29 Mawũã bedꞌeasia Jesúsbara jaira ãĩ wãmarẽã jara kꞌobꞌʉba maʉ̃nebara, ewari dããrã basia jaibara zuburia erunʉmʉta. Izhira cadenaba jʉ̃ bazhidꞌa jẽrũta juwuata, mawũãmina cadena tʉdꞌʉzoabipe jaibara wãbi bꞌasia drua drudrua tabꞌeidꞌu.
Kũrãta urudꞌera jaibara bꞌaebipe abꞌaedꞌa wawabisia. Mawũãmina Jesúsbara jaira kẽãsia, aramaʉ̃ne kũrã bꞌebipe diasia zhi zezea.
Jaiba jidabʉrʉdꞌera kꞌawua ẽãne jʉrabibaria, abꞌaedꞌa wawabibaria, mobe ibꞌa kꞌopepea zebibaria, aramaʉ̃ne puo bꞌʉra kenabꞌari ẽã.
Izhi mawũã bedꞌeaira Jesúsbara mawũãsia: Kꞌãʉ̃nebara ãĩ wãrũã jai.
Jesústa ũdui kꞌãbãẽã bꞌiasia, mobe Jesús jẽrũ kꞌaita ju kꞌobꞌepe nemi jĩgua mawũãsia: ¿Bʉra mʉ ũme kꞌãrẽta sãwũã bꞌʉ Jesús Daizeze Ʉ̃trebema Warra? Mʉ biata odua mʉta zuburia orãrũã.
Jesúsbara widꞌi mawũãsia: ¿Bʉ trʉ̃rã kꞌaipe? Mawũãĩ jaibara mawũãsia: Mʉ trʉ̃rã Kꞌabana. Mawũãsia jaira bio edꞌa wãnape bꞌeba maʉ̃ne edꞌa.
