Ekesode 32:32 - Mukanda wa Nzambi Dihungila Dikulukulu ne Dihungila Dihia-dihia 2003

³² Kadi katataka biwasua kubabuikidila bubi buabo, kadi biwikala kuyi musue, ndi nkusengelela ne, Unjimishe mu mukanda webe uwakufunda.

MUKANDA WA MYIDI MUKULU

³² Ndi nkusengelela bua ubafuile luse, bua tshilema etshi. Kadi pawabenga, ukupule dina dianyi mu mukanda wa muoyi, uudi mufunde mena a bantu bebe.

Ekesode 32:32 Marejeleo ya Msalaba

2 Samuele 18:33

Kanyinganyinga kakole kakakuata mukelenge, yeye wakabanda ku nsubu wakadi ku mutu kua tshibi, wakadila; hakadiye uya, wakamba ne, Muanʼanyi Abashaloma, muanʼanyi, muanʼanyi Abashaloma! Meme nakadi kukufuila, Abashaloma, muanʼanyi, muanʼanyi!

Misambu 139:16

Mesu ebe akamona bituha bia mubidi wanyi kabiyi bianze kulamakana. Matuku anyi onso akadi mafunda mu mukanda webe, matuku mene awakahangidisha bua meme ngikale ne muoyo, diambedi dituku dimue dia munkatshi muau kadiyi dianze kuikalaku.

Misambu 56:8

Wewe udi ubala nsumpakana anyi; wele binsonshi bianyi mu mulondo webe. Kabiena bifundibua mu mukanda webe, anyi?

Misambu 69:28

Mena abo ajimishibue mu mukanda wa muoyo, kabafundibu hohamue ne mena a bantu bakane.

Ekesode 32:10

nunku kumpumbishi nansha, tshiji tshianyi tshikale tshikole kudibo, neashihe, kadi nenkuvuishe wewe tshisamba tshinene.

Yeshaya 4:3

Hashishe, nebabikile muntu udibo bashiya mu Siona ne utshidi mushale mu Yelushalema ne, Wa Tshijila, mmuntu yonso mene udibo bafunda dina diandi munkatshi mua bantu basungudibue bua kuikaleye ne muoyo mu Yelushalema.

Yezekiyele 13:9

Tshianza tshianyi kabidi netshikale hamʼbidi ha baprofete badi bamona bikena kumona bidi bidinga bantu ne badi bamba mei a mashimi mu kutempa kuabo kua mbuku. Kabena bashikama mu tshilumbuluidi tshia bantu banyi, kabena bikala ne mena abo mafunda mu mikanda ya mena a ba mu tshisamba tshia Bena Isalele, ne kabena bamanye mua kubuela mu buloba bua Isalele; hashishe nenumanye ne, Ndi Yehowa.

Danyele 12:1

Ku tshikondo atshi Mikaele, mukelenge wa banjelo, mulami wa bana benu, neajuke. Makenga neikaleku, katshia tshisamba tshia bantu tshiabanga tô ne ku tshikondo atshi makenga bu nunku kâkadi manze kumueneka; kadi mu tshikondo atshi bana benu bonso badi ne menʼabo mafunda mu mukanda wa muoyo nebabande.

Amosa 7:2

Hakashikishayi kudia mashinde onso a ha buloba, nakamba ne, Mukelenge Yehowa, ndi nkutendekena ne, Ubabuikidile mibi yabo. Yakoba neashindame munyi? Bualu bua udi mushale anu mubalê.

Malaki 3:16

Hashishe, bakadi banemeka Yehowa bakasombeshangana, ne Yehowa wakabateleja matshu, wakabumuna, ne mukanda wa tshivulukidi wakafundibua ku mpala kuandi bua kuanyisha bantu aba bakadi batshina Nzambi ne bakadi banemeka dina diandi.

Malaki 3:17

Yehowa wa misumba udi wamba ne, Bobo nebikale banyi, mu dituku dindi ngenza malu â, nebikale bantu banyi nkayanyi mene; meme nembafuile luse bu mudi muntu ufuila muanʼandi mulume udi umukuatshila mudimu luse.

Dibadika 11:15

Biwasua kutuenzela nunku, ndi nkusengelela ne, Unshihe ku tshianza tshiebe, binasangana luse ku mesu kuebe, bua tshitangidi dikenga dianyi nunku.

Dibadika 11:25

Yehowa wakahueka mu dî ditu, wakasomba nʼandi, wakangata tshituha tshia Nyuma wakadiye nʼandi, wakamuteka kudi bakulu makumi muanda mutekete, hashishe hakalua. Nyuma kudibo, bakamba dî dia Nzambi, kadi kabakenza kabidi musangu mukuabo.

Dibadika 14:19

Ndi nkusengelela ne, Ubuikidile bantu aba bubi buabo, bu mudi bunene bua luse luebe lujalame, bu muwakababuikidila bubi buabo ku Ejipitu to ne katataka.

Luke 10:20

Kadi kanusanki bua nyuma mibi idi itumikila dî dienu, kadi nusanke bua mena enu adi mafunda mu diulu.

Luke 23:34

Yesu wakamba ne, Tatu, ubabuikidile bubi buabo, kabena bamanye bualu budibo benza. Bakabanyangana bilulu biandi, bela nʼabi nshobo.

Rome 9:3

Nakadi kusua kuedibua mulau wa kumushibua hanyi kudi Kilisto, bualu bua bana betu, badi bakuetu ba mubidi.

Dielulula 25:19

Nunku hafila Yehowa, Nzambi wenu, bantu bonso badi nʼenu lukuna mu bianza bienu, ne hanuaheta dikisha mu buloba budi Yehowa, Nzambi wenu, unuha bua nuenu kubuhiana, hashishe nenujimishe tshivulukidi tshia Amaleka muinshi mua diulu; kanuhu muoyo bua bualu ebu nansha.

Dielulula 29:20

Yehowa kena umubuikidila bubi buandi, kadi tshiji tshia Yehowa ne mukau wandi nebimueneke kudi muntu eu ne milau yonso idi mifunda mu mukanda eu neyimukuate, ne Yehowa nenjimishe dina diandi muinshi mua diulu.

Dielulula 9:14

undekele, bua meme neashihe, nenjimishe dina diabo muinshi mua diulu; meme nenkuvuishe wewe tshisamba tshidi tshibahita bunene ne bukole.

Filipe 4:3

E, ndi ndomba wewe kabidi, muenu nʼanyi ku mutshi wa tshikokedi wa bushua, bua wewe ukuatshishangane ne bakashi aba, bualu bua bobo bakenza nʼanyi mudimu wa lumu luimpe, ne Kulemento kabidi ne bakuabo benji nʼanyi ba mudimu, badi ne mena abo mafunda mu mukanda wa muoyo.

Didimanyisha 17:8

Nyama uwakatangila wakadiku ne kenaku, ne udi wamba kuluhuka mu dina didi kadi ne tshishikidilu, udi uya mu dibutuka. Ne badi bikala ha buloba nebakeme, badi kabai ne dina difunda mu mukanda wa muoyo ku tshibangidilu tshia buloba, nebakeme hatangilabo nyama wa luonji, bu muakadiyeku ne kenaku, ne neikaleku.

Didimanyisha 21:27

Kakuena tshintu tshia tshianana tshidi tshibuelamu, nasha kakese; nasha muntu udi wenza bualu bubi ne mashimi; kadi anu badi ne mena abo mafunda mu mukanda wa muoyo wa Muana wa Mukoko nebabuelemu.

Didimanyisha 22:19

ne bikala muntu umusha mei makuabo ku mei a mukanda wa buambi ebu, Nzambi neamumushile tshituha tshiandi ku mutshi wa muoyo ne ku musoko wa tshijila, ne ku malu mene adi mafunda mu mukanda eu.

Didimanyisha 3:5

Udi uhita bukole nealuatshishibue nunku ne bilulu bitoke, ne meme tshiena njimisha dina diandi mu mukanda wa muoyo nasha kakese, ne nenjukule dina diandi ku mpala kua Tatu wanyi, ne ku mpala kua banjelo bandi.