زبور 48 - کِتابِ مُقادّس

ایک گِیت۔ بنی قورح کا مزمُور۔

صیُّون - خُدا کا شہر

¹ ہمارے خُدا کے شہر میں۔ اپنے کوہِ مُقدّس پر خُداوند بزُرگ اور بے حد سِتایش کے لائِق ہے۔

² شِمال کی جانِب کوہِ صِیُّون جو بڑے بادشاہ کا شہر ہے وہ بُلندی میں خُوش نُما اور تمام زمِین کا فخر ہے۔

³ اُس کے محلّوں میں خُدا پناہ مانا جاتا ہے۔

⁴ کیونکہ دیکھو! بادشاہ اِکٹّھے ہُوئے۔ وہ مِل کر گُذرے۔

⁵ وہ دیکھ کر دنگ ہو گئے۔ وہ گھبرا کر بھاگے۔

⁶ وہاں کپکپی نے اُن کو آ دبایا اور اَیسے درد نے جَیسا دردِ زِہ۔

⁷ تُو پُوربی ہوا سے ترسِیس کے جہازوں کو توڑ ڈالتا ہے۔

⁸ لشکروں کے خُداوند کے شہر میں یعنی اپنے خُدا کے شہر میں جَیسا ہم نے سُنا تھا وَیسا ہی ہم نے دیکھا۔ خُدا اُسے ہمیشہ برقرار رکھّے گا۔ (سِلاہ)

⁹ اَے خُدا! تیری ہَیکل کے اندر ہم نے تیری شفقت پر غَور کِیا ہے۔

¹⁰ اَے خُدا! جَیسا تیرا نام ہے وَیسی ہی تیری سِتایش زمِین کی اِنتہا تک ہے۔ تیرا دہنا ہاتھ صداقت سے معمُور ہے۔

¹¹ تیرے احکام کے سبب سے کوہِ صِیُّون شادمان ہو یہُوداؔہ کی بیٹیاں خُوشی منائیں!

¹² صِیُّون کے گِرد پِھرو اور اُس کا طواف کرو۔ اُس کے بُرجوں کو گِنو

¹³ اُس کی شہر پناہ کو خُوب دیکھ لو۔ اُس کے محلّوں پر غَور کرو تاکہ تُم آنے والی نسل کو اُس کی خبر دے سکو

¹⁴ کیونکہ یہی خُدا ابدُالآباد ہمارا خُدا ہے۔ یہی مَوت تک ہمارا ہادی رہے گا۔