Lewitiki 26:16 - Mukanda wa Nzambi Dihungila Dikulukulu ne Dihungila Dihia-dihia 2003

¹⁶ meme kabidi nennuenzele nunku nengenze malu adi anutshinyisha, nennutumine masama adi anyanyisha mibidi yenu ne disama dia mubidi kahia, masama au neashihe mesu enu, neanyanyishe mitshima yenu, nenukune bintu bienu tshianana, bualu bua bantu badi nʼenu lukuna nebabidie.

MUKANDA WA MYIDI MUKULU

¹⁶ nenku nennunyoke mushindu ewu: “Nennukuatshishe bowa, nunyane, nupete disama dia mubidi luya. Makenga aa neanupangishe mua kumona bimpe. Nenushale ne muoyi matuku makese. Nenukune biakudia mu madimi enu, kadi nebabidie amu kudi baluishi benu.

Lewitiki 26:16 Marejeleo ya Msalaba

1 Bakalenga 8:37

Bialua tshiole mu buloba, anyi disama dikole, anyi biakuata butu anyi bishi, anyi bialua mikumbi anyi meshi, anyi biabatshintshimika bena lukuna babo mu buloba bua misoko yabo, bikalabo ne dikenga kai anyi disama kai;

Yobe 18:11

Malu a buowa adi amutshinyisha ku nseke yonso, adi amulonda ku nyima, adi amuihata.

Yobe 20:25

Udi uhatula mukete mu mubidi wandi, lusongo luau ludi luengelela ludi luhatuka mu kanyonga kandi; buowa bua lufu budi bunukuata.

Yobe 31:8

hashishe meme nkune ntete, mukuabo adie bidi bitoloka; e, bia kudia bianyi bionso bijudibue.

Misambu 109:6

Sungula biebe muntu mubi bua kuikaleye ku mutu kuandi; mumubandi wandi imane ku tshianza tshiandi tshia balume.

Misambu 73:19

Mona mudibo babutuke kabutu mu katuha ka diba! Badi bajimishibue tshiendelele ku buowa bua bungi.

Misambu 78:33

Nunku yeye Wakajimisha matuku abo bu mudi muhuya ujimina, Wakajimisha bidimu biabo mu buowa bukole.

Ekesode 15:26

wakabambila ne, Binuatumikila di dia Yehowa Nzambi wenu, binuenza malu adi mimpe ku mesu kuandi, ne binuateleja matshu kudi mikenji yandi, binuenza mei andi onso, tshiena nnutumina nansha disama dimue dinakatumina Bena Ejipitu, bualu bua meme ndi Yehowa udi unuondaha.

Nsumuinu 3:33

Mulau wa Yehowa udi mu nsubu wa bantu babi, kadi udi uvudishila nsubu wa bantu bakane disanka.

Yeshaya 10:4

Nenumanye anu mua kusokoma munkatshi mua bena lukuna badi bakuatshibue mu nvita, nenubatame munkatshi mua bitalu bia bantu bashihibue! Bua malu â onso tshiji tshiandi katshiena tshikudimuke, kadi tshianza tshiandi tshitshidi tshiolola.

Yeshaya 62:8

Yehowa wakuditshiha ku tshianza tshiandi tshia balume, ne ku diboko diandi dikole ne, Bulelela, tshiena nfila maminu ebe kabidi bu bia kudia kudi badi nʼebe lukuna; ne bantu ba bende kabena banua nyinyo webe muhia-muhia uwakukuatshila mudimu.

Yeshaya 7:2

Bakambila ba mu nsubu wa Davidi ne, Bena Sulia bakuasa tshitudilu tshiabo mu buloba bua Efelayima. Mutshima wa mukelenge wakazakala, ne mitshima ya bantu bandi yakazakala, bu mudi mitshi ya muitu izakala ku mpala kua luhehele.

Yirmeya 12:13

Bakukuna maminu a blé, bakuhuola meba; bakudikengesha ne mudimu mukole, kabakudihetela luhetu; nebikale ne bundu bua mamuma abo, bualu bua tshiji tshikole tshia Yehowa.

Yirmeya 15:3

Yehowa udi wamba ne, Nembasunguile mishindu inai ya makenga, muele wa nvita bua kubashiha, mbua bua kubahanda, nyunyu ya mulu ne nyama ya ha buloba bua kubadia ne bua kubashiha.

Yirmeya 15:8

Bakashi babo ba mu lufuila badi bahita nsenga ya mu mai manene bungi; nakubishila bakashi baledi ba bansongalume mushihianganyi munda munya. Nakubatumina kanyinganyinga ne buowa lukasa.

Yirmeya 20:4

Bualu bua Yehowa udi wamba ne, Mona, nenkuvuishe bu mukuatshiki wa buowa kûdi wewe mene ne kudi balunda bebe bonso. Nebashihibue ku muele wa nvita wa bena lukuna babo, ne mesu ebe neamone muanda eu. Nenfile ba mu Yuda bonso mu bianza bia mukelenge wa Babulona kabidi, ne yeye neaye nʼabo mu buhika mu Babulona, neabashihe ne muele wa nvita.

Yirmeya 5:17

Nebadie bintu bia mu madimi enu ne bidia bienu, nebashihe bana benu ba balume ne bana benu ba bakashi; nebadie bisumbu bienu bia mikoko ne bimuna; nebanyange mionshi yenu ya tumuma ne mitshi ya nfigi; nebashimbule misoko yenu ya ngumbu inuakueyemena ne muele wa nvita.

Yezekiyele 24:23

Bitambala bienu nebishale bisuika ku mitu yenu, ne bisabata nebikale ku makasa enu; kanuena nuasa muadi, kanuena nudila, kadi nenunyingalale mu mitshima yenu bualu bua mibi yenu, nenutuilangane mikemu.

Yezekiyele 33:10

Wewe, muana wa muntu, ambila Bena Isalele ne, Nuenu nudi nuamba mei â ne, Ditomboka dietu ne bubi buetu bidi hamʼbidi hetu, ne mibidi yetu idi miteketangane ne kanyinganyinga bualu buabi; nunku netushale ne muoyo bishi?

Amosa 5:11

Nudi nudiata muntu muhele muinshi mua makasa enu, ne nudi numunyenga milambu ya blé ku bukole; nunku bua bualu ebu nsubu ya mabue masonga inuakuibaka, kanuena nushikamamu; tumuma tuimpe tua nvinyo tunuakukuna, kanuena nunua nvinyo yatu.

Mika 6:15

Nenukune maminu, kadi kanuena nuahuola; nenudiate tumuma tua olive, kadi kanuena nudilaba mafuta atu; nenudiate tumuma tua nyinyo mu tshikaminu, kadi kanuena nunua nyinyo yatu.

Agayi 1:6

Nuakukuna bintu bia bungi, nuakuhuola bintu bibalê; nudi nudia, kadi kanuena mua kukuta; nudi nunua, kadi kanuena mua kukuta ne binudi nunua; nudi nudiluatshisha bilulu, kadi kanuena mua kuota nʼabi; ne muntu udi wangata difutu ku mudimu wandi udi udiangata bua kuditeka mu tshibombi tshidi tshitubuke.

Zekâya 14:12

Edi ndikenga dilualua Yehowa kukengesha nʼadi bantu bonso bakaluangana ne Bena Yelushalema, minyinyi ya hamʼbidi habo neyibole hatshidibo bimana ne makasa abo, mesu abo neabole mu bihokohoko biabo, ndimi yabo neyibole mukana muabo.

Malaki 2:3

Monai, nentekeshe maboko enu, nendabe tunvi ha mpala henu, tunvi tua nyama mifila bu milambu mu bidia bienu bia disanka; nebaye nʼenu ku muaba udibo batuimasha.

Dielulula 28:51

bobo nebadie kukumbana kua bimuna bienu, ne bintu biakadiunda mu buloba buenu tô ne hanuajimishibua; kabena banushila kabidi manvua anyi nvinyo mihia-mihia anyi manyi anyi kukumbana kua bimuna bienu anyi bana ba mikoko yenu tô ne hanuajimishibua kudibo.

Dielulula 32:25

Muele wa nvita neubashihe ha bula, ne buowa nebubuele mu nsubu yabo; nebashihe bansongalume ne bansongakashi batshidi tumama, ne bana batshidi bamua mabele ne bakulumpe badi ne nvi ku mitu kuabo.

Ebrewu 10:31

Mbualu bua buowa bua kuhona mu bianza bia Nzambi udi ne muoyo.

Balombodi 6:11

Muanjelo wa Yehowa wakalua, wakashikama muinshi mua mutshi wa telebinta wa mu Ofela, mu buloba bua Yoasha, muena Abiezê; ne muanʼandi Gideona wakadi ushihula blé mu tshikaminu tshia tumuma bua kuyisokoka kudi Bena Midiyana.

1 Samuele 2:33

Muntu undi tshiyi ngumusha ku tshioshelu tshianyi, neikale bua kukusunsuma mu mesu ebe ne bua kunyingalasha mutshima webe; ne bana bonso hadibo balela mu nsubu webe nebafue hatshidibo ne bukole.