John 12:17 - Annaahk John Manistsitsinikatahpi Jesus Manistsipaitapiihpiai 1979

¹⁷ Kii, ki omi̱i̱ksi mata̱piiksi itsino̱yiiksi Jesus ota̱i̱ʼnihkatahsi Lazarus, ota̱i̱ssksipoa̱aa̱ttsaahsi sota̱momatapohta̱o̱kamoʼtaniiyaawa otsini̱i̱hpoaawa yi.

John 12:17 交叉引用

John 19:35

(O̱ki. Oma̱a na̱i̱nima a̱a̱mohka a̱i̱tsinikatoma ka̱a̱hkohtsitomaiʼtakssoayi a̱nnaka a̱o̱kstoomaka. A̱a̱mohka ota̱a̱niihpi i̱i̱manaʼsiwa. Issksinima oto̱manaʼssi.)

John 12:9

O̱ki. Omiiksi isska̱i̱ʼtapiiyi Jews itohtsi̱matsiiwa Jesus otsi̱taʼpaitapiiʼssayi omiim Bethany. Ki sota̱mitapo̱o̱yaawa. Noohka̱ttsiksimsstayaawa ma̱a̱hkoohkattsinoahsaawa anniiska Lazarus, anniiska na̱i̱ssksipoa̱aa̱ttsaayiska. Ki a̱nnihkayi iihtsita̱pooyaawa. Ma̱tsiʼtsitaotoissammiiwaiksaawa ami̱i Jesus.

John 21:24

O̱ki. Omi̱i̱ska oma̱a Jesus o̱mohta̱i̱ʼpoyiihpiska oma̱nikapiimiska, a̱nniskaoʼkinai a̱i̱tsinikatominayi a̱mostska. A̱nnoohk a̱a̱maoʼka anniihka ota̱i̱tsinikatoohpi. Issksini̱i̱hpa oto̱manaʼssi a̱a̱mostsi osi̱naakssistsi.

John 11:42

Nisto̱wa ni̱tssksiniihpa kita̱i̱ssksayisstsiwokssi. A̱a̱mohka ko̱mohtanisto a̱a̱moksi na̱o̱ʼtsipoyiiksi mata̱piiksi ma̱a̱hkitoohtsissaawa, ma̱a̱hkohtsitomatapomaiʼtsissaawa kiisto̱wa kito̱ʼtsskokssi.”

John 11:31

O̱ki. Omi̱i̱ksi isto̱ʼtotamaʼpssiiksi Jews itohpo̱ksi̱pstaopiimiiyaawa omi̱i Mary omii na̱apiooyisi. A̱wa̱a̱piiwanistotoyiiyaawayi. Na̱i̱noyiiyaawayi otsi̱kkamipoomatapoohsayi, i̱sakssayi. Ki sota̱mohpoʼkiomatapooyaawa. Niitsiksi̱msstatsiiyaawa Mary a̱a̱hkayaakitapoowa omiim Lazarus itsstsa̱a̱hpi ma̱a̱hkito̱yimmahsayi.

John 1:32

O̱ki. Oma̱a John, ma̱ttsiʼpoatomoyiiwa Jesus, moka̱moʼtsi̱ʼpoyiiwa. Itani̱i̱wa “Nitaanikka A̱ʼpistotookiwa na̱a̱hkohtawaatoaʼpistakssi aohki̱i̱yi. Nima̱ttanikka naanista̱akoonoahpi annaahka no̱mohta̱i̱kayissiʼpoyiihpahka. A̱a̱niiwa, ‘A̱kitsstsiihpa natowo̱ttaka ota̱yakita̱psainniso̱o̱hpi ni̱naayi. A̱a̱mohka aiʼnimi̱niki, aaʼnistsi̱i̱si kita̱kstamssksiniihpa a̱nnaoʼka annaahka ni̱naawahka. A̱nnahkaoʼka annaahka a̱kohtawa̱a̱toaʼpistotakiwahka Natowo̱ttaki. Anniihka nima̱tssksiniihpa oto̱mssi Jesus. Ki a̱nnohka nita̱i̱ʼnoawa Natowo̱ttaka otsi̱tapssainnisoohsi Jesusi. Ika̱nistsinamma a̱nni kakko̱i̱. Iihto̱ʼtsainnisoowa ispo̱o̱htsi ma̱a̱hkito̱manistohpokaʼpaissiimahsi Jesus. A̱nnohka a̱a̱mohka nitsini̱ssi a̱nnihkayii ko̱mohtanistohpoaawa Jesus a̱nniskaoʼkinai Aʼpistotookiwa ohkoyi.’ A̱nniayii niito̱manistooma John mani̱stssksinoahpi Jesus.”

John 1:19

O̱ki. A̱a̱moksayi mata̱piiksi iihto̱ʼto̱oyaawa Jerusalem. Itsita̱pooyaawa John. Anni̱i̱ksi anista̱pssiiyi naato̱yaapiikoani ki anni̱i̱ksi anista̱pssiiyi omi̱i̱ksiska a̱o̱toiʼtsikatoomikska o̱mahkitawaatsi̱moihkaaoʼpi. Omi̱i̱ksi isto̱ʼtotamaʼpssiiksi Jews ita̱psskoyiiyaawa amokska mata̱piikska John ma̱a̱hksopoahtsiisatahsaawayi tsika̱a̱hta osto̱yi.