21 Pedroba maʉ̃ta ũdui Jesúa mawũãsia: Nokꞌó, ¿naʉ̃ sãwũã berabꞌariipe?
Pedroba jẽrũya akʉbʉrʉdꞌera ũdusia kꞌaidꞌu taita Jesúsba jʉrʉdꞌa Jesúsba kʉãgꞌata, nekꞌo duanune maʉ̃ abꞌaʉta Jesús kꞌaita kꞌobꞌadꞌa basia, mawũã kꞌobꞌasidꞌera mawũãsia: Nokꞌó, ¿bʉra kꞌaiba chãbꞌariipe?
Mawũãĩ Jesúsbara mawũãsia: Naʉ̃ mʉ zeyeedꞌa bꞌaita mʉã krĩñabʉrʉ, ¿bʉa sãwũãĩpe? Bʉra mʉta pẽwã bꞌadua.
