መጽሐፈ ሲራክ 1 - መጽሐፍ ቅዱስ - (ካቶሊካዊ እትም - ኤማሁስ)

የምሳሌዎች መድብል የጥበብ ምንጭ

¹ የጥበብ ሁሉ መገኛዋ ከጌታ ዘንድ ነው፥ ለዘለዓለምም ከእርሱ ጋር ናት።

² የባሕርን አሸዋ፥ የዝናምን ጠብታዎች፥ የዘለዓለምን ቀኖች፥ ማን ቆጥሮ ይዘልቃቸዋል?

³ የሰማይን ምጥቀት፥ የምድርን ስፋት፥ የውቅያኖስን ጥልቀት፥ ማን መርምሮ አወቃቸው?

⁴ ከፍጡሮች ሁሉ በፊት ጥበብ ተፈጠረች፤

⁵ ብሩህ ማስተዋል ከጥንት አንሥቶ ነበረች።

⁶ የጥበብ ሥርዋ ለማን ተገለጠ?

⁷ የጥበብንስ ዘዴና መንገድ ማን አወቃቸው?

⁸ ጥበበኛ አንድ ብቻ ነው፥ እርሱም እጅግ ያስፈራል፤ በዙፋኑም ላይ ጸንቶ ይኖራል።

⁹ ጥበብን የፈጠራት ጌታ ራሱ ነው፤ ያያትና የመዘናትም እርሱ ነው፤ በሁሉም ሥራዎቹም ላይ አፈሰሳት።

¹⁰ ለሁሉም ሕያው ፍጡር እርሱ እንደወደደው እሱን ለሚወድት ሰዎች ደግሞ እሷን አብዝቶ ሰጣቸው።

እግዚአብሔርን መፍራት

¹¹ ጌታን መፍራት ክብርና ኩራት ነው፤ ደስታና የሐሴት አክሊል ነው፤

¹² ጌታን መፍራት ልብን ደስ ያሰኛል፤ ሐሴትንም ይሰጣል። ደስታንና ረጅም ሕይወትንም ይሰጣል።

¹³ ጌታን የሚፈራ ሰው መጨረሻው ያምራል፤ በዕለተ ሞቱም ይባረካል።

¹⁴ የጥበብ መጀመሪያዋ ጌታን መፍራት ነው፤ ለታማኞች በእናታቸው ማሕፀን ከነሱ ጋር ተፈጥራለች።

¹⁵ በሰው ዘር ውስጥ ቤቷን መሥርታለች፤ የዘለዓለም መሠረትም ጥላለች፤ ከልጆቻቸው ጋር ታማኝ ሆና ትኖራለች፤

¹⁶ የጥበብ ምልአት ጌታን መፍራት ነው፤ በፍሬዎችዋ ሰዎችን ታረካቸዋለች፤

¹⁷ ቤቶቻቸውንም በሀብት ትሞላለች፤ ጐተራዎቻቸውንም በምርቶችዋ ትሞላላቸዋለች፤

¹⁸ የጥበብ አክሊልዋ ጌታን መፍራት ነው፤ እርሷም ሰላምና ጤና እንዲያብቡ ታደርጋለች።

¹⁹ እግዚአብሔር አይቷታል፥ መዝኗታል፤ እውቀትንና ማስተዋልን አዝንሟል፤ የሚያጸኗትንም ሰዎች ክብር ከፍ አደረገው።

²⁰ የጥበብ ሥሩ ጌታን መፍራት ነው፤ ቅርንጫፎችዋም ረጅም ሕይወት ናቸው።

²¹ እግዚአብሔርን መፍራት ኃጢአትን ያስወግዳል፤ በውስጡ ያደረበትም ቁጣን ሁሉ ያጠፋል።

ትዕግሥትና ራስን መግዛት

²² የኃጢአተኛው ቁጣ ሊያጸድቀው አይችልም፤ የቁጣውም ክብደት ውደቀቱ ነውና።

²³ ትዕግሥተኛ ሰው ትክክለኛው ጊዜ እስኪደርስ ሁሉንም ይችላል፤ በስተመጨረሻ ግን ደስታን ያገኛል።

²⁴ እስከ ጊዜው ሐሳቦቹን ይዞ ይቆያል። ሕዝቡም ዓዋቂነቱን ይናገርለታል።

ጥበብና ትክክለኛነት

²⁵ በጥበብ መዝገቦች መካከል የዕውቀት ምሳሌዎች አሉ፤ ነገር ግን መንፈሳዊነት ለኃጢአተኛ የተናቀና የተጠላ ነው።

²⁶ ጥበብን ከፈለግህ ትእዛዛትን ጠብቅ፤ ጌታም የፈለግኸውን ይሰጥሃል።

²⁷ ጌታን መፍራት ጥበብና ትምህርት ነው፤ ታማኝነትና ደግነት እግዚአብሔርን ደስ የሚያሰኝ ነው።

²⁸ ጌታን ከመፍራት ውጭ አትሁን፤ ሁለትም ልብ ይዘህ ወደ እርሱ አትቅረብ፤

²⁹ በሰዎች ፊት ጋባዥ አትሁን፤ ከንፈሮችህን ጠብቅ።

³⁰ እንዳትወድቅና በራስህ ላይ ውርደትን እንዳታመጣ ራስህን ከፍ ከፍ አታድርግ። ልብህ በተንኮል በመሞላቱና ጌታን ባለመፍራትህ እርሱ ምሥጢርህን ይገልጥብሃል፤ በሕዝቡም መሀል ያዋርድሀል።