22 ꤍꤟꤥ ꤛꤢꤩ꤭ꤒꤢ꤬ꤟꤢꤩ꤬ ꤗꤢ꤬ ꤢ꤬ ꤘꤛꤢꤩ ꤊꤢ꤬ꤛꤢ꤭ ꤘꤣ ꤢ꤬ ꤗꤛꤢꤕꤟꤢꤨ꤭ꤗꤛꤢꤓꤛꤢꤩ꤬ ꤜꤢꤨ꤭ ꤒꤢ꤬ꤟꤢꤩ꤬ ꤒꤟꤢꤧ꤬ꤥ꤬ꤓꤝꤟꤥ꤭ꤕꤚꤟꤢꤧ꤬ ꤥ꤬ꤗꤟꤥ꤬ꤥ꤬ꤖꤝꤤ꤭꤯ ꤢ꤬ ꤔꤢꤪ꤭ ꤥ꤬ꤏꤛꤥ꤬ꤥ꤬ꤕꤚꤛꤢ꤭ ꤡꤢꤪ ꤢꤨ꤭ꤔꤟꤢꤩꤊꤜꤟꤢꤪꤏꤤ꤭ꤕꤚꤟꤢꤧ꤬꤯
ꤍꤟꤥ ꤙꤢꤪ꤭ꤙꤛꤢꤩ꤬ ꤗꤢ꤬, ꤢ꤬ꤓꤛꤢ꤭ ꤞꤛꤢꤔꤢ ꤔꤢꤧ꤯ ꤍꤟꤥ ꤞꤤꤖꤢꤧ ꤗꤢ꤬, ꤢ꤬ ꤗꤟꤢꤩ꤬ꤏꤤ꤭ꤗꤟꤢꤩ ꤢꤨ꤭ꤒꤟꤢꤧ꤬ꤏꤢꤧ꤭꤯
ꤊꤣ꤮ ꤠꤢ꤭ꤖꤢꤨ, ꤞꤛꤢꤖꤢꤨ ꤔꤟꤢꤧ꤬ ꤊꤟꤢꤦ ꤔꤢ꤬ꤘꤢꤨ꤬ꤜꤢꤧ꤭ꤓꤢꤨ꤭ ꤢ꤬ꤑꤢꤩ꤭ꤔꤌꤣ꤬, ꤔꤟꤤꤘꤢ꤭ ꤠꤢ꤭ꤍꤟꤥ, ꤡꤟꤢꤨ꤭ꤢꤩ꤬ ꤠꤢ꤭ꤜꤟꤢ꤭ ꤔꤤ꤯
ꤊꤤ꤬ ꤗꤟꤢꤩ꤬ꤖꤢꤨꤔꤌꤣ꤬ ꤟꤢꤩꤗꤢ꤬, ꤔꤟꤢꤧ꤬ꤔꤟꤢꤩꤊꤜꤟꤢꤪ ꤊꤟꤢꤦ ꤥ꤬ꤏꤛꤥ꤬ꤥ꤬ꤕꤚꤛꤢ꤭꤯ ꤔꤟꤢꤧ꤬ꤞꤢꤨ꤬ꤔꤟꤢꤧ꤬ꤞꤢꤧ ꤊꤟꤢꤦ ꤥ꤬ꤗꤟꤥ꤬ꤥ꤬ꤖꤝꤤ꤭ ꤟꤛꤢ꤭꤯
ꤠꤢ꤭ꤖꤢꤧ꤭ ꤤ꤬ꤞꤛꤥꤤ꤬ꤞꤛꤢ꤬ꤔꤟꤤ ꤠꤢ꤭ ꤔꤢ, “ꤒꤟꤥ꤭ꤗꤢ꤬ꤔꤟꤤꤜꤟꤢꤪ꤭ ꤠꤢ꤭ꤒꤟꤢꤧ꤬ꤗꤢꤩ꤬ꤊꤛꤢ꤭ꤍꤟꤥ ꤛꤢꤩ꤭ ꤔꤢ ꤔꤟꤢꤧ꤬ꤞꤢꤧꤕꤜꤢꤪ꤬ꤏꤤ꤭ꤗꤢꤩ꤭꤯ ꤡꤟꤢꤨ꤭ꤢꤩ꤬ꤔꤟꤤꤕꤜꤢꤦꤜꤟꤢꤪ꤭ ꤠꤢ꤭ꤍꤟꤥ, ꤒꤢꤦ꤮ ꤗꤢ꤬ ꤔꤟꤢꤧ꤬ ꤊꤟꤢꤦ ꤥ꤬ꤓꤝꤟꤥ꤭ꤕꤚꤟꤢꤧ꤬ ꤔꤢ꤬ꤘꤢꤨ꤬ꤜꤢꤧ꤭ꤓꤢꤨ꤭꤯
ꤊꤤ꤬ ꤗꤟꤢꤩ꤬ꤖꤢꤨꤔꤌꤣ꤬ꤚꤢꤪ, ꤢꤧ꤬ꤞꤤ꤭ ꤊꤟꤢꤦ ꤘꤛꤢꤩ ꤔꤢ꤬ꤘꤢꤨ꤬ꤜꤢꤧ꤭ꤓꤢꤨ꤭ ꤔꤟꤢꤧ꤬꤯ ꤢꤧ꤬ꤞꤤ꤭ ꤊꤟꤢꤦ ꤒꤢ꤬ꤚꤤ꤬ꤓꤛꤢ꤬ꤒꤝꤟꤥ ꤔꤟꤢꤧ꤬ ꤞꤛꤢꤔꤢ ꤔꤟꤢꤧ꤬ ꤊꤢ꤬ꤜꤟꤢ꤭ꤓꤛꤢ꤬ ꤊꤢ꤬ꤜꤟꤢ꤭ ꤔꤌꤣ꤬ꤕꤢ꤭꤯
ꤊꤢ꤬ꤛꤢ꤭ ꤘꤣ ꤢ꤬ ꤔꤟꤤꤙꤢꤧ꤬ ꤠꤢ꤭ ꤗꤟꤢꤟꤢꤪ ꤒꤟꤢꤧ꤬ꤞꤤꤖꤢꤧ ꤒꤢ꤬ꤟꤢꤩ꤬ ꤔꤌꤣ꤬, ꤢ꤬ ꤊꤟꤢꤦ ꤥ꤬ꤓꤝꤟꤥ꤭ꤕꤚꤟꤢꤧ꤬ ꤔꤢ꤬ꤘꤢꤨ꤬ꤜꤢꤧ꤭ꤓꤢꤨ꤭꤯ ꤡꤢꤪꤗꤢ꤬ꤚꤛꤢ꤬ ꤊꤟꤢꤦ ꤗꤛꤢꤘꤢꤨ꤬ ꤜꤢꤨ꤭ ꤕꤢ꤭꤯
ꤟꤢꤩꤙꤢꤧ꤬ꤗꤟꤥ꤬ꤟꤢꤩꤙꤢꤧ꤬ꤚꤛꤢ ꤍꤟꤥ ꤔꤌꤣ꤬, ꤢ꤬ꤞꤛꤢꤔꤢ ꤠꤛꤢꤓꤛꤢꤩ꤭ ꤥ꤬ ꤘꤣ ꤢ꤬ꤕꤛꤢꤩ꤬ꤊꤢꤨ꤭ ꤒꤟꤢ꤭ꤗꤢꤧ꤭꤯ ꤢ꤬ ꤘꤛꤢꤩ ꤗꤟꤥ꤬ꤞꤢꤨ꤬ꤗꤟꤥ꤬ꤞꤢꤧ ꤞꤢꤧꤕꤜꤢꤪ꤬, ꤢ꤬ ꤘꤛꤢꤩ ꤥ꤬ꤏꤛꤥ꤬ꤥ꤬ꤕꤚꤛꤢ꤭ ꤔꤟꤢꤩꤊꤜꤟꤢꤪ꤯
