17 ’Sáá va̱kuyatin tiempúꞌ sikúnkuvi Ndiosíꞌ tu̱ꞌun ya̱ nchi̱sóyuꞌú‑u jín ya̱ nsa̱náaꞌ‑a tu̱ꞌun nkachiꞌ‑i nu̱u̱nꞌ Abraham, jee nkenta nku̱kueꞌeꞌ víꞌí ka̱ꞌ ichiyúkúnꞌ nkene nu̱u̱nꞌ re̱ꞌ iniꞌ nación Egipto.
Ndiosíꞌ ya̱ néñu̱ꞌun rá ñɨvɨ‑ó Israel re̱ꞌ, nka̱ji re̱ꞌ rá jííꞌ yanaꞌán‑órán. Jee ɨɨn nación ñáꞌnú nsa̱ꞌá re̱ꞌ ráa, ni ya̱ kúvi ráa to̱ꞌo̱ꞌ nneeꞌ ráa nación Egipto. Jee jín máá fuersáꞌ ííꞌ re̱ꞌ ntavaꞌ re̱ꞌ ráa xi̱ntíín Egipto.
’Jee nkachiꞌ Ndiosíꞌ sukuán, ya̱ rá ichiyúkúnꞌ kene nu̱u̱nꞌ re̱ꞌ kuvi ráa to̱ꞌo̱ꞌ kuneeꞌ ráa inka nación ya̱ tátúníꞌ inka ñɨvɨ. Jee rá ñɨvɨ yukuán saꞌá ráa rává musúꞌ kéꞌen ráa. Jee saꞌá kini ráa rává ku̱mi̱ꞌ sientúꞌ (400) kui̱ya̱ꞌ.
Jee nneeꞌ rá ñɨvɨ Israel ñuꞌun Egipto. Jee yukuán nneeꞌ ráa nu̱u̱nꞌ ñuꞌun sánitɨ́ɨn Gosén. Jee yukuán nni̱ꞌi̱nꞌ ráa ñuꞌun, jee nna̱taꞌviꞌ víꞌí ráa jee nkenta ráa nnu̱kueꞌeꞌ nasɨ́kuitɨꞌ ráa.
