गलातियों 1 - बारेली पावरी

पौलुसोनचा अभिवादन

¹ पौलुसोन जू नी माणसोनचा गोथू एने नी माणसोन लारे, बाकीन येसु मसिह एने परमेश्वर बासोन लारे, जू तीनाक मोरलामा गोथू जीवतु कोऱ्यु प्रेषित छे.

² एने आखा भाशोनचा गोथा जा मार साथे छे, गलातिन मंडवीन नावे.

³ परमेश्वर बास एने आमरा प्रभू येसुन मसिहन भूनी गोथा तुमुक दया एने शांती जोळती रोये.

⁴ चू खुदो काजे आपना पापोन कोरता आप देदू, काहाकि आपनु परमेश्वर एने बासोन मोर्जीन अनसारे आपुक इनी भुंडला संसारसी छुळावे.

⁵ तेरी स्तुती एने महिमा कायम होयती रोये. आमेन.

एकुत वारली खोबर

⁶ मेसेक नोवलायी होयतेली कि यु तुमुक मसिहन दयामा बुलाव्यू तीनासी तुमु दिसरान कोरता फिरीन दिसरान वारली खोबर भूनी झुकने बाज गोया.

⁷ बाकीन चू दिसरी वारली खोबर होय नी, पुन वात जी छे कि कोतरा ओसा जा तुमुक बिहाळ देतला एने मसिहन वारली खोबर काजे बिगाळनेन देखतला छे.

⁸ ओगर आपु, इनी सोरगो दूत भूनी कुदू दूत भी इनी वारली खोबर काजे छुळीन जो आमु तुमु काजे सोमवाळला छे, कुदू ओवी वारली खोबर तुमुक सोमवाळे, ती शापीत होये.

⁹ जोसा आमु पेहेले कोयला होता, तोसुत मे हिमी एने कोयो कि इनी वारली खोबर काजे सुळीन जीनाक तुमु लेदला छे, बाकीन ओगर कुदू तिसरू सोमवाळे ती शापित होये.

¹⁰ हिमी मे काय माणसोक मोनावतलु नीती परमेश्वर काजे? काय मे माणसो काजे खुश कोरणेन मारी मोर्जी छे? ओगर मे हिमी तोक माणसो काजे खुश कोरतू रोयतू ती मसिहन दास नी रोयतू.

अगवा कोरता बुलावनो

¹¹ हे भाशो मे तुमुक देखाळ देयो कि वारली खोबर मे सोमवलू छे, चू माणसोन बी नी होय.

¹² काहाकि चू मेसेक माणूस भूनी गोथू नी पुगाळ्यु, एने नी मेसेक सिकाळ्या, बाकीन येसु मसिहन विजावासी जोळलो छे.

¹³ यहुदिन रितीमा जू पेहेले मारो चाल-चलन होतो तेरा बारामा तुमु सोमवला छे कि मे परमेश्वरोन मंडवी काजे घोनुत तोकलीत एने नाश कोरतू होतु.

¹⁴ आपना लोकेत जातीवावासी जे मारेन तोसो होता, यहुदिन अनसारे मे जादा बोनतु जातु होतु एने आपना बाप दादान रिती रीवाजोन कोरता घोणा खुशीमा होता.

¹⁵ बाकीन परमेश्वरोन, जू मारी आयान पेटोमा होतु मेसेक ठेरावलु एने आपनी दयासी बुलाय लेदू.

¹⁶ जो मार मोर्जी होई कि मारेमा आपना पुऱ्या काजे प्रगट कोरे कि मे दिसरा जातीमा तेरी वारली खोबर सोमवाळलो, ती नी मे मास एने लुयसी सोला लेदू.

¹⁷ एने नी यरुशलेमोन साते गोथू ने मार गोथा पेहेलेन प्रेषितोन होता, पुन तेतारुत अरबस्थानमा जात रोयू एने ओवी चा गोथू दमिश्कोमा पोछु आतरोयू.

¹⁸ ओवते तीन सालोन ओवते मे कैफा काजे भेटनेन कोरता यरुशलेम गोयू, एने तेरेनचा पोंदरा दाहळा तोक रोयू.

¹⁹ बाकीन प्रभू येसुन भाश याकुब काजे छुळीन एने प्रेषितमा गोथा कुदा काजे नी जोळ्यो.

²⁰ जे वाते मे तुमु काजे लिखने बाज रोयू, देखू परमेश्वरोन उपस्थीती जानीन कोयो कि चे झुटा नी होय.

²¹ इनान ओवते मे सिरीया एने किलिकियान प्रांतमा आव्यु.

²² पुन यहुदि मंडवी जे मसिहमा होता, मारो मूय कोबी नी देखला होता;

²³ बाकीन योत सोमव्या कोरता होता कि जे आपनुक पेहेले सोतावतू होतु, चू हिमी भुरसान वारली खोबर सोमवाळे, जीनाक पेहेले नाश कोरतू होतु.

²⁴ एने चे मारा बारामा परमेश्वरोन महिमा कोरता होता.