2 ꤡꤟꤢꤦ ꤘꤣ ꤢ꤬ꤒꤟꤢ꤭ꤒꤟꤢꤩ꤬ ꤔꤌꤣ꤬, ꤢ꤬ ꤊꤟꤢꤦ ꤕꤣꤔꤟꤤ ꤖꤢꤨꤋꤢꤨ꤭ ꤘꤣ ꤢ꤬ ꤗꤟꤢꤩ꤬ꤒꤢ꤬ꤚꤟꤢꤧ꤭ ꤗꤟꤌꤣꤖꤢꤧ꤭꤯ ꤢ꤬ ꤊꤟꤢꤦ ꤔꤟꤤꤙꤢꤧ꤬ ꤊꤟꤌꤣ꤭ ꤢꤨ꤬ꤡꤢꤧ꤭ ꤖꤢꤨ ꤟꤤ꤬ꤖꤢꤨꤖꤛꤢ꤭ꤖꤢꤨ ꤒꤣ꤬ꤕꤚꤟꤢꤧ꤬ ꤔꤌꤣ꤬ ꤕꤢ꤭꤯
ꤖꤢꤨ ꤘꤣ ꤢ꤬ ꤒꤢ꤬ꤔꤟꤢꤩ꤬ꤡꤟꤛꤢ ꤔꤌꤣ꤬, ꤢ꤬ ꤙꤢꤩ꤬ꤕꤜꤢꤪ ꤞꤢꤪ꤬ꤞꤢꤧ꤬ꤠꤢꤧ꤬ꤖꤥ꤭ ꤙꤤ ꤕꤚꤌꤣꤋꤢꤧ꤭꤯ ꤖꤢꤨ ꤘꤣ ꤢ꤬ ꤥ꤬ꤗꤛꤢꤩ꤭ ꤙꤤ ꤢꤨ꤭ ꤢꤩ꤬ꤚꤟꤛꤢ꤬ꤋꤢꤧ꤭ ꤔꤌꤣ꤬, ꤢ꤬ ꤗꤟꤢꤩ꤬ꤒꤢ꤬ꤚꤟꤢꤧ꤭ ꤢ꤬ꤗꤟꤌꤣꤖꤢꤧ꤭꤯
ꤖꤢꤨ ꤘꤣ ꤢ꤬ ꤠꤟꤢꤧꤒꤟꤢ꤭ꤊꤛꤢ꤭ ꤢ꤬ꤗꤟꤌꤣ ꤔꤢ ꤟꤤ꤬, ꤢ꤬ ꤕꤟꤢꤦꤖꤢꤩ꤬ꤛꤢꤧꤕꤜꤢꤧꤔꤟꤤ ꤢ꤬ꤖꤢꤧ꤭ ꤒꤟꤢ꤭ꤤ꤭ꤒꤟꤢꤧ꤬ ꤔꤌꤣ꤬, ꤢ꤬ ꤗꤟꤢꤩ꤬ꤒꤢ꤬ꤚꤟꤢꤧ꤭ꤜꤟꤢꤪ꤭ ꤢ꤬ꤟꤤ꤬ꤖꤢꤨꤖꤛꤢ꤭ꤖꤢꤨ꤯
ꤋꤝꤤ ꤗꤛꤢꤘꤢꤨ꤬ꤔꤟꤤ ꤢ꤬ꤕꤚꤟꤢꤧ꤬ꤗꤟꤢꤩ꤬ꤒꤟꤢꤧ꤬ꤖꤢꤨ ꤘꤣ ꤢ꤬ ꤞꤤꤖꤢꤧ꤯ ꤢ꤬ ꤞꤢꤧꤕꤜꤢꤪ꤬ꤘꤢꤨ꤬ ꤢ꤬ꤕꤚꤟꤢꤧ꤬ꤗꤟꤢꤩ꤬ꤒꤟꤢꤧ꤬ꤖꤢꤨ ꤘꤣ ꤢ꤬ ꤗꤟꤢꤩ꤬ꤒꤢ꤬ꤚꤟꤢꤧ꤭ ꤜꤢꤨ꤭꤯
ꤖꤢꤨ ꤘꤣ ꤢ꤬ꤗꤟꤌꤣ ꤕꤜꤤꤔꤟꤤ ꤜꤢꤨ꤭, ꤢ꤬ꤖꤢꤧ꤭ ꤤ꤬ꤞꤛꤥꤚꤛꤢꤊꤟꤢ꤬ ꤔꤟꤤ ꤜꤢꤨ꤭ ꤔꤌꤣ꤬ꤗꤢ꤬, ꤢ꤬ ꤔꤟꤤꤙꤢꤧ꤬ ꤒꤟꤢꤧ꤬ꤞꤤꤖꤢꤧ꤯ ꤖꤢꤨ ꤘꤣ ꤢ꤬ꤗꤟꤌꤣꤖꤢꤧ꤭ ꤤ꤬ꤞꤛꤥ ꤔꤟꤤ ꤜꤢꤨ꤭ ꤒꤥ꤬ ꤔꤌꤣ꤬, ꤢ꤬ ꤊꤟꤢꤦ ꤗꤟꤢꤩ꤬ꤒꤢ꤬ꤚꤟꤢꤧ꤭ ꤔꤟꤤꤋꤛꤢꤩ꤭ ꤢ꤬ꤗꤟꤌꤣ ꤕꤢ꤭꤯
ꤊꤢ꤬ꤛꤢ꤭ ꤘꤣ ꤢ꤬ ꤗꤟꤢꤩ꤬ꤕꤟꤛꤢꤗꤟꤢꤩ꤬ꤏꤢꤧ꤭ ꤢ꤬ꤟꤤ꤬ꤘꤢꤪꤊꤢꤪꤊꤢꤨ꤭ ꤔꤌꤣ꤬, ꤢ꤬ ꤊꤟꤢꤦ ꤔꤟꤤꤙꤢꤧ꤬ ꤢꤨ꤬ꤡꤢꤧ꤭ ꤒꤣ꤬ꤡꤣ꤬꤮ ꤒꤥ꤬꤯ ꤊꤢ꤬ꤛꤢ꤭ꤙꤢꤪ꤭ꤙꤛꤢꤩ꤬ ꤖꤢꤨꤔꤌꤣ꤬ꤒꤢ꤬ꤟꤢꤩ꤬ ꤗꤢ꤬ ꤢ꤬ ꤊꤟꤢꤦ ꤓꤝꤟꤥ꤭ ꤊꤢ꤬ꤛꤢ꤭ꤞꤤꤖꤢꤧ ꤢ꤬ꤕꤚꤟꤢꤧ꤬ꤗꤟꤢꤩ꤬ꤒꤟꤢꤧ꤬ꤖꤢꤨ ꤕꤢ꤭꤯
ꤢꤩ꤬ ꤚꤟꤥꤜꤢꤨ꤭ ꤘꤤ꤭ ꤒꤣ꤬ꤗꤢꤦ꤭ ꤔꤢ ꤒꤟꤢꤧ꤬ꤊꤚꤟꤢꤦ꤭ꤒꤟꤢꤧ꤬ꤊꤜꤢꤧ꤭ ꤔꤌꤣ꤬ꤗꤢ꤬, ꤢ꤬ꤗꤟꤥ꤬ꤊꤜꤢꤪ꤭ ꤕꤢ꤭ꤡꤢꤪ ꤔꤢ ꤏꤢꤧ꤬ꤢꤩ꤬ꤏꤢꤧ꤬ꤥ꤭ ꤥ꤬ꤜꤣꤥ꤬ꤙꤢ꤭ ꤚꤢꤪ ꤒꤢ꤬ꤊꤚꤌꤣ꤭ꤢꤩ꤬ ꤙꤢ꤭ꤒꤢ꤬ꤕꤤ ꤚꤟꤥ ꤜꤢꤨ꤭ ꤘꤣ ꤟꤤ꤬ꤊꤢꤨ꤭ ꤒꤢ꤬ꤘꤣ꤬ꤚꤢꤪ ꤊꤜꤛꤢꤩꤋꤛꤢꤩ꤭ꤜꤢꤨ꤭ ꤔꤌꤣ꤬ ꤡꤢꤪ꤯
ꤚꤢꤦ꤭ ꤔꤢ ꤓꤢꤧ꤭ ꤗꤢ꤬, ꤢꤨ꤭ ꤙꤢꤦ꤭ꤗꤛꤢ ꤜꤢꤨ꤭ ꤔꤢ ꤗꤤ꤬꤯ ꤡꤢꤪꤗꤢ꤬ꤚꤛꤢ꤬ ꤓꤢꤦꤡꤟꤢꤩ꤬ꤗꤛꤢ ꤊꤢ꤬ꤛꤢ꤭ꤞꤢꤧꤕꤜꤢꤪ꤬꤯
