Sòm 4 - Bib Sen An: Kreyòl Ayisyen

Pou direktè koral la; sou enstriman ak fil yo; yon sòm David

¹ Reponn mwen lè m rele Ou, O Bondye ladwati mwen; Ou te fè m pran souf nan gran twoub mwen an. Fè m gras e tande lapriyè mwen.

² O fis a lòm yo, jiskilè laglwa Mwen va devni yon repwòch? Jiskilè ou va renmen sa ki san valè e tante twonpe moun? Tan

³ Men konnen ke SENYÈ a te mete nonm Bondye a apa pou Li menm. SENYÈ a tande lè m fè apèl Li.

⁴ Tranble, men pa fè peche. Reflechi nan kè ou sou kabann ou, e rete kalm. Tan

⁵ Ofri sakrifis ladwati yo. Mete konfyans nan SENYÈ a.

⁶ Anpil ap di: “Kilès ki kab montre nou yon bagay ki bon?” SENYÈ, leve wo limyè a vizaj Ou devan nou!

⁷ Ou te mete lajwa nan kè m plis pase lè gwo rekòlt sereyal mi ak diven nèf vin parèt.

⁸ Anpè, mwen va kouche pou dòmi, paske Ou sèl, SENYÈ, fè m viv ansekirite.