6 Oveja keskara udua Jesúspa atu yuiwiyaitu yurawawe tapidiwuba na atu yuipaiyai.
“Tsai wetsawaxu ẽ batu yuiya. Awara aweskaraidu ana ẽ tsai wetsawaxu batu yuixiba. Kayakawikui ewẽ Epa udua batu yuixiwi.
Aweskai ewẽ tsai ẽ batu yuiyai ma dikaibame. Na ẽ batu yuiyai ma dikakaspai.
Apa Dios udua yuiwiyaitu tsuã tapidiba.
Awe ipai ikime: ‘Ma ea wedawaidaka. Naskaweke ea ma wichiwaidakaba. Ẽ ikadu ma katiruba’, iki”, wadiwu.
Jesúspa tsai dikakadi a udua tapibiswu wetsawawe yuidiwu: “Da yuiyai wekaxkui. Tsuãkai ikũira watiruba. Nuukai iskara tsai ikũira watiruba”, idiwu.
Naskaitu dikakadi judíowu askawatanadiwu: “Aweskaxume da dukuwene awẽ dabi duku inatirume nu pinu”, idiwu.
A uduax tapibiswawe yuidiwu: “Tsai wetsawaxu ana yuiba. Xawakawikui yui”, wadiwu.
