2 Corintios 5:20 - Alacatlatzala Mixtec New Testament

²⁰ Ta saá nda̱tán yóo nata̱a na na̱kuiso chiño ña ko̱ꞌo̱n na inka̱ ñoo xíꞌin nda̱yí ta̱a ta̱káꞌno no̱o̱ na ña kasa ndivi na chiño ta̱yóꞌo, saá yóo mi̱i ndi̱ vitin. Saá chi Jesucristo sa̱kuiso chiño ra mi̱i ndi̱ ña ko̱ꞌo̱n ndi̱ inka̱ ñoo xíꞌin nda̱yí ra ña chindeé ndi̱ ni̱vi ña nakutáꞌan va̱ꞌa na xíꞌin Ndios. Ta to̱ꞌon ña ndáto̱ꞌon ndi̱ xíꞌin ni̱vi, nda̱tán yóo to̱ꞌon ña xáku ndáꞌví mi̱i Ndios no̱o̱ na, saá yóo ña. Ta saá vitin xíꞌin nda̱yí Jesucristo, xáku ndáꞌví ndi̱ no̱o̱ ndóꞌó ña kasa ndivi ndó ña xíni̱ ñóꞌó xa̱ꞌa̱ ña nakutáꞌan va̱ꞌa ndó xíꞌin Ndios.

2 Corintios 5:20 交叉引用

San Lucas 14:23

Ta nda̱kuii̱n ta̱káꞌno, ni̱ka̱ꞌa̱n ra saá: “Tuku ko̱ꞌo̱n ún yichi̱ náꞌno xíꞌin yichi̱ válí kasa ndu̱xa̱ ún xíꞌin ni̱vi ná kixi ndiꞌi na, ta̱nda̱ chútú nda̱a̱ na veꞌe i̱.

Efesios 6:20

Vará nákaa̱ i̱ ini veꞌe ka̱a vitin, ta Ndios sa̱kuiso chiño ra yi̱ꞌi̱ ña ndato̱ꞌon i̱ to̱ꞌon va̱ꞌa yóꞌo xíꞌin ni̱vi. Ta xáku ndáꞌví i̱ no̱o̱ ndó ña ndukú ndó no̱o̱ Ndios xa̱ꞌa̱ i̱ ña ná taxi ra ndee̱ ña o̱n kuyi̱ꞌví i̱ ka̱ꞌa̱n i̱ xíꞌin ni̱vi xa̱ꞌa̱ Jesucristo, chi ñayóꞌo kúu chiño no̱o̱ i̱.

2 Corintios 5:11

Xa̱ꞌa̱ ña kúnda̱a̱ ini ndi̱ ndí ndiꞌi ni̱vi xíni̱ ñóꞌó taxi na ñato̱ꞌó ní ndaꞌa̱ Ndios xíꞌin ña ndinoꞌo ini na, ta mi̱i ndi̱ chíkaa̱ ndi̱ ndee̱ ña chindeé ndi̱ ni̱vi kandixa na ra. Ndios xíni̱ va̱ꞌa ra níma̱ mi̱i ndi̱, ta kóni ndi̱ ña ñii káchí ndóꞌó kunda̱a̱ va̱ꞌa ini ndó ndí ni̱vi na ndinoꞌo ini kúu ndi̱.

San Juan 20:21

Ta tuku ni̱ka̱ꞌa̱n ta̱Jesús xíꞌin na: ―¡Ná koo ñava̱ꞌa ini ndó! Nda̱tán ti̱ꞌví Yivá i̱ yi̱ꞌi̱, saá tiꞌví i̱ ndóꞌó ko̱ꞌo̱n ndó kasa ndivi ndó chiño no̱o̱ i̱.

2 Corintios 3:6

Ta xa̱ꞌa̱ ña Ndios xa ta̱xi ra ndee̱ ra xíꞌin ñandíchí ra ndaꞌa̱ ndi̱, vitin xa tiꞌva ndi̱ ña va̱ꞌa kísa chiño ndi̱ no̱o̱ ra, chi vitin kísa chiño ndi̱ nda̱tán káchí to̱ꞌon ñaxa̱á ña ki̱ndo̱o Ndios xíꞌin ni̱vi, ña káchí ndasaá kuchiño ni̱vi kutáꞌan va̱ꞌa na xíꞌin Ndios. Ta ñaxa̱á yóꞌo o̱n si̱ví nda̱yí ña ni̱ka̱ꞌyi̱ no̱o̱ yu̱u̱ xi̱na̱ꞌá kúu ña, chi nda̱yí yóꞌo káchí ña ndí ndiꞌi ni̱vi xíni̱ ñóꞌó kivi̱ na xa̱ꞌa̱ ña o̱n váꞌa ke̱ꞌé na. Ta ñaxa̱á ña ki̱ndo̱o Ndios xíꞌin ni̱vi káꞌa̱n ña ndí Níma̱ Ndios ña táku̱ ini ni̱vi na kándixa Jesucristo kúu Níma̱ ña táxi kutaku̱ ndinoꞌo na ndiꞌi saá ki̱vi̱.

San Lucas 10:16

Ta saá ni̱ka̱ꞌa̱n ka̱ ta̱Jesús xíꞌin u̱ni̱ si̱ko̱ u̱xu̱ ta̱a, káchí ra: ―Ndóꞌó kómí ndó nda̱yí i̱ ndato̱ꞌon ndó xíꞌin ni̱vi. Ta ndiꞌi ni̱vi na nakiꞌin va̱ꞌa to̱ꞌon ña káꞌa̱n ndó, to̱ꞌon yi̱ꞌi̱ kúu ña nakiꞌin na. Ndiꞌi ni̱vi na o̱n xi̱in nakiꞌin ndóꞌó, ta yi̱ꞌi̱ kúu ta̱ o̱n xi̱in na nakiꞌin na. Ta ndiꞌi na o̱n xi̱in nakiꞌin yi̱ꞌi̱, Ndios kúu ta̱ o̱n xi̱in na nakiꞌin na, chi Ndios kúu ta̱a ta̱ ti̱ꞌví yi̱ꞌi̱ va̱xi i̱ ―káchí ta̱Jesús.

1 Tesalonicenses 4:8

Ta ni̱vi na o̱n xi̱in kandixa to̱ꞌon yóꞌo, ta nayóꞌo xáa noo na ndi̱ꞌi̱, ta ñii ki̱ꞌva saá xáa noo na mi̱i Ndios, ta̱a ta̱ ta̱xi Níma̱ mi̱i ra kutaku̱ ña ini ñii ñii yó.

2 Corintios 6:1

Ta saá, xa̱ꞌa̱ ña ñii káchí ndóꞌó ta ndi̱ꞌi̱ kísa chiño yó no̱o̱ Ndios, xáku ndáꞌví ndi̱ no̱o̱ ndó ña o̱n taxi ndó ndí ña ma̱ni̱ kuu ñava̱ꞌa ke̱ꞌé Ndios xíꞌin ndó, chi xa̱ꞌa̱ ñava̱ꞌa ní ini Ndios, sa̱ka̱ku ra ndóꞌó.

Romanos 5:10

Ta ki̱vi̱ o̱n ta̱ꞌán kandixa yó Jesucristo, ta mi̱i ki̱vi̱ ña xíka ka̱ yó kísa toon yó no̱o̱ Ndios, ta Ndios ke̱ꞌé ra ñava̱ꞌa ní xíꞌin yó, chi Sa̱ꞌya ra Jesucristo ni̱xiꞌi̱ ra xa̱ꞌa̱ kua̱chi yó. Ta ña ni̱xiꞌi̱ Jesucristo kómí ña ndee̱ káꞌno, chi ta̱xi ña na̱kutáꞌan va̱ꞌa yó xíꞌin Ndios. Ta saá xa̱ꞌa̱ ña na̱taku̱ Jesucristo ta táku̱ ra ndiꞌi saá ki̱vi̱, kúnda̱a̱ ini yó ndí ndixa saka̱ku ra mi̱i yó, ta kutaku̱ yó xíꞌin ra ndiꞌi saá ki̱vi̱.

2 Corintios 12:10

Xa̱ꞌa̱ ña kíꞌvi ní ini i̱ xíni i̱ Jesucristo, ña̱kán kía̱ kúsii̱ ní ini i̱ ki̱vi̱ xíto i̱ ña káꞌa̱n ni̱vi ndiꞌi to̱ꞌon ndiva̱ꞌa xíꞌin i̱, ta kúsii̱ ní ini i̱ xa̱ꞌa̱ ña kómí i̱ kua̱ꞌa̱ ní tondíni, ta kúsii̱ ní ini i̱ ki̱vi̱ ndíko̱n ni̱vi sáxo̱ꞌvi̱ na yi̱ꞌi̱ xa̱ꞌa̱ ña kándixa i̱ Jesucristo, ta kúsii̱ ní ini i̱ xa̱ꞌa̱ ndiꞌi inka̱ tondóꞌó ña yóo no̱o̱ i̱. Saá yóo ña, chi ki̱vi̱ tá vitá ní kóni i̱, ta káꞌno ka̱ ndee̱ Ndios yóo ña xíꞌin i̱.

Colosenses 1:20

Ta xíꞌin ña ni̱xiꞌi̱ Jesucristo ta na̱taku̱ ra, Ndios ke̱ꞌé ra ndí ndiꞌi ña yóo ñoyívi yóꞌo ta ndiꞌi ña yóo ñoyívi ni̱no, va̱ꞌa na̱kutáꞌan ña xíꞌin ra. Saá chi ni̱i̱ Jesucristo ña ni̱xi̱ta̱ ndaꞌa̱ tón cruz ki̱vi̱ ni̱xiꞌi̱ ra, ta̱xi ña ndí ndiꞌi ña yóo ku̱va̱ꞌa vitin yóo va̱ꞌa ña xíꞌin Ndios.