Yirmeya 12:1 - Mukanda wa Nzambi Dihungila Dikulukulu ne Dihungila Dihia-dihia 2003

¹ Yehowa, wewe udi muakane hanakeba kukuela mpata, kadi ndi musue kuyikilangana nʼebe bualu buanyi: Nshila wa bantu babi udi ne diakalengele bualu kai? Bualu kai bonso badi basonguelangana badi ne ditalala?

MUKANDA WA MYIDI MUKULU

¹ Maweja-Nangila wewe udi amu mubinge, tshiena mua kukuasa tshilumbu. Kadi ndi musue anu kukuela lukonku pa malu audi wenza. Mudi bantu badi kabayi balonda mikenji yebe bapeta dikasa dimpe mmunyi? Badi bakutombokela badi basomba talalaa bua tshinyi?

Yirmeya 12:1 Marejeleo ya Msalaba

Genese 18:25

Bualu ebu kabuikadi kudi bua wewe kuenza nunku bua kushiha bantu bakane ne bantu babi hohamue, biwenza nunku bantu bakane nebikale muomumue ne bantu babi, bualu ebu kabuikadi kûdi, Mulumbuluishi wa buloba buonso katu wenza bimpe, anyi?

Ezela 9:15

Yehowa, Nzambi wa Isalele, wewe udi muakane; bualu bua wewe wakatahila difuka dihanduka bu mudidi lelu eu; mona, tudi ku mesu kuebe mu kuhila kuetu; kakuena udi mumanye mua kuimana ku mpala kuebe bua bualu ebu.

Nehemya 9:33

Kadi wewe udi muakane mu malu onso akatukuata; wakatuenzela anu malu a bushuwa, kadi tuetu tuakenza bibi;

Yobe 12:6

Ntenta ya banyengi ba bintu idi anu ne diakalengele, ne badi bakuatshisha Nzambi tshiji badi bashikama talalâ, nansha yonso mulue ne nzambi wandi mu tshianza tshiandi.

Yobe 13:3

Kadi ndi musue kuakula ne Wa Bukole Buonso, ndi musue kuyikilangana ne Nzambi bualu buanyi.

Yobe 24:12

Mu musoko mudi munvuika mikemu ya bantu bafuafua, ne mutshima wa muntu mutahibue mputa udi usasabala; kadi Nzambi udi ulengulula malu mabi au.

Yobe 24:23

Nzambi udi ubaha ditekemena, ne badi bajadikibuamu; mesu andi adi atangila nshila yabo.

Yobe 8:17

Miji yandi idi ijingila ku mushiki wa mabue, ne yeye udi udiunda munkatshi mua mabue.

Misambu 116:5

Yehowa udi ne dinanga, udi muakane; Nzambi wetu udi ufuila bantu luse.

Misambu 119:137

Yehowa, wewe udi muakane, kulumbulula kuebe kudi kuakane kabidi.

Misambu 119:75

Yehowa, ndi mumanye ne, Kulumbulula kuebe kudi kuakane, ne bua lulamatu luebe lua bushuwa wewe wakunkengesha.

Misambu 145:17

Yehowa udi muakane mu nshila yonso idiye uyilamu, udi ulesha dinanga mu bienzedi biandi bionso.

Misambu 37:1

Kunyingabadi bua benji ba malu mabi, kuikadi ne badi benza bienzedi bibi mukau.

Misambu 37:35

Nakumona muntu mubi muikale ne bukole buandi bua bungi, mudituntumushe bu mutshi mubishi udi udiunda mu buloba buau,

Misambu 51:4

Nakukuenzela wewe, wewe nkayebe, bibi; nakuenza bualu bubi abu ku mesu kuebe; bua wewe Umanye mua kubingishibua hawamba dî dia kumpisha nʼadi, ne mua kuikala ne mutshima mutoke mu kulumbulula kuebe.

Misambu 51:6

Mona, wewe udi musue bushuwa buikale munda mua muntu; udi ummanyisha mua kuikala ne meji munda muanyi.

Misambu 92:7

ne, Biadiunda bantu babi bu mudi mashinde atoloka, ne bikala benji ba malu mabi bonso ne diakalengele, budi bua bobo kujimishibua tshiendelele.

Nsumuinu 1:32

Bualu hua dihingana tshianyima dia batshimbakanyi nedibashihe, ne kalengu ka bahote nekababutule.

Muambi 8:14

Bualu bua hatuhu budi buenjibue ha buloba, bua bantu bakane badiku bakaheta malu akadi kuikala kudi bantu babi; bantu babi badiku bakaheta malu akadi kuikala kudi bantu bakane. Nakamba ne, Bualu ebu budi hatuhu kabidi.

Yeshaya 41:21

Yehowa udi Wamba ne, Nulue ne tshilumbu tshienu; Mukelenge wa Yakoba udi wamba ne, Ambai mei enu makole anudi nudibingisha nʼau.

Yeshaya 48:8

Bushuwa, wewe kuena munvue, kuena mumanye malu â, ne tô ne ku mpindiu matshu ebe kakanza kujikuka. Bualu bua nakamanya ne wewe udi utamba kuikala muena bunsonge, ne wakamanyibua bu muntombokedi katshia bakulela.

Yirmeya 11:20

Kadi Yehowa wa misumba udi ne kulumbulula kuakane, udi uteta mutshima ne meji bia muntu, nentangile busombuedi buebe hamʼbidi habo, bualu bua nakuteka bualu buanyi mu bianza biebe.

Yirmeya 12:6

Bualu bua bana benu mene ne ba mu tshiota tshia tatu webe bakukutungila tshitungu; bobo mene badi bakulonda ne mbila; kuitabushi mei abo, nansha biakuambilabo mei mimpe.

Yirmeya 3:20

Yehowa udi wamba ne, Bulelela, bu mudi mukashi utungila bayandi tshitungu bua kumuka kudiye, nunku nuenu ba mu Bena Isalele nuakuntungila tshitungu muomumue.

Yirmeya 3:7

Nakamba munda muanyi ne, Hashikisheye kuenza malu a onso, nealukile kundi; kadi kakalukila kundi nansha. Muanʼabo mukashi Yuda udi kayi mua kueyemenyibua wakamona muanda eu.

Yirmeya 32:16

Hanakafila mukanda wa kusumba kua budimi kudi Baluka, muana wa Neliya, nakatendelela Yehowa ngamba bianyi ne,

Yirmeya 5:11

Yehowa udi wamba ne, Bena Isalele ne Bena Yuda bakutamba kuntangila tshitungu.

Yirmeya 9:2

Nakadi kusua kuikala ne muaba wa tshilala benyi mu tshihela wa bena ngendu bua meme mmanye mua kushiya bana betu ne kumuka kudibo! Bualu bua buonso buabo badi bendi ba masandi ne tshisumbu tshia batungidianganyi.

Muadi 1:18

Yehowa udi mubinge, bualu bua nakutombokela mukenji wandi. Unvuai, nuenu bantu bonso, nutangile kanyinganyinga kanyi, bua mishikankunde yanyi ne bansongalume banyi badi baye mu buhika.

Yezekiyele 18:25

Kadi nuenu nudi nuamba ne, Nshila wa Mukelenge kena mululame. Unvuai, nuenu ba mu tshisamba tshia Bena Isalele. Nshila wanyi kena mululame, anyi? Nshila yenu kayena mikonyangale, anyi?

Danyele 9:14

Bua malu â Yehowa wakalongolola dikenga edi, wakadituma kutudi: bualu bua Yehowa Nzambi wetu udi muakane mu bienzedi biandi bionso, tuetu katuakutumikila dî diandi.

Danyele 9:7

Mukelenge wetu, buakane budi kudi, kadi tuetu tudi ne bundu ku mesu, bu mudibu lelu eu, kudi bantu ba mu Yuda ne kudi badi bashikame mu Yelushalema, kudi Bena Isalele bonso, kudi badi ha buihi ne kudi badi kule, mu maloba onso awakubatuma, bualu bua kutomboka kuabo kuakukutombokelabo.

Osheya 6:7

Kadi bobo bakashiha tshihungidi tshianyi bu muakenza Adama; bakantungila tshitungu musangu au.

Abakuke 1:4

Bua malu â diyisha dia mikenji diakuteketa, ne kulumbulula kuakane kakuenaku. Bualu bua bantu babi badi basesuisha muntu muakane, nunku kulumbulula kua bilumbu kudi kunyanguka.

Sefanya 3:5

Yehowa udi muakane munkatshi muau; yeye kena wenza bualu bubi. Ku dinda ku dinda udi umuenesha kulumbulula kuakane hatoke, katu wahanga; kadi badi kabayi ne buakane kabena bamanye bundu.

Malaki 2:17

Nuakutondesha Yehowa ne mei enu. Kadi nudi nukonka ne, Tuakumutondesha munyi? Hanuamba ne, Muntu yonso udi wenza malu mabi udi muakane ku mesu kua Yehowa, ne yeye udi usanka bualu buandi; anyi hanuakonka ne, Nzambi utu walumbulula bilumbu ne kulumbulula kuakane udi kudi kunyi?

Malaki 3:15

Mpindiu tudi tubikila badi badisue ne, Badi ne dikasa dimpe; bulelela, benji ba malu mabi hadi bajadikibua; bulelela, badi bateta Nzambi badi bahanduka.

Dielulula 32:4

Yeye udi Dibue; mudimu wandi wonso udi muakane, bualu bua nshila yandi yonso idi milulame: Nzambi wa kalolo udi kayi ne bubi, udi ne malu makane a bushuwa.