फिलिप्पियों 1 - चम्बयाली नौआ नियम

नमस्ते ते प्रार्थना

¹ मसीह यीशु रे दास पौलुस ते तीमुथियुस रे पास्से का, सबणी पवित्र मणूआं जो, जे मसीह यीशु अन्दर होई करी फिलिप्पी सहर अन्दर रैह्णे वाले कलीसिया रे सारे मुखिया ते सेवक जो ए चीठ्ठी लिख्खेया करदे हिन।

² असा रे पिता परमेश्वर ते प्रभु यीशु मसीह रे पास्से का तुसा जो अनुग्रह ते सांती मिलदी रेयो।

पौलुस री प्रार्थना ते धन्यवाद

³ मैं जिस बेल्ले भी तुसा जो याद करदा, तां-तां अपणे परमेश्वर रा शुक्रिया करदा।

⁴ ते जां भी कदी तुसा सबणी जणेया तांइ प्रार्थना करदा, तां हमेसा खुसी कने प्रार्थना करदा।

⁵ किजोकी तुसा रे मसीह यीशु बिच विश्वास करणे रे पैल्ले दिन का लेई करी अज्ज तांइ तुसा मसीह यीशु रा सुब बसेख जो फलाणे अन्दर मेरे कने बराबर रे।

⁶ मेरे जो इस गल्ल रा भरोस्सा है कि जिस परमेश्वर ने तुसा अन्दर भला कम्म सुरु कित्ते रा है ते तिस्सी परमेश्वर ने ही तिस कम्म जो मसीह यीशु रे हटणे रे समय तिकर पूरा करणा।

⁷ खरा होणा कि मैं तुसा सबणी तांइ इदेय सोच रख्खां, किजोकी मैं तुसा कने बड़ा वरी प्यार रखदा, किजोकी तुसा मेरे कने ए सौभाग्य परमेश्वर रे अनुग्रह कने हासिल कित्ते रा है, अब्बे भी जां मैं कैद बिच है ते मसीह रे सुब बसेख पर उठणे वाले सवाल्लां रा जवाब दैणे ते तिसजो साबित करणे बिच भी।

⁸ इस अन्दर परमेश्वर मेरे गवाह हिन कि मैं मसीह यीशु सांई दाह करी के तुसा सबणी जणेया कने मिलणे री चाह करदा रेयां।

⁹ मैं ए प्रार्थना करदा कि इक्क दूए तांइ तुसा रा प्यार बदधा जाए, ते जिन्दगी बिच सही चीजां जो चुनणे तांइ तुसा री ज्ञान ते सही ते गलत री समझ लगातार बदधी रेयो।

¹⁰ ताकि तुसा जिन्दगी बिच अप्पु तांइ सही चीजां जो चुणी सको ताकि तुसा मसीह यीशु रे हटणे रे दिन तांइ निर्मैल ते बेकसूर रेयो।

¹¹ तुसा री जिन्दगी मसीह यीशु रे जरिए परमेश्वर री धार्मिकता रे कम्मां कने भरदी जाए जिस कने परमेश्वर री बड़ाई ते तारीफ हुंदी रे।

पौलुस री जिन्दगी रा मतलब पौलुस री कैद का खुशखबरी री तरक्की

¹² ओ संगी विश्वासियों, मैं चाह्‍ंदा कि तुसा जो ए पता लग्गी जाओ कि मेरे कने बीत्ती, तिस कने सुब बसेख लोक्कां बिच होर जादा फैल्लेया।

¹³ इत्ते तक कि सम्राट रे राजभवन री सारी सैना रे दल ते बाकि सबणी मणूआं अन्दर पता लग्गी गेया कि मैं मसीह यीशु री सेवा करणे री वजह कने कैद है।

¹⁴ ते मेरे कैद होणे री वजह कने बाकि रे विश्वासियां की हिम्मत बधी गे री है। से निडर होई करी हिम्मत कने परमेश्वर रा बसेख सुणाया करदे हिन।

¹⁵ ए सच है कि किच्‍छ मणू जलन ते दुश्मणी री वजह कने मसीह रा बसेख सुणांदे। पर किच्‍छ मणू सही ईरादे कने मसीह रा बसेख सुणांदे।

¹⁶ से मणू इधेरे तांइ मसीह रा सुब बसेख सुणांदे किजोकी से मेरे जो प्यार करदे ते से जाणदे कि मैं मसीह रे बसेख पर उठणे वाले सवाल्लां रा जवाब दैणे तांइ चुणेया गे रा है।

¹⁷ पर जे मणू जलन रखदे, से अपणे फायदे तांइ मसीह रा बसेख सुणांदे, ताकि मेरे जो मेरी कैद बिच होर जादा तकलीफ देई सकण।

¹⁸ पर इस कने कोई फरक नी पैन्दा भले ही तिन्हेरे ईरादे ठीक होण या बुरे, मसीह रा सुब बसेख कुसकी ना कुसकी तरिक्के कने सुणाया जांदा, ते मैं इस बिच ही खुस है, ते मैं इस गल्ल बिच इय्यां ही खुस रैह्णा।

जिंदा रैह्णा मसीह हिन

¹⁹ किजोकी मैं जाणदा कि तुसा जे मेरे तांइ प्रार्थना करेया करदे हिन, तिसेरे जरिए, ते मसीह यीशु री पवित्रात्मा री मदद कने मेरे जो छुटकारा मिलणा।

²⁰ मेरी तां ए ही दिल का लालसा ते आस है कि मैं कुसकी गल्ल अन्दर शर्मिंदा ना होआं, पर जिय्यां मेरे हिम्मत कने मसीह रा बसेख सुनाणे री वजह कने मसीह यीशु री बड़ाई मेरे जरिए हमेसा हुंदी आए री है, तिय्यां ही अब्बे भी हो, चाए मैं जियां या मरी जां।

²¹ किजोकी जे अगर मैं जियां तां से मसीह यीशु री बड़ाई करणे तांइ होणा, ते जे अगर मैं मरी भी जां तां से भी फायदेमंद है किजोकी तां मैं मसीह कने रैह्णा।

²² पर जे अगर मैं जिन्दा रेयां तां मैं मसीह यीशु तांइ होर भी कम्म करी सकदा, इधेरे तांइ नी जाणदा जीणा खरा है या मरणा?

²³ किजोकी मैं इन्हा दोन्नां इच्छा बिच उलझी गे रा है: मैं तां चाह्‍ंदा कि मैं इस जिन्दगी जो छड्डी करी मसीह यीशु कने रैह्णे तांइ चली जां,

²⁴ पर तुसा री मदद करणे रे खातिर मेरा जीणा जरुरी है।

²⁵ ते इधेरे तांइ मेरे जो भरोस्सा है ते मैं जाणदा भी कि मैं जीणा, बल्कि मैं तुसा सारेयां कने भी रैह्णा ताकि मैं तुसा जो विश्वास बिच मजबूत होणे ते तिस बिच खुस रैह्णे बिच मदद करी सकां।

²⁶ ते जां मैं तुसा का आणा तां तुसा का मसीह यीशु बिच तिस कम्म तांइ घमंड करणे रा होर भी वजह होणी जे से मेरे जरिए करेया करदे हिन।

²⁷ सिर्फ इन्ना ही करो कि मसीह रे सुब बसेख रे हिसाब कने जिन्दगी जियो। ते भले ही मैं तुसा जो आई करी मिलां या ना भी मिलां, वस तुसा रे बारे बिच ए ही सूणेया कि तुसा इक्क-मन होई इक्क ही मकसद तांइ इकठ्ठे होई करी तिस विश्वास तांइ कड़ा संघर्ष करदे रैहन्दे जे मसीह यीशु रा सुब बसेख है।

²⁸ कुसकी भी तरिक्के कने अपणे दुश्मणा का मत डरो, तुसा री हिम्मत तिन्हेरे विनास री निशानी है, पर ए तुसा तांइ छुटकारे री निशानी है ते ए परमेश्वर रे पास्से का है।

²⁹ किजोकी मसीह यीशु री वजह कने तुसा पर ए दया होई कि नां सिर्फ तुसा तिन्हा पर विश्वास करो पर तिन्हा तांइ दुख भी सही सको।

³⁰ ते तुसा जो तैसा ही संघर्ष करणा पैणा, जदेई तुसा ने मेरे जो तां भी करदे दिख्खे रा है जां मैं तुसा कने फिलिप्पी सहर बिच थिया, ते अब्बे भी सूणदे कि मैं तिय्यां ही इत्ते कैद बिच संघर्ष करेया करदा।