29 Jesus itani̱stsiiwaiksi, “Kita̱i̱sstakkoaawa A̱ʼpistotookiwa ka̱a̱hkomaiʼtookssoaayi niisto̱yi oto̱ʼtsskoaayi.”
Kana̱o̱maiʼtoyiiksi ohko̱yi a̱kaohkota̱yaawa a̱i̱sksipaitapiʼssini. Ki omi̱i̱ksi ka̱taaʼnistaiʼtoyiiksi ohko̱yi ma̱tohkotawaiksi amoohka niipa̱i̱tapiʼssinihka. A̱ʼpistotookiwa i̱i̱kaohtokakihtsimatsiiwaiksi opahtsa̱ʼpssoaawaistsi.
Ki̱niitaʼpiyikokakio̱paatoohpoaawa omiistsi nato̱i̱si̱naakssiistsi. Kanistsi̱ksimsstaahpoaawa kita̱kohtohkooʼtsiihpoaawa a̱i̱ssksipaitapiiʼssini. Ami̱i̱stsi nato̱isi̱naakssistsi iihta̱o̱kamoʼtsiʼpoyiiyaa niisto̱yi.
Sota̱maniiyaawa omi̱i̱ksi mata̱piiksi, “A̱ʼpistotookiwa tsa̱a o̱i̱sstaawa na̱a̱hkanistaʼpoʼtomoahsinnaani?”
Takaa no̱mohtoʼtoohpi isspo̱o̱htsi na̱a̱hkanisttotsissii annaahka nito̱ʼtsskookahka A̱ʼpistotookiwahka otsitsi̱i̱ihtaanistsi. Nima̱tohtoʼtoo na̱a̱hkanisttotsissii niisto̱wa nita̱wattsitsiihtaanistsi.
Annaahka Ni̱nnahk A̱ʼpistotookiwahka nito̱ʼtsskookahka a̱i̱ssksipaitapiiwa kii no̱mohtsiistapipaitapiiyi ota̱i̱ssksipaitapiʼssini. O̱ki. Niʼto̱i niitsiiwa iihka̱nohta̱ooyiiksi niisto̱yi. A̱kohtsistapipaitapiiyaawa nitsipa̱i̱tapiʼssini.
