3 Faraónẽ kushipa iruti mã benabiai ka iruti hayamakẽ hawẽ taea mã dake bestishãkanaii. Hawẽ hanu irui utati mã benabiai ka matu ashuãmawẽ taea mã babukirãshanaii.
Haska inũ, Deusũ hãtxa yuishunika Isaísĩ kenekĩ: “Tsuabũra Messiasĩ hãtxa ikũwãkĩ txibaĩbu ẽ hatu hawa dake wama ishanaii”, aniwẽ taeshũ
Haska nũ manakatiru Deus nukuwẽ nuimis nuku unãmakĩ hawẽ Yushĩ Pepa nuku inã hawẽ taeshũ Deus ikũwãkĩ txibãkubaĩkĩ haska nuku yubani manai hamẽ nũ manakamaki. Haska xarabuwẽ taeshũ hamapai bika nũ teneairã, hawẽ taeshũ Deus nũ kẽwãkubainaii.
Egito nawabũ mia merabewashanai mĩ shinaĩ ẽ unaiĩ. Hakia haburã, hatũ shanẽ ibube hawa kushipa hayabumaki, mã dasibi haki txiti ipanãbunã. Dasibibũ hawẽ hãtxa nĩkakĩ ikũwaĩbu, Egito nawa shanẽ ibu Faraó babukĩ tsua merabewatirumaki.
Haskai hawaira mã merabenãti betsa benamisbumẽ? Ha Assíria nawabũ matu ana merabewatiruma babushinabũ haska hau Egito nawabũ matu merabewanũbũ mã benaiburã, baburiashãkanikiki.
