Efeze 1:18 - MUKANDA WA MYIDI MUKULU

¹⁸ Ndi ndomba Mvidi Mukulu bua atokeshe lungenyi luenu, bua numanye tshinudi mua kutekemena kudi Mvidi Mukulu, bu mudiye munubikidile. Nanku nenumanye biuma bilenga bidiye mulamine bantu bende.

Mukanda wa Nzambi Dihungila Dikulukulu ne Dihungila Dihia-dihia 2003

¹⁸ ne bua yeye anumunyikile mesu a mu mitshima yenu, bua nuenu kumanya didi ditekemena dia kunubikila kuandi, ne budi bubanshi bua butumbi bua buhianyi buandi mu basanto,

Efeze 1:18 Marejeleo ya Msalaba

Yobe 42:5

Mvua mukumanye amu bualu bantu bakuabu bavua bandongeshe. Kadi mpindiewu meme kukumona ne anyi abidi.

Misambu 119:18

Tabaja mesu anyi, mmone malu a dikema adi mu mikenji yebe.

Yeshaya 11:2

Mueyelu wa Maweja-Nangila udi nende kashidi. Mueyelu udi umupa meji, umuambuluisha bua asunguluje malu. Neamanye tshia kuenza, neapete bukitu bua kutshikumbaja. Mueyelu neumuludike bua amanye Maweja-Nangila, neumulongeshe bua kumunemeka.

Yeshaya 29:10

Bualu Maweja-Nangila neanuladike tulu tukole. Uvua munusuike tshilamba pa mesu. — Mesu enu ke bambi benu. — Mmunubuikile tshilamba mu mitu yenu. — Mitu yenu ke badi bamona malu. —

Yeshaya 29:18

Dituku adi, badi ne mapapa, nebumvue bidibu babala mu mukanda. Bampofu badi bapatuka mu miidima, nebamone bimpe.

Yeshaya 32:3

Bantu aba badi ne mudimu wa kutabalela makenga a bantu, kabakushala kabidi bampofu to. Bantu aba badi ne bua kumvua, nebateleje bimpe tshidi bantu bamba.

Yeshaya 42:7

Neutabeje bampofu. Neupatuishe bena lukanu mu nzubu wa lukanu, muaba udibu basomba, bindile mu miidima.”

Yeshaya 6:10

Upapishe muoyi wa bantu aba, upatshishe matshi abu, ufofamije mesu abu bua mesu abu kaamonyi, bua matshi abu kaumvu, kabeedi meji a kupingana kundi, tshimonyi mua kubasungidila.

Matayi 13:15

Bualu bena tshisamba etshi mbapapishe muoyi wabu, mbadijike matshi, mbabuikile mesu. Bu bobu kabayi benza nanku, mesu abu avua mua kumona, matshi abu avua mua kumvua, lungenyi luabu luvua mua kujingulula malu. Nanku bavua mua kupingana kundi, Meme kujikija masama abu.”

Marke 10:17

Pakavua Yezu ubanga luendu, muntu kulua lubilu kudiye, kutua binu kumpala kuende, umukonka ne: — Mulongeshi muimpe, bua meme kupeta muoyi wa kashidi, nengenze tshinyi?

Luke 24:45

Ke Yezu kubambuluisha bua bajingulule Mikanda ya tshijila.

Bienzedi 16:14

Umue wa kudibu, dina diende Lidiya, uvua mutumine ku tshimenga tshia Tiyatira. Uvua ngendamushinga wa bilamba bikunze bia mushinga mukole. Uvua mumane kulamata tshisumbu tshia bena ditaba ba bena Yuda. Uvua muteleje ne ntema bituvua tuamba. Mfumu kunzulula muoyi wende, bua umvue bimpe bivua Polu wakula.

Bienzedi 26:18

bua ubatabaje; ubumushe mu miidima, babuele mu butoke; ubapatule ku bumfumu bua diabolu, babuele mu bumfumu bua Mvidi Mukulu. Nanku bobu bangitabe, nebabajimijile mibi yabu. Nebabuele mu tshisumbu tshia bantu ba Mvidi Mukulu.”

Rome 11:29

Bualu Mvidi Mukulu kena unyenga tshintu tshidiye mumane kufila. Kena ukudimuna meji avuaye nawu pambidi pa ba-vuaye mubikile.

Rome 2:4

Udi upepeja dinanga dikole didi Mvidi Mukulu utuleja, lutulu luende, kabidi ne muoyi wende wa kalolu anyi? Kuena mumanye ne: dinanga didi Mvidi Mukulu ukuleja didi ne bua kukusaka bua udilengeje anyi?

2 Korente 4:4

Diabolu, nwidie mubi wa pa buloba ebu, mmututubije lungenyi luabu. Ke padibu kabayi mua kuitaba Lumu lua Disanka, kabayi mua kumona bukenke budilu lutangalaja. Mu bukenke ebu butumbi bua Kristu budi bumueneka patoke. Mu Kristu mene Mvidi Mukulu udi umueneka.

2 Korente 4:6

Mvidi Mukulu uvua muambe ne: “Butoke bukenke mu miidima!” Ke muvuaye mukenkeshe butoke buende mu mioyi yetu, bua mmanye butumbi bua Mvidi Mukulu budi bubalakana pa mpala wa Kristu.

Ngalate 5:5

Kadi tuetu ku bukole bua Mueyelu wa Tshijila, udi ukuata mudimu patudi tuitaba, tudi bindile, batekemene se: Mvidi Mukulu neatubingishe.

Efeze 1:11

Munda mua Kristu, tudi bafike muaba wa lupandu. Mvidi Mukulu mmudianze kutusungula muvuaye musue. Bualu Mvidi Mukulu udi ukumbaja bionsu, amu muvuaye mubijadike, mujinge kabidi ne: bikale nanku.

Efeze 1:7

Mvidi Mukulu mmutupikule ku bubi, mmutujimijile mibi yetu yonsu ku mulambu wa lufu lua Yezu Kristu. Ke muvuaye mutuleje ditunanga diende dia dikema.

Efeze 2:12

Mu tshikondu atshi kanuvua pabuipi ne Kristu. Nuvua benyi. Kanuvua ba mu tshisamba tshia Izrayele, tshivua Mvidi Mukulu musungule. Ndondu ivua Mvidi Mukulu mutue ne bantu bende, ne malaya avuaye mubalaye, kabivua binutangila. Nuvua basombe panu, kanuyi batekemene tshintu, kanuyi ne Mvidi Mukulu.

Efeze 3:16

Ndi mmulomba se: anukankamike, bilondeshile buneme bua butumbi buende, anukoleshilemu munda muenu kudi Mueyelu wende.

Efeze 3:8

Meme ndi mushadile ku bantu bonsu badi bitaba Mvidi Mukulu. Kadi Mvidi Mukulu uvua muntutshishe diakalenga edi: bua mmanyishe bantu ba bisamba bikuabu Lumu lua Disanka lua bubanji bupite butudi tupeta kudi Kristu.

Efeze 4:1

Nanku, meme udibu bakuate mu lukanu, bualu ndi nkuatshila Mfumu mudimu, ndi nnulomba se: nuenze malu mimpe adi bantu, badi Mvidi Mukulu ubikila bua bikale bende, ne bua kuenza.

Efeze 4:4

Bualu mubidi udi umue, Mueyelu wa Tshijila amu umue. Ke mudi Mvidi Mukulu munubikidile kabidi ku ditekemena amu dimue.

Efeze 5:8

Kale nuvua mu midima. Mpindiewu nudi mu butoke, bualu nudi badisange ne Mfumu. Enzayi malu adi bantu badi benda mu butoke ne bua kuenza.

Filipe 3:14

Nanku ntshidi mu njila, nyema lubilu, bua mpete nsala wa kalumbandi. Nsala awu ke muoyi mupiamupia udi Mvidi Mukulu mutubikidile, bua tuupetele mu diulu kudi Yezu Kristu.

Kolose 1:12

Elayi Mvidi Mukulu Tatu tuasakidila ne disanka. Bualu udi munuenze bantu badi mua kupeta bumpianyi budiye mutekele bantu bende mu Bukalenga buende bua butoke.

Kolose 1:23

Kadi nudi ne bua kunanukila mu ditaba, bashindamemu, kanuyi nutenkakana. Kanujimiji ditekemena dinu-vua bapete, katshia banumanyisha Lumu lua Disanka. Ke Lumu lua Disanka luvuabu balongeshe bantu bonsu, kabidi lundi meme Polu ngenzela mudimu, muvua Mvidi Mukulu musue.

Kolose 1:27

Mvidi Mukulu uvua musue kubamanyisha meji masokome mimpe, a mushinga mukole, adiye nawu bualu bua bantu bonsu. Adi nunku: Kristu udi munda muenu. Bualu buende nudi mua kutekemena ne: netudisange ne Mvidi Mukulu mu butumbi buende.

Kolose 1:5

Pavua Lumu lua Disanka, ludi lunuambila malu malelela, lufike kuenu musangu wa kumpala, batua banumanyishe ditekemena didilu lunupetesha. Nenku ditaba ne dinanga binudi nabi, bidi bishindamene pa binudi nutekemena, bidibu banulamine mu diulu.

Kolose 2:2

Ndi nduangana bua bikale ne muoyi wa bukitu, banangangane, benze tshintu tshimue, bamanye malu onsu mu bulelela, bashindame munda muawu. Ke mudibu mua kujingulula meji masokome a Mvidi Mukulu, momumue ne: Kristu nkayende.

Kolose 3:15

Bupole bunudi nupeta kudi Kristu, buludike meji enu, ne bionsu binudi nuenza. Ku bupole abu ke kudi Mvidi Mukulu munubikidile bonsu pamue, bua nuenze bidimba bia mubidi umue. Nuele Mvidi Mukulu tuasakidila bua bualu ebu.

1 Tesalonike 2:12

Tuvua banukoleshe mu maboku, banubele. Tuvua banusengelele bikole, bua nuenze amu bidi Mvidi Mukulu musue. Yeye udi unubikila, bua nupete butumbi mu Bukalenga buende.

1 Tesalonike 5:8

Kadi tuetu badi benda mu munya, tudilame ku bunuavi ne ku budiavi. Tudi ne bua kuvuala ditaba ne dinanga, mudibu bavuala kazaku ka tshiamu mu mvita. Tuvuale kabidi ditekemena dia tuetu kupanda, mudibu basa tshifulu tshia tshiamu ku mutu.

2 Tesalonike 1:11

Ke patudi tunulombela, katuyi tupungila. Tudi tulomba Mvidi Mukulu wetu, bua anuenze bantu bakanyine muoyi udiye munubikidile. Tudi tulomba bua akumbaje ku bukole buende bilenga bionsu binudi nuipatshila, ne malu mimpe onsu adi ditaba dienu dinusaka bua kuenza.

2 Tesalonike 2:16

Mvidi Mukulu Tatu wetu mmutunange, mmutupe kabidi ditekemena dishindame ku luse luende, bua tuindile ne muoyi mukole matuku adi kumpala. Tudi tumulomba, tulomba ne Mfumu wetu Yezu Kristu,

1 Timote 6:12

Mu mvita ya kukolesha ditaba diebe, uluangane bimpe, bua upete muoyi wa kashidi. Mvidi mukulu mmukubikile ku muoyi ewu, pauvua mujukule ditaba diebe ne miaku milenga, bantu ba bungi bumvue, bajadike muuvua wamba.

Tite 2:13

Ke mutudi mua kuindila dituku dia disanka ditudi tutekemena. Dituku adi butumbi bua Mvidi Mukulu wetu munene ne Musungidi Yezu Kristu nebumueneke patoke.

Tite 3:7

Nanku Mvidi Mukulu kudibingisha, bualu udi utunanga. Ke mutudi mua kupiana muoyi wa kashidi utudi ditekemena.

Ebrewu 10:32

Nuvuluke munuvua kale. Amu nuenu bamane kupeta butoke bua Mvidi Mukulu, nuvua bakenga bikole, nuvua balame muoyi mushindame mu mvita.

Ebrewu 6:4

Tshidi mua kuenzekela badi bapingana tshiakabidi mu nsombelu mubi ntshinyi? Bakaya bamane kupeta butoke bua Mvidi Mukulu. Bavua balabule dipa dia mulu, badisange ne Mueyelu wa Tshijila.

1 Petro 1:3

Tutumbishayi Mvidi Mukulu, Tatu wa Mfumu wetu Yezu Kristu! Bu mudiye ne luse luvule, mmutupe muoyi mupiamupia pa kubisha Yezu Kristu ku bafue. Ke mutudi mua kutekemena bikole,

1 Petro 3:9

Kanupingajidianganyi bubi ku bubi. Kanupendi badi banupenda. Kadi badi banuenzela bibi, nubele lupemba, bualu diba divua Mvidi Mukulu munubikile, uvua mulaye kabidi bua kunuela lupemba.

1 Petro 5:10

Mvidi Mukulu mmunubikile bua nudisange nende mu butumbi buende bua kashidi, panudi nudisanga ne Kristu. Nanku nuenu bamane kukenga tshitupa tshikese, Mvidi Mukulu, mpokolu wa dinanga dionsu, neanuenze bantu ba tshijila. Neanushindike, anukoleshe bua kanutenkakanyi.