Jeremias 23:27 - Manobo Western Bukidnon OT

²⁷ Kunaan dan ke pinaaǥi te kedtudtula zan te menge teǥeinep dan, igketukù dan is menge etew ku para melipat kedì, iring te kegkelipati kedì te menge kepuun dan he pinaaǥi te ked-azap dan ki Baal.

Jeremias 23:27 Marejeleo ya Msalaba

Zatù 3:7

Mezaat is mibeelan te menge Israilihanen diyà te etuvangan te Nengazen, su midlipatan dan is Nengazen he Megbevayè dan, ne mid-azap dan is menge ledawan ni Baal wey ni Ashera.

Jeremias 29:8

Migkaǥi pa is Nengazen he Mekeǥeǥehem, he Megbevayà te Israel te, “Kenè kew peuwit te menge ebpeneuven wey menge menenagnà he ziyà te keniyu. Kenè niw zaan tuuwi is menge teǥeinep dan,

2 Hadì 21:3

Mid-umanan din benguna is menge simbahan diyà te metikang he menge lugar he imperundus dengan te amey zin he si Hezekia. Mibaal zaan sikandin te menge pemuhatà he para ki Baal wey mibpevaal sikandin te tukud he simbulu te vahi he ed-ezapen he si Ashera, iring te mibeelan ni Hadì Ahab he hadì te Israel. Mid-azap din is menge merayag he egkengaahà diyà te langit.

Zatù 10:6

Mid-uman en maan mebaal is menge Israilihanen te mezaat he igkepauk te Nengazen. Mid-iniyuǥan dan is Nengazen su iyan dan mid-azap is menge ledawan te ed-ezapen he si Baal wey si Ashtoret, wey is menge ed-ezapen diyà te Aram, Sidon, Moab, Ammon, wey Filistia.

Jeremias 9:14

Iyan dan nasì midsunud is kemesinupaken te ǥehinawa zan. Mid-azap dan is duma he menge ed-ezapen sumalà te impenurù kandan te menge kepuun dan.

Deuteronomio 8:11

“Mebpekevantey kew he kenè niw melipati is Nengazen he Megbevayè niw wey kenè niw mesupak is menge suǥù din wey is menge sulunuzen he ibeǥey ku keniyu ǥuntaan.

Deuteronomio 8:14

mebpekevantey kew he kenè kew mekepahambug wey kenè niw melipati is Nengazen he Megbevayè niw he mibpeǥawas keniyu puun te Ehipto he zutun kew pen-uripena.

Deuteronomio 8:18

Piru tentenuzi niw he iyan is Nengazen he Megbevayè niw mibeǥey keniyu te ebilidad he insepian niw, ne mibeelan din heini su para metuman din is kebpekid-uyun din keniyu he impenangdù din diyà te menge kepuun niw. Ne edtumanen din en heini ǥuntaan.

Jeremias 2:32

“Egkelipatan be te raǥa is elahas din etawa visti zin te eseweey? Kenà, piru sikiyu is menge etew ku, nelipatan a keniyu seled te neuǥet he timpu.