Vitendo 4:13 - Ibibiliya mu Shimakonde Imbodi Yaambi na dimbande dya Imbodi Yakala

¹³ Napanelo vakone ntima shii umwe Patulu namu Nshuwau vamanya kenga vavele vanu vákashamidye na vanu vila tu, vandíshanga namene kutwala kwanalela kenga vovo vo, vandinama namu Yesu.

Vitendo 4:13 交叉引用

I Vakolintu 1:27

Kanji Nnungu atandwelé avilá vyanéka na shilambo kuva vyaujinga pakulota kuvataa dyoni vakumanya; Nnungu atandwelé avilá vyanéka na shilambo kuva vyakudabadabanga pakulota kutaa dyoni avilá vyadimongo;

Nshuwau 7:15

Bai vayuda vandíshanga vaashidoni, “Munu aju amanyité dashi Maandiko ákapundishigwe?”

Mateu 11:25

Napanelo muwakati awo Yesu andítangola kushidoni, “Ninkukulambwalela Atata, Umu wakuwa na pai, pakuvapiyanga vinu avi vanu valimanyilo na valipundishídye kuvalodya vanu vila.

Mateu 26:73

Muwakati padyoko vanu vavéle mulyutu alyo vandímuukila ndamwaulila kushidoni, “Wako mwiu wamushipinga shosho tunkukumanyila shitangodi shako.”

Nshuwau 7:49

Bai vanu ava vákamanyite Lilamulo, vandilanika.”

Lukashi 22:8

Likawike, Yesu aníntuma Patulu namu Nshuwau aashidoni, “Wena mukapanganiange shikukulu sha Pasaka tulye.”

Mateu 26:71

Bai pashuumila pannango walugwani, ntumika junji nkongwe kumwona kutwala kuvaulila vanu vavéle apo kushidoni, “Munu aju avele pamo namu Yesu wa ku Nashaleti.”

Nshuwau 19:26

Yesu napane pangwene anyoke pamo na nkwóda wake aijá washinnagwaledya vàvele pamo, andímwaulila anyoke doni, “Mwanavo ajo apo,”

Vitendo 4:14

Kanji mwaa wakumwona munu wavamponidye vàvenavo shalumo, vanavo vandídubwala.

Vitendo 4:19

Kanji Patulu namu Nshuwau kuvajang'ula kushidoni, “Da ni shambone pamevo pake Nnungu kumwigwilila mwenu kwali kumwigwilila Nnungu? Amuwa mwemwe mmene!

Vitendo 4:29

Napanelo Umu, lola mevo mavili mitisho vyave utupe dimongo tuvatumika vako pakulota tuvalangange lilove lyako patukajugulanga shinu

Vitendo 4:31

Bai pavamalidile kushwali, palyutu lyavakadyaniénge pandíndangenda, vanavo uti kuvaumbala Imumu Wanashwe na vashindavalanganga lilove lya Nnungu pavakajugulanga shinu.

Vitendo 9:27

Napane Balinaba aníntwala kumuukanavo kwavamyombe ndavavalangangila mwashi mwangwanalele Umu niindila ya ku Damashiko na jo Umu anditangola namu nae, namomo mwashi mwavalangangidile ku Damashiko kwabila kujopa palina limwe Yesu.

Vitendo 9:28

Nadoni Saulu andílyunganianga na vakwoda na ashindapita avalanganga palina limwe Umu nkaja mu Yelusalemu pakajugulanga shinu.

I Vakolintu 14:25

shipii shamuntima mwake shindaundukuka kutwala kuunama kulipudya Nnungu aashidoni, “Mwiu, Nnungu ankupagwa pakati penu!”

II Vakolintu 3:12

Napavedoni pakuva tunkuvanavo lilindilililo ali, tunkuvanavo ntima shii.