32 Cruzki ea bastawudu ea ikũira wanuwu ẽ atu yuixiwi”, Jesúspa atu wadi.
Naskake Jesúspa atu yuidi: “Maawawe cruzki bastaxu widibakata Dukuwene awẽ Wake ma tapixiwi tsuamaiki. Ewẽ Epa awẽ bitsisipaya ẽ. Ewẽ shinama awa ẽ atiruba. Ewẽ Epa ea yuiya ẽ atiru.
Moiséspa rudu broncena widiniwuwãdi tsua ikabarixu. Dukuwene awẽ Wakeri naskaxiwi widinakawaxiwi.
Ewẽ Epã na ea nichiditu axuyabaidu tsua ẽ udua tapibis itiruba. Ewẽ Epã na baitiu ma adaitiyaidu na ẽ udua tapibiswu awiana ẽ widinupukui Epa Dioswe ipaxanuwu.
Jesús udua yurawu yuinu na atu yuiyai naatiiwixu ikũira wanuwu.
Awẽ ade wetsa Bapu Xaka nadu Jesúspa awẽ cruz iaxu wudi. Hebreo tsaima judíowawe yuitiru Gólgota adu.
Yurawawe kebadiwu: “Ma nu tapia Epa Dios tsai adu kedeya Epa Dios nichia ipadaka. Aweskai Dukuwene awẽ Wake: ‘Cruzki bastaxikadi’, mi ikime. Naa Dukewene awẽ Wake tsuame”, wadiwu.
Na Jesúspa rewu yuidi naskakuidi bastaxikadi danu.
