4 Ta saá vitin, ndóꞌó ni̱vi na kándixa Jesucristo, tá yóo kua̱chi xíꞌin táꞌan ndó, ta, ¿nda̱chun táxi ndó kua̱chi yóꞌo ndaꞌa̱ najuez na kúu ni̱vi na o̱n vása kánóo va̱ꞌa to̱ꞌon xa̱ꞌa̱ no̱o̱ ndóꞌó na kándixa Jesucristo?
O̱n si̱ví chiño no̱o̱ yi̱ꞌi̱ kúu ña kasa nani i̱ xa̱ꞌa̱ kua̱chi ni̱vi na ndíko̱n yichi̱ ñoyívi yóꞌo, tá o̱n ta̱ꞌán kandixa na Jesucristo. Ta saá ni, ndóꞌó na kúu ni̱vi na xa kándixa Jesucristo, chiño no̱o̱ ndó kúu ña kasa nani ndó xa̱ꞌa̱ kua̱chi ni̱vi na nákutáꞌan xíꞌin ndó.
¿Án o̱n vása kúnda̱a̱ ini ndó ndí ñii ki̱vi̱ ña va̱xi kasa nani ndó xa̱ꞌa̱ naángel ñoyívi ni̱no? Tá kasa nani ndó xa̱ꞌa̱ naángel ki̱vi̱ saá, ta ndixa kúchiño ndó kasa nani ndó xa̱ꞌa̱ kua̱chi ni̱vi ñoyívi yóꞌo.
Káꞌa̱n i̱ saá xíꞌin ndó xa̱ꞌa̱ ña sakukaꞌan i̱ no̱o̱ ndó. ¿Án o̱n ko̱ó nda̱ ñii ndóꞌó na kándixa Jesucristo, na kómí ñandíchí si̱ni̱ ña ta̱xi Ndios ndaꞌa̱ ndó, ña kúchiño ndó kasa nani ndó xa̱ꞌa̱ kua̱chi ña yóo xíꞌin ndó?
