Zekâya 10:7 - Mukanda wa Nzambi Dihungila Dikulukulu ne Dihungila Dihia-dihia 2003

⁷ Bena Efelayima nehikale bu bena bukitu; mitshima yabo neyisanke bu mudibo banue nvinyo. Bana babo nebamone muanda eu, nebasanke; mitshima yabo neyikale ne disanka mu Yehowa.

MUKANDA WA MYIDI MUKULU

⁷ Bena Efrayime nebikale bakole, bu bena mvita ba bukitu. Nebasanke bu bantu bamane kunua maluvu. Pamona bana babu bidi bienzeke ebi, nebasanke. Nebumvue musangelu munda muabu, bua bidi Maweja-Nangila muenze.

Zekâya 10:7 Marejeleo ya Msalaba

Zekâya 9:15

Yehowa wa misumba neabalame, ne bobo nebatshimune, nebadiate badi bahela mabue; nebanue mashi abo, nebateke diyoyo bu badi bakuatshike nvinyo; nebukute bu malonga adi ne mashi a mulambu, bu matumba a tshioshelu.

1 Petro 1:8

Yeye, unuakadi kanui batangile ku mesu, nyeye unudi nunanga; kadi nudi numuitabusha, kanui numutangila katataka, ne nudi nusanka bikole ne disanka didi hadi mua kuambibua ne didi diûle tente ne butumbi;

Filipe 4:4

Nusanke mu Mukelenge misangu yonso, nengambe tshiakabidi ne, Nusanke.

Bienzedi 2:26

Nunku mutshima wanyi wakusanka, ludimi luanyi luakuamba disanka dianyi; Ne bualu bukuabo, mubidi wanyi neulale ne ditekemena,

Yowanane 16:22

Nunku katataka nudi ne kanyinganyinga; kadi nenumone kabidi, mitshima yenu neisanke, muntu kena ununyenga disanka dienu.

Luke 1:47

Mutshima wanyi wakutamba kusanka mu Nzambi, Musungidi wanyi.

Zekâya 9:17

Monai mudi diakalengele diandi ne buimpe buandi bihite bunene! Maminu a blé neadiundishe bansongalume bikole, ne nvinyo muhia-muhia neadiundishe mishikankunde.

Sefanya 3:14

Imba biebe, wewe muana mukashi wa Siona; Bena Isalele, elai mbila; ikale ne disanka, sankaku bikole ne mutshima webe wonso, wewe muana mukashi wa mu Yelushalema!

Abakuke 3:18

kadi meme hanyi nensanke mu Yehowa, nentumbile mu Nzambi wa luhandu luanyi.

Yirmeya 32:39

Nembahe mutshima umue ne nshila umue, bua bannemeke tshiendelele, bua diakalengele diabo ne dia bana babo badi babalonda ku nyima kuabo.

Yeshaya 66:14

Nenumone malu â, ne mitshima yenu neyisanke; mifuba yenu neyidiunde bimpe bu mashinde a lutende. Bukole hua tshianza tshia Yehowa nebumanyibue kudi bantu bandi, ne tshiji tshiandi netshikale kudi badi nʼandi lukuna.

Yeshaya 38:19

Udi ne muoyo, muntu udi ne muoyo, neakutumbishe, bu mundi ngenza dituku edi; tatu neamanyishe bana bandi lulamatu luebe lua bushuwa.

Misambu 104:15

ne nyinyo idi isankisha mutshima wa muntu, ne manyi adi akenkesha mpala wandi, ne bidia bidi bikolesha mutshima wandi.

Misambu 102:28

Bana baledibue ba bantu bebe nebashikame mu buloba talalâ, ne tunkanunuma tuabo netujadikibue ku mpala kuebe.

Misambu 28:7

Yehowa udi bukole buanyi ne ngabu wanyi; mutshima wanyi wakumueyemena, ndi mukuatshishibue. Nunku mutshima wanyi udi utamba kusanka, nemmutumbishe ne musambu wanyi.

Misambu 13:5

Kadi nakueyemena luse luebe; mutshima wanyi neusanke bua luhandu luebe.

1 Samuele 2:1

Hana wakatendelela, wakamba ne, Mutshima wanyi udi utumbishibua mu Yehowa; lusengu luanyi ludi lubandishibua mu Yehowa. Mukana muanyi mudi mudiundishibua kudi bakadi nʼanyi lukuna: bualu bua meme ndi nsanka mu luhandu luebe.

Genese 43:34

Yeye wakababanyina bidia biakadi ku mpala kuandi, kadi tshituha tshia Benyamina tshiakahita tshituha tshiabo misangu itanu. Bakanua, bakasanka nʼandi.

Genese 18:19

Nakamumanya bua yeye ayishe bana bandi ne ba mu nsubu wandi bimpe, bua bobo baye mu nshila wa Yehowa bua kuenza malu makane ne malulame, nunku Yehowa neamanye mua kuenzela Abalahama malu onso akamuambileye.

Bienzedi 13:33

ne Nzambi wakashikishila bana betu mulayi eu, hakabisheye Yesu ku lufu; bu muakafundabo mu musambu muibidi ne, Wewe udi Muana wanyi, nakukulela lelu.

Bienzedi 2:39

Mulayi wa bualu ebu udi kunudi ne kudi bana benu balela ne kudi bonso badi kule, kudi bonso mene babikila Mukelenge Nzambi wetu kudiye.

Misambu 90:16

Mudimu webe umueneke kudi bantu bebe, butumbi buebe kudi bana babo baledibue.

Misambu 33:21

Bua mitshima yetu idi isanka kudiye, bualu bua tudi tueyemena dina diandi dia tshijila.

Yeshaya 54:13

Bana bebe bonso nebikale bayidi ba Yehowa; ditalala dia bana bebe nedikale dinene.

Yezekiyele 37:25

Nebashikame mu buloba bunakahesha Yakoba, muntu wanyi, muakashikamabo kudi batatu benu; bobo ne bana bakalelabo ne bikulu babo, nebashikamemu tô ne tshiendelele; ne Davidi, muntu wanyi, neikale mukokeshi wabo kashidi.

Yowele 2:23

Nuenu bana ba balume ba mu Siona, sankai bienu, ikalai ne disanka mu Yehowa Nzambi wenu; bualu bua yeye udi untokeshila nvula mbedi, udi untokeshila nvula ya bungi, nvula mbedi ne nvula mishishe, bu muakenzeye diambedi.

Yeshaya 25:9

Mu dituku adi nebambe ne, Monai, eu udi Nzambi wetu utuakutekemena ne, Neatusungile; eu udi Yehowa utuakutekemena; netuikale ne disanka, netusanke mu luhandu luandi.

Zekâya 12:8

Mu dituku adi Yehowa nealame bantu badi bashikame mu Yelushalema; ne muntu wa munkatshi muabo udi mutambe kuteketa neikale bu Davidi mu dituku adi, tshiota tshia Davidi netshikale bu Nzambi, bu muanjelo wa Nzambi ku mpala kuabo.