11 Jee nkachiꞌ re̱ꞌ nu̱u̱nꞌ ráa: ―Néni ɨɨn ránoꞌó, retú íyó lanchi‑i, jee retú ku̱te̱ꞌ ti̱ꞌ iniꞌ ɨɨn yaviꞌ ɨɨn ki̱vɨ̱ꞌ nájiáví jee, ¿á ni nsáꞌ tɨɨn‑ɨ ti̱ꞌ kɨ̱natavaꞌ‑a ti̱ꞌ rúja?
Jee suni nkachiꞌ re̱ꞌ nu̱u̱nꞌ ráa: ―¿Né ɨɨn ránoꞌó, jee retú nkininkava se̱ꞌya‑a áxí xi̱ni̱kɨ̱ꞌ‑ɨ iniꞌ ɨɨn sókó, jee á ntu natavaꞌ‑a vá ntañúꞌún kuitɨꞌ, asúnika̱ꞌ ki̱vɨ̱ꞌ nájiáví kúvi vá rúja? ―nkachiꞌ Jesús.
Jee tiempúꞌ yukuán kua̱jia̱ꞌa Jesús nteñu nu̱u̱nꞌ káá ituꞌ trigúꞌ ɨɨn ki̱vɨ̱ꞌ nájiáví, jee rá te̱e kútáꞌán jín re̱ꞌ rá súkuáꞌa re̱ꞌ ráa, jíso̱ko ráa, jee nki̱jiéꞌé ráa túꞌun ráa yoko trigúꞌ jee yájíꞌ ráa maa.
