20 Daizezeba ũrãgꞌa Moiséa diadꞌata aribꞌae nʉmʉbara beubarira miõta bedꞌea ne ẽã bꞌʉ ẽã Daizeze kĩrãbitara. Awuarabʉrʉ maʉ̃ ũrãgꞌabara kꞌawuabi bꞌʉa dazhira kꞌazhirua omiãta.
Moisé ũrãgꞌadꞌebara bedꞌea ne ẽã duane bꞌe ẽãta, Jesúsdꞌebara bedꞌea ne ẽã duaneña jõma izhidꞌebemata ĩjãbʉdara.
Mawũẽ kꞌawuaidꞌera Daizezebara dazhira bedꞌea ne ẽã obꞌʉa Jesúsdꞌebemata ĩjãbʉrʉdꞌeba, mawũã o ẽã Moisé ũrãgꞌata aribꞌae nʉmʉba.
Moisé ũrãgꞌara aribꞌaedꞌa ẽãba Daizezera kĩrũbi bꞌea. Mawũãmina maʉ̃ ũrãgꞌata ne ẽã maẽrã maʉ̃ ũrãgꞌadꞌe wãẽãnaĩ ne ẽã.
¿Kꞌãrẽneba mawũãpe? Mawũãta nʉmʉã maʉ̃ne nʉmeta Cristodꞌebemata ĩjãna ẽãba, awuarabʉrʉ kꞌãrẽ obꞌeba bedꞌea ne ẽbaidꞌe nʉmeã. Mawũã Cristodꞌebema ĩjãna ẽãba tẽnedrʉsidꞌa mongꞌarama tẽnedrʉi kĩrãkꞌa.
Moisé ũrãgꞌara nʉmʉsia kꞌawuabigaita kꞌazhiruata kꞌãbãẽã obadata. Kꞌazhiruata mawũã kꞌãbãẽã obadadꞌebara Daizezebara kꞌawuabisia izhi biaba kꞌãbãẽã sozuburia bꞌʉta.
Daizezeba naʉ̃ ẽjũãta Abrahanʉã diaya adꞌara o izhidꞌeba zedꞌairãã diaya adꞌara mawũã ẽbasia ũrãgꞌata aribꞌaebʉrʉba, awuarabʉrʉ mawũãsia bedꞌea ne ẽã bꞌidꞌapʉba izha jarabʉrʉta ĩjãbʉrʉdꞌeba.
Naara Moisé ũrãgꞌa ne ẽbasidꞌeuba kꞌazhiruara obꞌea ẽjũãnerã, mawũãmina ũrãgꞌata ne ẽãba bedꞌea bara bꞌea a ẽbasia kꞌazhiruata obꞌera.
Moisé ũrãgꞌa bari ũrĩ bꞌeba biata duanu ẽã Daizeze kĩrãbitara, awuarabʉrʉ maʉ̃ ũrãgꞌa aribꞌae bꞌeta izhima biata bꞌea.
Kꞌazhiruabara Moisé ũrãgꞌaba jara bꞌʉra obi ẽãba mʉrã sewasia, aramaʉ̃ne mʉrã aduabiita beai basia.
