Toro te nemoro yiuwi'nokai pasudo mujumovla'mdowado tovi'aro nevnokwe toonolluno kuu'maiyo toru'no aro wuuduuwallunodowadonogano. “Oo nevu Gooti toolluro womdokwe kuunodonogano.” Wuuduuwallunodowadonogano. Toro toonollu tabunyuwuulo go'no go'nodo togai'aro aki jul'nyo bwotonyo togai'aro aki kaiyako yanekullugolodopure tovida'ai luko bwotonyo yodowado togai'aro su ton baneki'mo'mdupudonogano.
1 Koorin 3:5 - Gooti Toolluro Yogalokwono5 Kevu kuudo neya jaullulo. Apoolosol ala'mwoldukono? Aki nuvu Poolonyu ala'mwonyudukono? Yiuwi'nokai toonal yiuno Aguto toolluro womdo tovi wiyokwe tekwojonakono. Toro tekwojonalluno kevu yogalo youllajunodupudo tov navu ilaiyo mimwakuuwolo. Yiuwi'nokai toonal Aguto toolluro womdo tovi wiyo'moneyokwe gavnokwe tool ajonakubweyokanakono. Womdo su tovi yodowole tovida'ai kevu Krais toolluno kuudo kuubweyopogaikikono. 参见章节 |
1 Koorin 3:5
30 交叉引用
Gooti tool kevu Jisasolluro a'mwo abolo pwolno puru'monodo togaikullu gamoro yasuwa'wino sugumaluko tov me'no aikullabokaikono. Toro ikullabino sumaiyokwe kevu Gooti toolluro womdo imwalpino'moneyokwe yasuwa'wino judo'no judo'nodo tonyuda'ai pun aikullabokaikono. Yasuwa'wino aikullaboka su ton Jisasolluro a'mwo abolo pubuurai womdo wimwalpino'moneyokweyogano. Toro te kevu yiuwi'nokai Jisasolluro a'mwo abolo togaikul imgu amgu womdo pi'mwono neya jungovlavogaulo.
Toro te nevu gamoro jurogudo nekubweyodowo'jure tokwe subuu'yamju muuduko tovino kuuguudo to'gwowi nokwo moruudomollanonogano. Subuu'yamju muuduko su tov loowo tovida'ai puukwollo to'busuko sokwollopiyabingiko'maiyo. Toro kuvi kuruv Gooti toolluro Kuullo toolluda'ai abingikokwono. Kuudo neya jaullulo. Loowo tov a'mwo abolo tonyu romiyosodowodo kuvi kuruv Gooti toolluro Kuullo toolno'gwowi aiyo yiunokuudo mujomwekovlaiyo'moneyokwe tov wiyodowodekono.
Aki a'mwo su tooro Krais toolluro womdo tovi wiyodupudorodukono? Yowa'nogano. Nuu kwonyu kuruv Krais toolluro womdo tovi wiyodumdonyugono. Toro toonyu, Aiyoo, a'mwo amomo pwonyubusuko aro ikudumo'mokwono. Nuu a'mwo su toorai uuwolo'mdumdonyugono. Aki a'mwo su tooro womdo bwotonyo miyodupudo kuvi kuruv nuu toonyuno'gwowi womdo bwotonyo kuunodo yodumdonyugono. Aki a'mwo su toorai wuulo killo'mo ago tovi maulomerosodupudo kuvi kuruv nuu toonyuno'gwowi bwotonyago toga wuulo killo'mo ago tonyu meranubweyodupudonyugono. Aki yiuwi'nokai toga iwago nyuromiyodupudonyugono. Toro toonyu bwotonyago toga nobollo'mo wobo toru yodumdonyugono.
Nemoro poowokalago anakuuto tomuuda'ai bako pwopiyodowodo su tov kuuguudo sugudo tovino yovekurajokwono. Kuuguudo sugudo su tov nuugwiyo bwotonyo tokwe biyoma'dupudo to'busukokwono. Kuuguudo sugudo kuulanekwo'dowodo su tovuro jurogudo tov nevnokwenolluro'maiyo. Toro kuvi kuruv yiuno Gooti toollurokwono. Toro te Gooti toolluro jurogudo su tovi kuu'maiyo toru'no wuuduuwallo'moneyokwe nevu kwa'bootool jurogudo maiyo to'busuko imo'nodowadonogano. Toro tekwojonollu gamoro kuuguudo sugudo tov kuulanekwo'dowodokwono.
Aki kevu aro tovino kuu'maiyo toru wuuduuwallodupudogaikikono. Kevu Krais toolluro pas sokwollopiyaboka to'busukogaikikono. Pas su tov nemoro ato tovi'aro sokwollopiyabokakwono. Pas su tov pen tokwe puukwollo sakwolloka'maiyo. Toro kuvi kuruv aiyo mujomwekovla'mdowodo Gooti toolluro Kuullo tooke to'gwowi sakwollokakwono. Aki pas su tov Moosesolluro loowo to'busuko sulbweko tousi puukwollo sakwolloka'maiyo. Toro kuvi kuruv a'mwo abolo tonyuro poowokalago tomuuno'gwowi me'no yokwollubweyodowodokwono.
Gooti tool gamoro yasuwa'wino sugumaluko anyaboka tovida'ai nuvu a'mwo sulago pi'mwono mojokwe pwolbusuko sumo'nonyugono. Toro toonyu sulo pwol kwako tomuu aluvogiloudapiyonyugono. Aki moro sulo aluvogiloudapiyo su toollu muunyu toru a'mwo pworo amodumelabadokwovo. Yiuwi'nokai a'mwo pwolno pwolno ago mojokwe su tooro moro sulo aluvogiloudapiyo su toollu muunyu toru po'dogalo modumelabiyo'moneyokwe wako neya kuu'numwalpinorogano.
Toro te Gooti tool gamoro mollu'bwoto tonyu aro ajesokaikono. Muudu'nodo tooro kuurotokwe toorogano. Su toorai iwapi tooro proofet toorogano. Aki lukomguda'ai tooro ibwasokwe toorogano. Aki toruda'ai Gooti tool gamoro mollu'bwoto tonyu yasuwa'wino pun kwiyokaikono. Pworo duuwallo jurogudokwe toorogai'aro nobollo tonyu ikullokwe toorogai'aro a'mwo abolo pubuurai wiyo'mwojokwe toorogai'aro mido mollomwalokwe toorogai'aro a'mwo abolo gabovo tonyuro yogaljo tonyu moruudodupudo toorogai'aro yiuwi'nokai su toorai Gooti tool yasuwa'wino kwiyokaikono.
Kevu kuudo pun jaullulo. Nuvnokwenyuro kuudo tovida'ai womdo tovi senyubworomaro'mujuko'mno'juki womdo su tovuro mubiyo tov nokwo amaro'mujukonyugono. Toro kuvi kuruv Gooti gavnokwe toolno'gwowi womdo su tovi yenyubworomaro'no mi anubweyokaikono. Toro anubweyoka su tovino to'no mujumovla'mdumdonyugono.
Toro te a'mwo Gooti toolluro yogalo tokwe sumdomgu moruudodowodo tooke'aro Gooti toolluro yogalo tokwe lukomgu ibwasodowodo tooke'aro tooral womdo bwotonyo miyodubulorakono. Toro kuvi kuruv womdo bwotonyo to'gwowi Gooti gavnokwe tool yodowodokwono. Gooti tool gavnokweyolluro kuuguudo tokwe a'mwo abolo tonyu aguto yogullumwojapiyodowodekono.
Toro sakwollajupo su tooro yiuwi'nokai nemi anekullumo'nugelabiyajupo tonyuno me'no amuugonallajuporogano. Aki toro tooro Gooti toolluro yogalo tokwe a'mwo womdokwe kwimo'nyajuporogano. Toro wimo'nodupu Gooti toolluro yogalo su tokwe amodomollajuporogano. Toro tooro yiuwi'nokai amuugonallajupo su togai'aro yogalo amodomollajupo togai'aro su ton nemoro ato tovi anekubweyoporogano.
Ki'nato womdokwe pwolno pwolnodo su tooravuro jurogudo tovi wonomaro'no kwiyokaikono. Ki'nato womdokwe pwollu nuugwiyo 5,000 tov kwiyokaikono. Aki ki'nato womdokwe pwollu nuugwiyo 2,000 tov kwiyokaikono. Aki ki'nato womdokwe aiyowo'mo toollu nuugwiyo 1,000 tov kwiyokaikono. Yado me'no uumwodeno sumaiyokwe a'mwo su tool kantri pumuuno avlavokaikono.
Toro te Krais toolluro mollu'bwoto su tovi mollomwallo'moneyokwe womdo tov Gooti tool mi ajanubweyokanyugono. Toro tovino tov Krais toolluro mollu'bwoto togaikullu womdo ikullodumdonyugono. Aki Gooti toolluro kuuguudo tov kemi kuu'maiyo toru'no yiunokuudo bomollolupto'naikubweyo'moneyokwe Gooti tool mi me'no ajanubweyokanyugono. Toro tovino tov nuvu kuvinono moruudekumollodumdonyugono.
To'no'gwowi a'mwo Juu pwol wagwolago Efesos'no toru bai'movo'no abomwalokaikono. A'mwo su toolluno yovo tov Apoolosolekono. Toro tool wagwolago Aleksadriyada'aiyekono. A'mwo su tool kuuguudo ilaiyo to'no ajajukekono. Aki toro tool Gooti toolluro kuuguudo sakwollungiko tonyu jagilodowo pi'mwo kuudokwe sumo'nyajukekono.
Gooti tool gavnokweyolluro sugudo tov mi me'no anubweyoka toonyuno tov nuu Krais Jisasolluro womdokwe wimo'nodumdonyugono. Toro toonyu Gooti toolluro kuuguudo sugudo tokwe a'mwo abolo Juu tooravuro miyawosunodupudo tonyu moruudomollodumdonyugono. Moro womdo yodumdo su tov pris tooravuro womdo sajupo to'busukokwono. Pris tooro Gooti toollu wiyo'moneyokwe sipsiporodeyo toorogai kwiroudapiyajuporogano. Toro kwiroudapiyajupo toga Gooti tool kemoro wiyodopure toorai ilaiyo amollomallajukekono. Su toro to'busuko kubalno nuu Jisasolluro kuuguudo tokwe a'mwo abolo Juu tooravuro miyawosunodupudo tobuurai moruudomollodumdonyugono. Su toro moruudomollodore tovi'aro a'mwo abolo pun kuudo uubweyodupudogano. Toro uubweyodopure tonyu Gooti tool ilaiyo molloma'dowodekono. Aki Gooti toolluro Kuullo tool a'mwo abolo su tobuurai ma'dowo Gooti toolluro kwoloraiyo kuunodo wimo'numwalpino'moneyokwe morumwallodowodogano.
Aki nemi avalo Apoolosolluno kuuguudo tov arokwono. Nuvu Apoolosollu guureji aro adumul'mwojonyugono. “Guvu Jisasolluro a'mwo pworogai plavo'bi wagwolago Koorinda'ai Jisasolluro a'mwo abolo tonyu neya duuru'marogawono.” Toro adumul'mwojo kuvi kuruv a'mwo su tool aga novlaiyo'mo mwinadopiyo. Toro kuvi kuruv lukomgu puuto ilaiyo ausubweyo'ji toga'no'gwowi kemi nobekuru'maronekono.
Yiuwi'nokai tono tono nonekullumo'nugelabodupudo su ton Gooti toolluda'ai to'no imo'nodupudogano. Gooti su tool Krais toolluro womdo sopiyoka tovi'aro nemi gavuge sumwoluko noullo wosunyo'moneyokwe me'no amomgurovanekubweyokanogano. Aki Gooti tool a'mwo abolo tonyu momgurowoso'moneyokwe womdo tov nemi me'no anekubweyokaikono.
Toro te kevu kemi kuudo uubweyodupudo tovi kuuno gudupolaropi kuumjungovlapi tov guureji neya dovorugwo'mo'narogaulo. Aki kuuguudo sugudo me'no kuu'nopo su tovi muugollu'movopi aki yiuwi'nokai nomapino tonyuno yiuno sogwollo to'no kingovla'mwalpinogaikikono. Kevu su tomgu'aro somjumovlapi tov Gooti toolluro sumdo tovi kaiya'no nonagutokwe wimo'nupinogaikikono. Kuuguudo sugudo kuu'nopo su tov yiuwi'nokai kwako akavi aiyowomno bomje'nugoulodawodokwono. Nuu Poolol kwonyu kuruv kuuguudo sugudo su tokwe neya moruudomollo'moneyokwe a'mwo womdokwe me'no wimo'nodumdonyugono.
Nemi Aguto Krais Jisasol gamoro womdo akavi momjumovlaiyo'moneyokwe mino aro kuudo me'no souromarokaikono. Oo moro womdo tov nokwo uubwemwalmekono. Su toro kuudo me'no youronuma'no sumaiyokwe ajanubweyokaikono. Yo'no aki womdo su tovi momjumovlaiyo'moneyokwe jurogudo tov nubweyodowodekono. Toro tovino tov nuu, “Nenyoo,” wuudodumdonyugono.
广告