2ኛ መጽሐፈ መቃብያን 6 - መጽሐፍ ቅዱስ - (ካቶሊካዊ እትም - ኤማሁስ)

የአሕዛብን አምልኮ በግዳጅ ማስፈን

¹ ከጥቂት ጊዜ በኋላ ንጉሡ አይሁዳውያን ከአባቶቻቸው ሕግ እንዲርቁና ሕይወታቸውንም በእግዚአብሔር ሕግ መምራቱን እንዲያቋርጡ ለማድረግ ጀሮንቲስን የተባለውን አንድ አቴናዊ ላከባቸው፤

² የኢየሩሳሌምን ቤተ መቅደስ ለማርከስና የኦሎምፖያው ዜኦስ እንዲከብር ለማድረግ በጌሪዝም ተራራ ላይ የዜኦስ የእንግዶች ጠባቂ መታሰቢያ ለማቆም አቴናውያን በጠየቁት መሠረት ወሰነ።

³ የእዚህ እርኩስ ተግባር መታየት ሕዝቡ ሊሸከመው ከማለው በላይ ስቃይን አስከተለ።

⁴ ቤተ መቅደሱ ቅጥ ባጣ ደስታና በጭፈራ ተሞላ፤ አረማውያን ከሴቶች ጋር የሚዳሩበትም ቦታ ሆነ። የተከለከለ ነገርም ይፈጽሙ ነበር።

⁵ መሠዊያውም በሕግ በተከለከሉና በረከሱ መሥዋዕቶች ተሞልቶ ነበር፤

⁶ ሰንበትን ማክበር አልተፈቀደም ነበር፤ ሃይማኖታዊ በዓላትን ማሰብ፥ ሌላው ቀርቶ አይሁድ ነኝ ብሎ መናገርም አይፈቀድም ነበር።

⁷ በንጉሡ የልደት በዓል ቀን በየወሩ እየሄዱ መብላት የማይታለፍ ግዴታ ነበር፤ የዲዮንስዩስ በዓል በሆነ ጊዜ በራስ ላይ የቅጠል ጉንጉን ደፍቶ የዲዩንስዩስን ሰልፍ መከተል ግዴታ ነበር።

⁸ በጰጠሎማይዳ ሰዎች ምክር በአረማውየን (ግሪካውያን) ከተሞች አጠገብ የሚገኙ አይሁዳውያን እንደ አረማውያን እንዲያደርጉ አዋጅ ወጣ፤ አይሁዳውያንም ለመሥዋዕት የቀረበውን ምግብ እንዲበሉ ተገደዱ፤

⁹ የግሪካውያንን ልምድ የማይከተሉ እንዲገደሉ ትእዛዝ ተሰጠ። በዚያን ጊዜ እንግዲህ ታላቅ ችግር የሚመጣ መሆኑ ታወቀ።

¹⁰ ሁለት ሴቶች ልጆቻቸውን ስላስገረዙ በፍርድ ፊት አቀረቧቸው፤ በሰው ሁሉ ፊት ልጆቻቸውን እንደታቀፉ ከተማውን እንዲዞሩ ተደረጉ፤ ከዚህም በኋላ በግንቡ ላይ ወርውረው ጣሏቸው።

¹¹ ሌሎች በድብቅ የሰንበትን በዓል ለማክበር በአቅራቢያው ወደሚገኙት ዋሻዎች አብረው ሄዱ። በፊሊጶስ ፊት ተከሰው በእሳት አቃጠሏቸው፤ ለቀኑ ክብር ካላቸው የእምነት ጽናት የተነሣ በእሳት ተቃጥለው ሞቱ።

በድኀንነት ጐዳና የስደት አስፈላጊነት

¹² ይህን መጽሐፍ የሚያነቡ ሰዎች በእነዚህ መከራዎች ምክንያት ተስፋ እንዳይቆርጡ አደራ እላለሁ፤ ይህ ስደት ለሕዝባችን ተግሣጽ፤ ትምህርት እንጂ ጥፋት አለመሆኑን እንዲገነዘቡ እለምናለሁ።

¹³ ክፉ ሰዎች በክፋታቸው ረጅም ጊዜ ባለመቆየታቸው፥ ቅጣታቸውም ቶሎ የሚደርስባቸው በመሆኑ የእግዚአብሔር ታላቅ ደግነት ምልክት ነው።

¹⁴ ልዑል አምላክ ሌሎችን ሕዝቦች ለመቅጣት የክፋታቸው ጽዋ እስኪሞላ ድረስ በምሕረቱ ታግሦ ይጠብቃቸዋል። ግን ከእኛ ጋር የሚያደርገው እንዲህ አይደለም፤

¹⁵ እኛን የሚቀጣን ኃጢአታችን እስከ መጨረሻ ሳይሞላ ነው።

¹⁶ ስለዚህ ምሕረቱን ከቶ ከእኛ አያርቅም፤ መከራ አውርዶብን ቢገሥጸንም እኛን ሕዝቡን አይጥለንም።

¹⁷ ይህን ማስታወስ ይበቃል፤ ከእዚህ በኋላ ወደ ነገራችን እንመለስ።

የአልዓዛር ሰማዕትነት

¹⁸ የሕግ ሊቃውንት ከነበሩት አንዱ የሆነውንና በዕድሜ የገፋ በሁሉም ዘንድ የተከበረ አልዓዛር የተባለውን ሰው አፍ በግድ ከፈተው የዓሣማ ሥጋ እንዲበላ አስገደዱት።

¹⁹ እርሱ ግን ከወራዳ ሕይወት የክብረ ሞት ይሻለኛል ብሎ

²⁰ ያልተፈቀደ ነገርን መቅመስ እንደሚቃወሙ ሰዎች ሁሉ በአፉ ውስጥ የገባውን ቁራጭ ሥጋ በመትፋት ከሕይወት ይልቅ ሞትን መረጠ። በገዛ ፈቃዱ ወደሚያሠቃዩበት ቦታ ሄደ።

²¹ በበዓሉ ላይ የነበሩ ሰዎች ከብዙ ጊዜ ጀምሮ አልዓዛርን ያውቁት ስለ ነበር ገለል አደረጉትና ለመኑት፤ እርሱ መብላት የሚችለውን ሥጋ ከገዛ ቤቱ እንዲያስመጣና በንጉሡ እንደ በላ የታዘዘውን ሥጋ አሥመስሎ እንዲበላ መከሩት፤

²² እንዲህ በማድረግ ከሞት ስለሚድን በቀድሞ ፍቅራቸው ምክንያት ይህን መከሩት።

²³ እርሱ ግን ለዕድሜው የተስማማ የክብር ሥራ ለመሥራት ፈልጐ ከልጅነቱ ጀምሮ ሳያወላውል የኖረ፤ ይልቁንም በተቀደሰው የእግዚአብሔር ሕግ የጸና፤ በተከበረ ሸምግልናውና ሽበቱ ሥልጣን ያለው መሆኑን አውቆ ሳትዘገዩ ግደሉኝ ሲል መልስ ሰጠ፤

²⁴ እንዲህም አለ፥ “በእኛ ዕድሜ በማስመሰል መሥራት አይገባም፤ አለበለዚያ ወጣቶች ለዚች ዕድሜው ሲል አልዓዛር በዘጠና ዓመት ዕድሜው የሌሎችን አገሮች ሕይወት ተከተለ ብለው ያምናሉ፤

²⁵ ታዲያ እነርሱም ለብዙ ጊዜ በማይጠቅመኝ በዚህ ወራዳ ድርጊት የተነሣ አኔን በመመልከት ከሚከተሉት ቀና ጐዳና ሊወጡ ይችላሉ። በስተርጅና ላተርፍ የምችለው ነገር ቢኖር እራሴን ማሳደፍና ክብሬን ማዋረድ ብቻ ነው።

²⁶ አምላክ እጅ አላመልጥም።

²⁷ አሁን ምንም ሳልፈራ ሕይወቴን አሳልፌ ብሰጥ ለሽምግልናዬ የተገባሁ ሆኜ እገኛለሁ፤

²⁸ ይህን በማድረጌ ወጣቱ ትውልድ በደግነት፥ በክብርና በጉጉት ስለቅዱሳት ሕግጋት ሲል ሞትን በድፍረት ይጋፈጥ ዘንድ የእኔን አብነት ይከተላል”።

²⁹ ይወስዱት የነበሩ ሰዎች በፊት በመልካም ዐይን ይመለከቱት የነበሩ ሐሳባቸውነ ለውጠው በክፉ ዐይን ተመለከቱተ፤ ምክንያቱም የተናገረው ንግግር እንደ ዕብደት መስሎ ታያቸው።

³⁰ እርሱ ግን ሲደበደብ ሳለ ከመሞቱ በፊት እየሳቀ እንዲህ አለ፥ “ቅዱስ ዕውቀት ያለው አምላክ ከሞት ማምለጥ ስችል በሥጋዬ የሚያሠቃዩኝን ጅራፎች ታግሼ መቀበሌን ያውቃል፤ ነገር ግን ነፍሴ ይህን ሁሉ ስቃይ በመቀበል ትደሰታለች”።

³¹ በእንደዚህ ዓይነት ነው ይህ ሰው በሞቱ ለወጣቶች ብቻ ሳይሆን ለሕዝቦች ሁሉ የጥንካሬ ምሳሌና የብርታት ማስታወሻ ትቶ ያለፈው።