Danyele 10:16 - Mukanda wa Nzambi Dihungila Dikulukulu ne Dihungila Dihia-dihia 2003

¹⁶ Mona! Mukuabo wakadi ne tshinfuanyi tshia muana wa muntu wakalenga ku mishiku yanyi; nakabulula mukana muanyi, nakayikila ne wakadi wimana ku mpala kuanyi, nakamuambila ne, Mukelenge wanyi, bua tshikena kumona etshi kanyinganyinga kakunkuata, tshiena kabidi ne bukole.

MUKANDA WA MYIDI MUKULU

¹⁶ Kadi tshia muoyi tshikuabu, tshifuanangane ne muntu, kundenga ku mishiku. Ke meme kubulula mukana, kuakula tshiakabidi. Meme kuambila muntu uvua muimane kumpala kuanyi ne: ‘Mfumu wanyi, bua bualu ebu budi Mvidi Mukulu mundeje, dibungama ndinkuate. Tshiena ne bukole nansha.

Danyele 10:16 Marejeleo ya Msalaba

Ekesode 4:10

Mose wakambila Yehowa ne, Yehowa, meme tshiena mua kuakula bimpe, nansha diambedi, nansha katshia wabanga kuakula ne muntu webe, bualu bua meme ndi muena tshikukumina.

Ekesode 4:13

Mose wakamba ne, Yehowa, nda nkusengelela ne, Utume muntu ûdi musue kutuma.

Muambi 1:18

Bualu bua mu meji a bungi mudi kanyinganyinga ka bungi; wavudisha lungenyi neavudishe kanyinganyinga kabidi.

Yeshaya 6:7

Wakaditua mukana muanyi, wakamba ne, Mona, edi diakulua mishiku yebe; bubi buebe budi bûmushibue, ne malu mabi ebe adi mabuikidibue.

Yirmeya 1:9

Mu diba adi Yehowa wakolola tshianza tshiandi, wakalenga mukana muanyi. Yehowa wakangambila kabidi ne, Mona, nakuteka mei anyi mukana muebe;

Yezekiyele 1:26

Ha mutu ha diulu diakadi ha mutu habi hakadi tshinfuanyi tshia nkuasa wa bukelenge, muikale ne mubidi wa dibue dia saphir; ne ha tshinfuanyi tshia nkuasa wa bukelenge hakadi tshinfuanyi tshia mundi mushikame mulu amu.

Yezekiyele 3:27

Kadi hangakula nʼebe, nembulule mukana muebe, ne wewe neubambile dî edi ne, Yehowa Nzambi udi wamba nunku! Wasua kunvua, unvue biandi; wasua kubenga, abenge biandi; bualu bua badi diku dia bantombokedi.

Yezekiyele 33:22

Tshianza tshia Yehowa tshiakadi hamʼbidi hanyi dilolo diambedi muntu au muhanduke kayi muanze kufika kundi; ne Yehowa wakamana kubulula mukana muanyi mu diba adi diakalua muntu au kundi dinda; nunku mukana muanyi muakabuluibua ne tshiakadi bu kamama kabidi.

Danyele 12:8

Nakunvua mei â, kadi tshiakâjingulula nansha; nunku nakakonka ne, Mukelenge wanyi, ndekelu wa malu â neikale bishi î

Danyele 4:19

Hashishe, Danyele, udibo babikila ne, Beleteshasâ, wakadi ne mutshima muhandike tô tshituha tshia diba, ne meji andi akamutatshisha. Mukelenge wakamuambila ne, Beleteshasâ, tshilota etshi ne dijingulula diatshi kabikutatshishi nansha. Beleteshasâ wakamukudimuna ne, Mukelenge wanyi, tshilota etshi tshikale kudi badi nʼebe lukuna, ne dijingulula diatshi dikale kudi badi basue kukunyoka.

Danyele 7:15

Meme, Danyele, mutshima wanyi wakalubakana munda muanyi, bikena kumona bia ku mutu wanyi biakankuatshisha buowa.

Danyele 7:28

Eu nshikidilu wa muanda eu. Meme hanyi, Danyele, mutshima wanyi wakahampakana ne buowa, ne mpala wanyi wakandamuka; kadi nakalama muanda eu mu mutshima wanyi.

Danyele 8:15

Hashishe, meme Danyele, hanakatangila tshikena kumona etshi, nakadi nkeba kutshijingulula, ekumona, tshinfuanyi bu tshia muntu tshimana ku mpala kuanyi!

Danyele 8:17

Yeye wakasemena ha buihi ne muaba unakimana. Hakafikeyeku, nakakuatshika buowa bukole, nakatua mpala wanyi hanshi. Kadi yeye wakangambila ne, Teleja, wewe muana wa muntu; tshikena kumona etshi tshidi tshikulesha malu a mu tshikondo tshia kunshikidilu.

Danyele 8:18

Hakadiye wakula nʼanyi, nakashala mufue tshihuka, mutue mpala wanyi hanshi, kadi yeye wakandela tshianza, wakangimanyika kulu.

Danyele 8:27

Meme, Danyele, nakahungila nakadi ne disama matuku makuabo! Hashishe, nakajuka, nakakuatshila mukelenge mudimu wandi. Nakalubakana kabidi bua tshikena kumona etshi, hualu bua tshiakatshijingulula.

Danyele 9:21

bulelela, hanakatshidi utendelela, muntu eu Gabaliele, unakumona ku tshikena kumona tshia diambedi, wakalua kundi lukasa diba dia kufila mulambu wa dilolo.

Luke 1:64

Mukana muandi muakabuluka lubilu, ludimi luandi luakambuluka, wakakula utumbisha Nzambi.

Luke 21:15

meme nenuhe mukana ne lungenyi bidi badi nʼenu lukuna kabai bamanye mua kutantamana ne mua kukudimuna dî.

Yowanane 20:28

Toma wakamuandamuna ne, Mukelenge wanyi ne Nzambi wanyi.

Yoshua 5:14

Yeye wakitaba ne, Nansha, nakutuma bu mukelenge wa musumba wa Yehowa. Yoshua wakamututshila mpala hanshi, wakamutendelela, wakamukonka ne, Mukelenge wanyi udi Wambila muntu wandi tshinyi?

Didimanyisha 1:13

ne munkatshi mua bitekelu bia minda nakamona mukuabo mufuana muana wa muntu, muluate tshilulu tshifika tô ne ku makasa, ne munyungulula ne mukaba wa ngolo ha tshiadi tshiandi.

Balombodi 13:8

Hashishe Manoa wakasengelela Yehowa, wakamba ne, Mukelenge, ndi nkusengelela ne, Witabushe bua muntu wa Nzambi uwakatuma alue kutudi kabidi bua kutuyisha tshibidi mua kuenzela muana utualela.

Balombodi 6:13

Gideona wakamukudimuna dî ne, Mukelenge wanyi, bikala Yehowa nʼetu, malu â onso akatukuata bualu kai? Malu andi a kukema akatuambilabo kudi bakaku betu ehi, hakatuambilabo ne, Yehowa kakatuhatula mu Ejipitu, anyi? Kadi katataka Yehowa wakatula dia, wakatuma mu bianza bia Bena Midiyana.

Balombodi 6:15

Yeye wakamukonka ne, Mukelenge, meme nensungile Bena Isalele munyi? Mona, ba mu diku dianyi badi bahita Bena Manashe bonso bahele, ne meme ndi mutambe buhuekele mu nsubu wa tatu wanyi.