Jeremias 2:28 - Manobo Western Bukidnon OT

²⁸ Hendei en is menge ed-ezapen he mibeelan niw para keniyu? Ipeuvey niw ziyà te keniyu su ed-ahaan ta ke ebpekehimu ve sikandan he edlibri keniyu te kelised niw. Su utew mezakel is menge ed-ezapen niw iring kezakel te menge inged diyà te Juda.

Jeremias 2:28 Marejeleo ya Msalaba

Jeremias 11:13

“He menge tig-Juda, utew mezakel is menge ed-ezapen niw, iring kezakel te menge inged niw. Ke sengemenu kahabet is menge zalan diyà te Jerusalem ne iyan daan kahabet te menge pemuhatà he para edtutungan niw te veyewà he para te utew mezaat he ed-ezapen he si Baal.

Isaias 45:20

Migkaǥi zaan is Nengazen te, “Medtiǥum kew ne uvey kew kayi te kediey, sikiyu is nemekepelaǥuy puun te menge nasyun. Wazà ketau te menge etew he ed-uwit-uwit te menge kayu he ed-ezapen dan. Mibpengemuyù dan kayi te menge ed-ezapen dan he kenà ebpekelibri kandan.

Deuteronomio 32:37

Ne ed-insà is Nengazen diyà te menge etew zin te, “Hendei en is menge ed-ezapen dan, he iring te vatu he endilungè dan?

Zatù 10:14

Maan is kenè kew ziyà ebuyù te tavang te menge ed-ezapen he mibpilì niw he iyan ed-ezapen niw? Iyan niw sikandan ipelibri keniyu emun edlised kew.”

Isaias 46:7

Edtiangen dan heini, ne id-untud dan diyà te selevukà duen, ne zutun dà heini. Ne kenè en ebpekaawà dutun. Emun duen ebpengemuyù dutun, ne kenà heini edtavak, ne kenà heini ebpekelibri kandan te menge kelised dan.

Hoseas 10:1

“Is menge tig-Israel, iring te pinemula he paras he merapung wey mahabet is menge veǥas din. Dutun te ked-uswag dan, mezakel he menge pemuhatà is mibeelan dan, ne mibpekekempet dan is tedeman he menge vatu he ed-ezapen dan.

Isaias 46:2

Pudu heini ebpekezungul ne kenè dan ebpekehimu he edlibri te mid-uwit kandan. Ragkes mismu heini is dezuwa he mibihag.

2 Hadì 3:13

Ne migkeǥiyan ni Elisha haazà is hadì te Israel te, “Hengkey is lavet ku kenikew? Diyè ka pevayà te menge ebpeneuven he midseriǥan te amey nu wey iney nu!” Migkaǥi haazà is hadì te Israel te, “Kenà, su iyan is Nengazen mid-uwit kenami te tetelu kayi he lugar su wey key zin ikeveǥey ziyà te hadì te Moab.”

Jeremias 1:16

Edsilutan ku is menge etew ku tenged te kelelalung dan. Inselikwey e zan pinaaǥi te kedtutung dan te veyewà para te zuma he menge ed-ezapen. Uya, mid-azap dan is menge ledawan he vineelan dan.

Jeremias 11:12

Ne ziyà sikandan ebuyù te tavang te menge ed-ezapen he ebpemuhaten dan te edtutungen he veyewà, piru kenà heini ebpeketavang kandan emun egkeumahan dan en te kezeetan.

Jeremias 30:7

Utew subra is mekahandekhandek emun egkeume en heeyan he timpu! Wazè en ebpekeiring keniyan he timpu. Timpu heeyan te kelised te menge kevuwazan ni Jacob, piru ziyà te huziyan he timpu egkelibri sikandan keniyan he kebpekesavuk.

Jeremias 37:19

Hendei en be sikan is midseriǥan niw he menge ebpeneuven he nenagnà he kenà edsurungen te hadì te Babilonia heini is inged?

Habakuk 2:18

“ ‘Hengkey is pulus te zuma he menge ed-ezapen? Kayu zè man heeyan etawa mital he mibeelan te etew, ne kenè man heeyan ebpekekaǥi mehitenged te tutuu. Ne maan is midtuuwan heeyan te menge etew he mibaal zuen? Kenà ganì heeyan ebpekekaǥi.

Habakuk 2:19

Kehizu niw te egkaǥi ziyà te ledawan he kayu etawa vatu te, “Kepukew ke en ne tevangi key.” Kenè ganì heeyan ebpekepenurù keniyu. Minsan mibpekeplaan heeyan te vulawan wey pelata, piru kenà heeyan uuyag.

Isaias 57:13

Uya, kenà ebpeketavang is menge ed-ezapen niw emun ebuyù kew te tavang diyà te kandan. Id-amin sikandan idlayap te keramag; idlayap dan te sengehiyup dà. Piru is menge midsarig kediey ebpekeubpà diyà te tanà ne ed-ezapen e zin diyà te segradu he vuvungan.