SÜLEYMANIN MƏSƏLLƏRİ 9 - ƏHDİ-ƏTİQ (TÖVRAT VƏ ZƏBUR)

Hikmət yolu

¹ Hikmət evini qurub, Yeddi dirəyini yonub,

² Heyvanlarını kəsib, Şərabını hazırlayıb, Süfrəsini də düzəldib.

³ Göndərdiyi kənizlər Şəhərin uca yerlərindən car çəkərlər:

⁴ «Gəlin bura, ey cahillər!» Qanmazlara belə deyərlər:

⁵ «Gəlin, çörəyimdən yeyin, Hazırladığım şərabdan için.

⁶ Cəhaləti atın, ömür sürün, İdrak yolu ilə düz gedin».

⁷ Rişxəndçini tənqid edən özünü rüsvayçılığa salar, Şər adamı danlayan axırda ləkələnər.

⁸ Rişxəndçini danlama, yoxsa sənə nifrət edər, Müdrik insanı danlasan, səni sevər.

⁹ Hikmətliyə öyüd versən, hikmətini artıracaq, Salehə bilik öyrətsən, müdrikliyini çoxaldacaq.

¹⁰ Rəbb qorxusu hikmətin başlanğıcıdır, Müqəddəsi tanımaq idraklı olmaqdır.

¹¹ Hikmətin vasitəsilə ömrün-günün çoxalar, Həyatına illər əlavə olar.

¹² Əgər hikmət qazansan, özünə xeyir verərsən, Əgər rişxənd etsən, zərərini özün çəkərsən.

Axmaqlıq yolu

¹³ Axmaq qadın hay-küy salır, Cahildir, heç nə qanmır.

¹⁴ O, evinin qapısı önündə oturub, Şəhərin uca yerlərində kətil üstə əyləşib,

¹⁵ Yoldan ötənləri, Düz yolda olanları çağırır:

¹⁶ «Bura gəlin, ey cahillər!» Qanmazlara belə deyir:

¹⁷ «Oğurluq su şirin olar, Gizli yeyilən çörəyin başqa ləzzəti var».

¹⁸ Lakin yanına gələnlər bilməzlər ki, Orada ölüm var, Bu qadının çağırdıqları ölülər diyarının dərinliyindədir.