino manyunodowodonyugono. Nuu kemi aiko te bekuru'maro'mi kevuge amwalmi toga moro Gooti tool mi nobwolomonumwogapiyawo'jokwe tovino manyunodowodonyugono. Aki kevu bwotonyago pugaikul ma'no ma'no pasudo aro toorai kiroungovla'mdupudogaikikono. Kaiya'no mollugolamo'nyo'mo pasudo toorogai'aro kwonyalo pasudo toorogai'aro kevnokwenyuro kulako tovi ilaiyo igollunyo'mo pasudo toorogai'aro pasudo su toorai pugaikul kuuno kiroungovla'mdupudogaikikono. Kevu pasudo su tooraida'ai yere miyouragunyumo'nodopure togaikullu nobaikwonmiyo. Nuu kuvinono abaikwonmi to'gwowi kemino wogulo ibwosuno'mi kumdaillo to'no mujumovla'monyugono.
Aki abolo yadainyunodo tonyu ibwaso'mo tov arokwono. Aguto toolluro womdo ilaiyo wiyokwe tomgu'aro neya imo'numwalpinobuurogano. Toro tobuuro a'mwo abolo punyuno buulo yogalo madopi aki wain wonyo bwotonyago nonumwalpiyo. Toro kun kuruv sugupasudo tonyuno'gwowi neya uumjunogapureyokwe ibwasumwalpinogano.
Aro tovinokwono. Su toro toga a'mwo abolo ton kaiya'no pasudo go'no go'nodo toorogai mujeroungovlapinogano. Toro ton yiuno kevnokwenyuno to'no kalo buuropino wingovla'mwalpinogano. Aki nuugwiyo bwotonyo ki'nomallo'moneyokwe guureji winmwalpinogano. Aki kevnokwenyuno ilomodomoropinyo'moneyokwe yogalo dumwalpinogano. Aki toro ton kevnokwenyuno aro ilomoropinapinogano. “Oo nevu tovosonol kuuwolo'mwakuuwono.” Toro dopi aki Gooti toollu bwolomorumwogapiyo'moneyokwe kaiya'no yogalo dumovla'mwalpinogano. Aki kemi kuunum kwolabolo tonyu kisuvolo wimwalpinogano. Aki noonyumwonyu pun amapi toga, “Nenyoo,” muudumwalpinogano. Aki Gooti gavnokwe toolluro pasudo idopto'nodo tonyu buulo uugunyumopimwalpinogano.
Toro tovino tov nevu jul'nyo muubwemwalanonogano. Toro kuvi kuruv yiuno yogalo paiko pwekwono'gwowi aduuwiyano. Aki yogalo su tov pas tovi yakwollowa'ji a'mwo su to kworaino neya uuwapiyano. Pas su tovi aro yakwollanokwono. Kevu kuuguudo akavi neya duumjunogaulo. Wosamujuko pun kuunano gooti tooraino me'no kwingiko ton kevu nonyo'mo kumako neya domwalogaulo. Aki kevu kwonyalo mipinono. Aki allukuulolo tooro boruko tovi'aro aromiyogubulosungiko toorai manpinono. Aki mujako tov kuuno wo'dowo'jure toorai manpinono. Yogalo su tovino to'no pas tovi yakwollowa'ji uuwapiyanokwono.
Aki a'mwo pi'mwo kuudokwe pworo aro yodupudo toorai jo'mgonomarono. A'mwo pworo Gooti toollu dolago tomuu uumjungovla'mdupu nebal'no yogalo to'no dopi aki a'mwo abolo punyuro nuugwiyo ki'nomallo'mo mwinodupudogano. Toro toorai yo'mgonomaro'bi dojesono. Toro ajesubi su tooravuro pworo 1,000 pworo 100 pworo 50 pworo 10-pela a'mwo abolo tonyu mido mollomwalmwalpinorogano.
A'mwo kuunano ibwasokwe su tooro kemi sumdo togai kwonyalabolo punyu yo'mgonomallo'mo guureji ya'mgonodupudorogano. Aki su tooro aro to'busukorogano. A'mwo sumwoluko manyuto'nodowodo pwol yiuwi'nokai toga wosamujuko tov guureji nugovlaiyo'mo winodowodekono. Toro toolbusuko kubalno a'mwo su tooro ma'no ma'no pasudo tonyuno yiuwi'nokai toga nonyuto'nugovlaiyo'moneyokwe guureji winodupudorogano. Aki a'mwo su tooro a'mwo abolo pubuurai ki'nomallokwerogano. A'mwo abolo su tobuuro Gooti toolluno kuudo me'no uubweyodupudo kuvi kuruv guureji magudupola'dupudogano. Toro magudupola'dupudo tobuurai ma'no ma'no ipureyokweyo'mo a'mwo kuunano ibwasokwe su tooro ki'nomallokwerogano. Aki a'mwo kuunano ibwasokwe su tooravuro poowokalago tonyu nuugwiyo bwotonyago ki'nomallo'mo kuudo tov kuullo'mowopiyodowodokwono. A'mwo su tooro Gooti toolluro tabunyuwuulo nuubweyono tovi dolago tomuu me'no mwalodupudorogano.
Aki a'mwo kuunano ibwasokwe tooro kemi kulako tokwe kwonyalo yo'moneyokwe pasudo tooraino kwanyu sumdo to'no kinuwiyodupudorogano. Toro kinuwiyodupudo su tov Gooti toolluro sumdo tovi kaiyako igolamo'nodupudorogano. Aki toro tooro kemi mido mollomwalokwe toolluro yogalo tovi dolago tomuu mwallo'mo kwoda'molo to'no yodupudorogano. A'mwo su tooro kemi kirumwallo tov yere mama'dopure kuvi kuruv lukomgu Gooti tool guureji nerumwallonekono. Aki kemoro kirovanyuvanyu pasudo kiroungovla'mdupudo tovino luko miyodupudorogano. Aki kevnokwe tooravuro kuudo tovino to'no uumjunodupudorogano. Toro tooro Gooti toolluro bako bwotonyo pwopiyodowodo tomuuda'ai ensel tooraino burolyogalo bwolomorumwogapiyodapudorogano. Toro abwolomorumwogapiyapi kuga kuruv luko bu'buto miyodupudorogano.
Kevu Gooti toolluro a'mwo abolo sipsip tobuurobusuko imo'nodupudo su tobuurai pi'mwono neya domollomwalogaulo. Gooti tool a'mwo abolo su tobuurai mollomwalmwalpino'moneyokwe womdo tov kemi me'no aikubweyokaikono. Toro te a'mwo abolo su tobuurai moduvomwallo'moneyokwe kevu biyolo nuu'mwojumwalpiyo. Toro kuvi kuruv Gooti toolluro ilaiyo winodowo'jure tovi kuvinono uumjunopi Jisasolluro mollu'bwoto su tovi moduvomwallo'moneyokwe womdo su tovino ilaiyo neya domjumovlavogaulo. Aki kevu moduvomwallo'moneyokwe womdo su tovi mujumovlavopi yiuno nuugwiyo ki'nomallo'moneyokwe to'no kuudo nyau'mwalpiyo. Toro kuvi kuruv kevnokwe toorekul Jisasolluro mollu'bwoto su tovi moduvomwalpino'moneyokwe tovino ilaiyo neya aikullunogawono. Su toro tovino tov womdo guureji neya jogaulo.
A'mwo su toro modomollodupudo tooro nuugwiyo bwotonyo ki'nomallo'moneyokwe kuudo yauropi yodubwasodupudorogano. Aki su toro yodubwasodopure tovida'ai a'mwo pworogai'aro kemi yiuwi'nokai julkwolaiyo togai'aro tonumdoto kemoro kuudo uubweyodupudo tovi kaiyako me'no mollugolamo'mdupudorogano. Toro te yogalo su tooro nyodubwaso'moneyokweyoromaiyo. Toro tovino tov guu a'mwo su tooravuro mago tonyu neya duubutovogawono.
A'mwono moduvomwallokwe ajesubi su tool Gooti toolluro womdo tovi mollomwalono toolluno tov a'mwo abolo ton kwolluno, “Oo a'mwo akal kaiya'no miyodowodekono,” to'no neya dumwalpinekono. Aki toro tool a'mwo aguto yovokwe toorobusuko imo'nowo'ji a'mwo abolo tobuurai madumuuroleyokwekono. Aki a'mwo su tool sumwoluko su'mno yere mimo'nyokwekono. Aki amomo yo'moneyokwe wain wonyo bwotonyago manyokwekono. Aki magu'nyo miyokwekono. Aki nuugwiyo bwotonyago ki'nomallo'moneyokwe mwinodowodekono.
Su tov aro tovinokwono. Abolo sugudo ton yiuno kwa'mgu kulako tovi yovaisu'nyo'mo to'no kuudo miyau'dupudogano. Toro kun kuruv kemi sugupasudo tollovogai to'gwowi youro tousobusuko mollosopi wuuduuwallo'mo winodupudogano. Abolo su tonyuro pun aro dupinogano. “Oo nevu Gooti toollu uumjunyokwenogano.” Su toro adupi ton a'mwo abolo punyu kuu'maiyo toru'no wuuduuwallunyo'moneyokwe kemi sugupasudo tollovai'aro neya wuuduuwallunumwalpinogano.
Kevu aro neya jogaulo. Krais toolluro kuuguudo sugudo tovino wuuduuwallo'moneyokwe kemoro pasudo tov pi'mwono to'no neya domjumovlavogaulo. Kemoro pasudo toro amjumovlapi tov nuu nobaikwonmonyudukono oo mabaikwonmonyudukoneyokwe tovino kuudo miyau'mwakono. Toro kuvi kuruv kemino kuuguudo pun kuu'numi toga aro kuudo nokwo yaikuu'mwalmonyugono. Oo a'mwo abolo judo'no judo'nodo su ton jurogudo da'mdupudodeyo. Aki yiuwi'nokai su ton kuudo puru'mono to'no yau'dupudodeyo. Toro ton kuuguudo sugudo tokwe moruujo'moneyokwe avaiwomdo yodupu imgu amgu sobanyo molluulnoda'mdupudodeyo. Toro yodopure tovida'ai a'mwo abolo pun kuuguudo sugudo su tovino kuudo nokwo uubwepinogano. Toro tovino'mo womdo su tovi guureji yodupudodeyo.
Abolo su tov nemi Aguto toolluro kwoloraiyo me'no kwimo'nokakwono. Toro tovino tov kevu yiuwi'nokai Gooti toolluro a'mwo abolo gabovo tonyu ilaiyo molloma'dupudo to'busuko kubalno aval'no neya mollomapinokwono. Aki abolo su tov a'mwo abolo bwotonyago togai'aro nuuge'aro tonollu nekullo'mwojodowodokwono. Toro tovino tov abolo su tovuro buro'nyo buro'nyodeyo tonyuno supto so'ji tov kevu duuwiyo'mwojogaulo.
Aki kemoro kulako tovida'ai suvlato togai ma'no ma'nodo tovuro womdokwe nuuwimo'numwalpiyo. Su tov aro tovinokwono. Sumdomgu kevu bolnodo tovi dolago tomuu mwalodupu me'no abollungopo togaikulbusuko sumo'nyajupogaikikono. Toro kugaikul kuruv aga'no'gwowi kevu aki aiko te duka'mdupu aiyo me'no imo'nodupudogaikikono. Toro togaikulluno tov Gooti toollu ilomoropiyapureyokwe kemi kulako tovida'ai suvlato togai sugudo to'no neya domjumovlavogaulo.
A'mwo abolo su tonyuro poowokalago tovi kemi kirovanyuvanyu go'no go'no yo'moneyokwe ton aiyowomno aullo'mowopiyajukogano. Toro kuullu'mowopiyoduke tovida'ai aro sajupogano. Ma'no ma'no yodupu kwanyu sumdo kinuwiyodupu suroguudo yau'dupu kwekuullu kuudo yau'dupu aki pworai yiuno'no aromiyosajupogano. Yodupu aki molo inodupu kuunano yogalo youkuu'nuudodupu magu'nyo kuudo yau'dupu aki a'mwo abolo punyu bwolomorumwogapiyo'moneyokwe yogalo ajajupogano.
Toro sajulo kworal kuruv kemi kuunumiyago toolluro sajuko kubalno miyajulorakono. Aki toro tooral kemi kuunumiyago toolluro kuumjunyajuko tomgu'aro buulo uugunyumopiyodubul nuugwiyo mallo'mo to'no kwinyajulorakono. Toro toorallu a'mwo abolo jul'nyokwe ton yiulo tomuu nuugwiyo uubiyodopure tovino tov kooti yogalo tonyu kaiyako amollugolameyajulorakono.
Toro te neya duu'nyulo. A'mwo abolo pun nuugwiyo bwotonyo ki'nomallo'mo tovino guureji wingovla'mdupudogano. Su toro wingovla'mdupudo tovida'ai buro'nyo buro'nyo ma'no ma'no pasudo tooro billumo'nodupudorogano. Aki a'mwo abolo pun nuugwiyo bwotonyo ki'nomallo'mo tovino guureji wingovla'mdupudo su ton kuuguudo sugudo kuudo me'no kuubweyopo su tovi wuugollu'mo'mdupudogano. Toro ton kevnokweyon kaiyako i'nodupu tagunyo bwotonyago ma'dupudogano.
广告