John 10:36 - Annaahk John Manistsitsinikatahpi Jesus Manistsipaitapiihpiai 1979

³⁶ Ki a̱a̱mohka kita̱kohkottohtoʼtssksiniihpoaawa ma̱tokaʼpiiwa ta̱a̱niihpi, takaa niisto̱akaoʼka o̱tssikahksipoʼtoayi ni̱nna A̱ʼpistotookiwa. Nitsi̱toʼtsskooka anno̱o ksa̱a̱hkommi. Kita̱kohkottsawaaniihpoaawa iiko̱kaʼpiiwa tani̱stohtaiʼpoyiihpi A̱ʼpistotooki aniihka nita̱a̱niihpihka nisto̱wa a̱nniskaoʼkinai A̱ʼpistotookiwa ohko̱yi.

John 10:36 交叉引用

John 3:17

A̱ʼpistotookiwa na̱o̱ʼtsskoyiwa ohko̱yi anno̱o ksa̱a̱hkomma. Ma̱tohtoʼtsskoyiiwaatsiksi ma̱ahkohtsitokakihtsimatahsi o̱tapiʼsini otoka̱ʼpipaitapiʼssoaawaistsi. Iihto̱ʼtsskoyiiwayi ma̱a̱hkohtohkoyikissayi ma̱a̱hkohtsikamotsi̱i̱piaahsi o̱tapiʼsini.

John 20:31

Amo̱stsi itssi̱naihpistsi atsini̱kssiistsi, iihtssi̱naiʼpiaawa kiisṯowaawayi a̱nnaka a̱o̱kstakiwaka, ka̱a̱hkohtsitomaiʼtoahsoayi Jesus a̱nniskaoʼkinayi anna̱a̱hka A̱ʼpistotookiwa anniiska o̱mohtohkoikiihpiska, ki a̱nniskaoʼkinai annaahka A̱ʼpistotookiwa anniisk ohko̱yiska. Ikkamo̱maiʼtakiinoainiki Jesus ki̱tohkokkoaawa kaahkaissksipaitapiiʼssoaayi.

John 6:27

Ko̱mohtaiyikaʼkimaahpoaawa ka̱a̱hkattohko̱yissoaayi. Anni̱i̱hka aa̱oahsinihka amohka kita̱i̱ksimsstatoohpoaayihka ma̱taksisamaisstsiiwaatsi. Ki itsstsi̱i̱hpa a̱ka̱i̱ssksitaisstsiʼpa. Itoto̱i̱sapiwa a̱nni aa̱owahsi. A̱kohtoʼtaissksipaitapiioʼpa. A̱nnihkayi kita̱kohkottohtsiiyikaʼkimaahpoaawa. Ni̱i̱stoakaoʼka annaahka Mata̱piiwahka. Kita̱kohkottohkotohpoaawa amoohka a̱kohtoʼtaissksipaitapiioʼpihka. Ki ni̱nna A̱ʼpistotookiwa kika̱waistamatsookoaawa nita̱ʼpaoʼtomoahsi.”

John 20:28

Sota̱maniiwa Thomas, “Kiisto̱wa kitsi̱naaimato. Kiisto̱wa a̱nnahkaoʼka nanista̱i̱nihkatawahka A̱ʼpistotooki.”

John 19:7

Oso̱tamanikka omi̱i̱ksi Jews, “Kii niisto̱nnaana nitoka̱kihtsimannaani a̱naʼsiwa a̱nniai anista̱pitapiiyi a̱a̱hksiʼnitahsi, takaa a̱a̱niiwa otohkoyi̱mmi̱yissi A̱ʼpistotookiiyi.”

John 17:21

A̱yo ni̱nna. Ni̱tohkanawaatsi̱moihkaahtamoayaawa ma̱a̱hkohkanawanistapssaawa a̱nni niʼtsita̱piiyi, niʼto̱i nani̱stohpipaitapiiyihpi kiisto̱wa, kani̱stohpipaitapiiyihpi niisto̱wa ma̱a̱hkoohkattohpipaitapiiʼssaawa kiisto̱nnooni. Ki a̱nnihkayii ka̱taʼyaomaiʼtakiiksi a̱kohtsitomaiʼtsimiaawa kiisto a̱nnayii kito̱ʼtsskookssi.

John 17:18

Kansitsi̱poohsapsskookihpi anno̱o ksa̱a̱hkommi, niiʼto̱i̱ nanistsi̱tsspisskoaayaawa ksa̱a̱hkommi.

John 17:8

Ki̱tohkokkihpi issksksi̱moʼtaani, nitsi̱i̱stapohkotayaawayi, ki sota̱moʼtsimiaawa. Sota̱mitsiitaʼpssksinimiaawa no̱mohtoʼtoohsi kiisto̱i. Ki sota̱momaiʼtsimiaawa kito̱ʼtsskookssi.

John 6:69

Ki niisto̱nnaana annoohka nika̱o̱maiʼtakihpinnaan ki ki̱tssksinoohpinnaan kiisto̱wa a̱nniskaoʼkinai A̱ʼpistotookiwa anniska o̱mohtakohkoikiihpiska ma̱a̱hksikamoti̱i̱piokssi.”

John 6:57

Annaahka Ni̱nnahk A̱ʼpistotookiwahka nito̱ʼtsskookahka a̱i̱ssksipaitapiiwa kii no̱mohtsiistapipaitapiiyi ota̱i̱ssksipaitapiʼssini. O̱ki. Niʼto̱i niitsiiwa iihka̱nohta̱ooyiiksi niisto̱yi. A̱kohtsistapipaitapiiyaawa nitsipa̱i̱tapiʼssini.

John 6:38

Takaa no̱mohtoʼtoohpi isspo̱o̱htsi na̱a̱hkanisttotsissii annaahka nito̱ʼtsskookahka A̱ʼpistotookiwahka otsitsi̱i̱ihtaanistsi. Nima̱tohtoʼtoo na̱a̱hkanisttotsissii niisto̱wa nita̱wattsitsiihtaanistsi.

John 5:30

Niisto̱wa ma̱tsitsstsiihpa nita̱kohkottawattanisttsiihpi; nanisto̱o̱htoahpi A̱ʼpistotookiwa ki a̱nniayii ta̱kanistokakihtsimaa. Nima̱taʼpaisskiihpa na̱a̱hkanisttotsissii nita̱wattsitsiihtaanistsi. Otsitsi̱i̱htaanistsi annaahka nito̱ʼtsskookahka, a̱nnistskayii nita̱wanisttotsiihpi. A̱nnihkayii kita̱kohtoʼtssksiniihpoaawa nita̱o̱kamoʼtokakihtsimaahsi.

John 3:34

A̱ʼpistotookiwa anniiska oto̱ʼtsskoayiska, Jesusiska a̱i̱ʼpoatoominayi otsi̱ʼpoahsistsi annaahka A̱ʼpistotookiwahka. A̱ʼpistotookiwa ma̱tohkoissikihtsiiwa mani̱stohkotahpi Jesusi Natowo̱ttaki. Ki a̱nnihkayii Jesus iihtohko̱ttsiʼpoatoomi A̱ʼpistotokiiyi otsi̱ʼpoahsists.

John 8:42

Jesus sota̱maniiwa, “Kita̱o̱nimmawawahtopi A̱ʼpistotookiwa kita̱kakomimmokihpoaawa. A̱ʼpistotookiwa a̱nnahkaoʼka no̱mohtoʼtoo. Ki a̱nnohkai a̱nnoma tsi̱taʼpaitapiiyi. Nima̱tawattsitoʼtoohpa. Osto̱yi nito̱ʼtsskooka.