زبور 108 - کِتابِ مُقادّس

گِیت۔ داؤُد کا مزمُور۔

دُشمنوں کے خِلاف کُمک کی درخواست

¹ اَے خُدا! میرا دِل قائِم ہے۔ مَیں گاؤُں گا اور دِل سے مدح سرائی کرُوں گا۔

² اَے بربط اور سِتار جاگو! مَیں خُود بھی صُبح سویرے جاگ اُٹھوں گا۔

³ اَے خُداوند! مَیں لوگوں میں تیرا شُکر کرُوں گا۔ مَیں اُمّتوں میں تیری مدح سرائی کرُوں گا۔

⁴ کیونکہ تیری شفقت آسمان سے بُلند ہے اور تیری سچّائی افلاک کے برابر ہے۔

⁵ اَے خُدا! تُو آسمانوں پر سرفراز ہو اور تیرا جلال ساری زمِین پر ہو۔

⁶ اپنے دہنے ہاتھ سے بچا اور ہمیں جواب دے تاکہ تیرے محبُوب بچائے جائیں۔

⁷ خُدا نے اپنی قدُّوسیتؔ میں یہ فرمایا ہے مَیں خُوشی کرُوں گا۔ مَیں سِکم کو تقسِیم کرُوں گا اور سُکّات کی وادی کو بانٹُوں گا۔

⁸ جلعاد میرا ہے۔ منسّی میرا ہے۔ اِفرائِیم میرے سر کا خود ہے یہُوداؔہ میرا عصا ہے۔

⁹ موآؔب میری چلپچی ہے۔ ادُوم پر مَیں جُوتا پھینکُوں گا۔ مَیں فلِستِین پر للکارُوں گا۔

¹⁰ مُجھے اُس فصِیل دار شہر میں کَون پُہنچائے گا؟ کَون مُجھے ادوؔم تک لے گیا ہے؟

¹¹ اَے خُدا! کیا تُو نے ہمیں ردّ نہیں کر دِیا؟ اَے خُدا! تُو ہمارے لشکروں کے ساتھ نہیں جاتا

¹² مُخالِف کے مُقابلہ میں ہماری کُمک کر کیونکہ اِنسانی مدد عبث ہے۔

¹³ خُدا کی بدَولت ہم دِلاوری کریں گے کیونکہ وُہی ہمارے مُخالِفوں کو پامال کرے گا۔