42 Ki a̱nniayi itsita̱kaitapiiyi itoma̱tapomaiʼtakiiksi.
Kii mattsita̱kaitapiiyi omi̱i̱ksi i ima̱i̱ʼtoyiiksi Jesus. Ami̱i̱stsi otani̱ssistsi iihtsito̱matapomaiʼtakiiyaawa.
O̱ki. Ki a̱nnihkayii isskohta̱a̱kaitapiiyi omi̱i̱ksi oʼtota̱maʼpssiiksi na̱o̱maiʼtoyiiksi Jesus. Kii sota̱msstonnoyiiyaawa omiiksi Pharisees. Ki a̱nnihkayii iihtsawa̱i̱sska̱akaniiyaawa ota̱o̱maiʼtakssaawa. Ma̱taissta̱a̱waiksaawa a̱a̱hkohtsaisskoahsaawa otsi̱tawaatsi̱moihkaahpoaayi.
O̱ki. Omi̱i̱ksi isto̱ʼtotamaʼpssiiksi Jews na̱o̱tooksisawaatsiiksi omi̱i Mary na̱i̱nimiaawa Jesus ota̱nisttsiihpi. Itsi̱tsspiakaitapiiyi iimata̱pomaiʼtoyiiksi Jesus.
O̱ki. A̱a̱mostska oma̱a Jesus ota̱i̱ʼksistanistoohsaistsi, itaka̱i̱tapiiyi o̱mohtomatapomaiʼtookiksi.
Sota̱mitakaitapiiyi iima̱i̱ʼtoyiiksi Jesus. A̱a̱niiyaawa otsska̱akaohsi otsipisata̱i̱stamatstohkssiistsi; a̱kohkottohtoʼtssksiniihpa ota̱mssayi A̱ʼpistotookiwa anniiska ota̱kohkoikiihpiska.
O̱ki. Kii omi̱i̱ksi istsitapi̱i̱ksi Samaria a̱nni aka̱i̱tapisskoyii ita̱o̱piiksi, itaka̱i̱tapiiyi iima̱i̱ʼtoyiiksi Jesus. Iihtoma̱i̱ʼtakiiyaawa omi̱i aaki̱i̱yi ota̱nissayi “Nita̱nikka ni̱tohkanawanisttsissiistsi.”
O̱ki. Ki anni̱stska o̱mahksiksistsikoistska a̱i̱kayistapawaakaitapiiyi iima̱i̱ʼtoyiiksi Jesus. A̱nnihkayii otsi̱tsitaʼpaitapiihpihka Jerusalem. Iihtoma̱i̱ʼtakiiyaawa ota̱i̱ʼnissaawa opisa̱taistamaatstohkssiistsi.
