Hibriyuhanen 12:1 - Manobo Western Bukidnon

¹ Ne sikitew zaan, menge suled, kayi te kedtuu tew te Megbevayà, ne iring kiw te ebpelumlumbeey. Ne g̵eina te utew mezakel is menge tumutuu zengan he nekepaahà kenitew he metinumanen is Megbevayà, kinahanglan he ed-engkezan tew en is minsan hengkey he ebpekesanggen kenitew te edlumbà wey is kenà hustu he ulaula he henduen be te layun tew egkeulaula, ne ebpekezesen kiw te ebpelelag̵uy taman te ebpekeuma kiw ziyà te edungguan tew.

Hibriyuhanen 12:1 Marejeleo ya Msalaba

Mateo 10:22

Egkuntedahan kew te langun tenged te sumusundan ku sikiyu. Iyan, sikan is edhamen te kedtuu zin kedì taman te ketepusan dutun te menge kemeresayan, ebeg̵ayan te untung he wazè din pidtemanan.

Mateo 24:13

Iyan, sikan is kemulu pa edtuu ke egkeuma haazà is ketepusan te menge kemeresayan, iyan ebeg̵ayan te untung he wazè din pidtemanan.

Marcos 10:50

Ne zutun midhitindeg sikandin ne midluwas din is divavew he kumbalè din ne midhendiyà te ki Jesus.

Lucas 12:15

Ne migkag̵i si Jesus diyà te menge etew te, “Purungi niw ventayi is ulaula niw su wey wazà keleleg̵ed diyan te keniyu. Su is ibmeupiya te untung te etew, kenà ebpuun te mezakel he menge azen.”

Lucas 16:28

su zuen lelima he hazi ku he maama. Ne kinahanglan he metueni zan he zaan wey zan kenà mekehendini te ubpeey te ebpenresayen.’

Lucas 21:34

Ne ke si Jesus te, “Uram kew wey kew kenà kayi zà egketaman te kegkebibu wey kebpemenginum wey te kedlag̵ud niw te menge kelibutanen he menge kinahanglan niw. Su emun kenè kew ed-uram ne egketik-awan kew egkesaut te andew te kedlimasa te Megbevayà te menusiyà. Ne egkeiring kew te egketelebpì he rumat.

Juan 3:32

Egkeg̵iyen din is neehè din wey nezineg din diyà te langit, iyan, mezelag duen ebpekezawat te egkeg̵iyen din.

Juan 4:39

Ne mezakel is menge tigSemarya zutun he nemeketuu ki Jesus tenged te migkag̵i zutun te vahi he ke sikandin te, “Netagnè din is langun he nengeulaula ku.”

Juan 4:44

Migkag̵i si Jesus te, “Is ebpeneuven te Megbevayà, kenà edtehuzen te menge etew ziyà te kandin he keugelingen he inged.”

Ruma 12:12

Kinahanglan he layun kiw edlipey su zuen utew meupiya he egkezawat tew keuzemà. Ed-entusen tew is menge kemereg̵enan ne layun kiw ed-ampù diyà te Megbevayà.

Ruma 2:7

Iyan, duen menge etew he edhemenan dan is meupiya he ulaula su iyan ed-isipen dan layun is kedelig̵a wey is kedtulusa kandan keuzemà te Megbevayà wey is kegketehuza zin kandan keuzemà. Ne untung he wazè din pidtemanan is ibeg̵ey zin kandan.

2 Kurintu 7:1

Ne g̵eina te iyan heini impenaad kenita te Megbevayà, ne edlumpiyuwen ta is menge ulaula ta su wey wazà minsan hengkey he meremerik he ulaula te lawa ta wey meremerik he isip ta. Ne ebpurungan ta is ulaula ta su wey meheg̵eti is kebmetazeng ta pinaag̵i te layun ta kedtehuza kandin.

Gelasya 2:2

Umba midhendiyà a su impinted kedì te Megbevayà haazà is kedhendiyè ku. Ne kebpekeuma zey zutun ne midtig̵um is menge egalen te menge tumutuu he iyan dan dà ne impesavut ku kandan ke hengkey is Meupiya he Tudtulanen he ibpenurù ku ziyà te menge etew he kenà menge Hudiyu. Egkesuatan ku zutun he kenà maawà is pulus te nengeveelan ku en wey is kemulu ku pa ebeeli.

Gelasya 5:7

Mibpurungan niw zengan te ed-ikul is hustu he ibayà. Maan is idtug̵ut niw he zuen ed-eg̵en keniyu wey niw kenè en metuuwi is tutuu he tuluuwen?

Ipisu 4:25

Umba, menge suled, engkezi niw is kedtarùtarù. Kinahanglan he tutuu is egkeg̵iyen niw ziyà te menge zuma niw. Su nesevaha kiw he pudu parti te lawa ni Kristu.

Pilipus 1:30

Nekedreragkes kiw en is ed-antus te kemeresayan tenged te Meupiya he Tudtulanen. Ne heini is menge kemeresayan he nehitavù kediey zengan, ne kemulu g̵untaan kenè ku egkesuwey, sumalà is nezineg niw.

Pilipus 2:16

he edtayew kandan su ibpesavut niw kandan is lalag he ebpekeveg̵ey kandan te untung he wazà pidtemanan. Ne emun iyan heini ed-ul-ulahan niw, utew ebmeupiya is g̵ehinawa ku keuzemà dutun te andew te kedlikù ni Kristu su egketuenan ku zutun he zekelà is pulus te kedhag̵ù ku ziyan te keniyu.

2 Timoteo 2:4

Sikan is mibpesundaru, ne kenà egkehimu he ed-ul-ulahan din is ed-ul-ulahan te kenà sundaru, su kinahanglan he layun sikandin andam te kebpenunuat te egalen din.

2 Timoteo 4:7

Nepasad ku en is kebenggaa kedì te Megbevayà; nekeuma ad te edungguan te edlumbà. Hustu is ked-ikula ku te tutuu he tuluuwen.

Hibriyuhanen 6:15

Ne si Abraham, utew sikandin meinentusen he edsarig te Megbevayà taman te netuman te Megbevayà is penaad din kandin.

Santiago 1:3

Su nesavut niw en he emun egkeantus niw is penggezam, egkevig̵eran is ked-antus niw.

1 Pedro 2:1

Ne g̵eina te veg̵u ki en he etew, ed-iniyug̵an te en is minsan hengkey he kebpesipala wey is kedtarùtarù. Kinahanglan he kenà tarù is kedsundan ta te Megbevayà; kenè ki egkesina ne kenè ki ebpemenulà.

1 Pedro 4:2

Ne tenged kayi, puun dutun taman te kebpatey zin egkehimu he kenè din en human edtumanen is mezaat he kebayà te lawa zin, kekenà, iyan din edtumanen is egkesuatan te Megbevayà.

1 Pedro 5:1

Sikiyu is ebmeg̵urangen te menge tumutuu, duen idhangyù ku keniyu su ebmeg̵urangen a zaan. Nekevantey a te kedresaya zengan ki Kristu ne iring keniyu, ebpekeseled a zaan te vulawan he ed-ulian he ibpeg̵awag̵awa keuzemà.

1 Pedro 5:12

Mid-ug̵upan a ni Silvanu te edsurat kayi. Suled tew sikandin he utew egkeserig̵i. Iyan insurati ku keniyu kayi su wey ku meheg̵et is kedtuu niw. Ibpesavut ku keniyu he impenurù ku en keniyu he tutuu is gag̵ew te Megbevayà keniyu. Ne kenè niw heini lipati.

2 Pedro 1:6

Ne is kedsavut, edheg̵etan ta te edtengkaan he ed-ul-ulahan. Ne haazà daan, edheg̵etan ta te kebmeinentusen. Ne is kebmeinentusen, edheg̵etan ta te kebpevayàbayè ta te Megbevayà.

Impezayag 1:9

Iyan a si Juan is sevaha he suled niw tenged te kedtuu ku ki Jesus. Iring keniyu nekeantus a zaan te menge kemeresayan su sakup a zaan te g̵inhedian din. Tenged te ingkepauk te gubirnu is kebpenudtul ku te Lalag te Megbevayà wey is kebpenurù ku te impesavut ni Jesus, impesivey a ne ziyà a ibpeubpà te sengepupulu he egngezanan te Patmus.

Impezayag 13:10

Is menge etew he imbanglis kandan is kebpirisuwa kandan ne siguradu egkepirisu sikandan. Ne is menge etew he imbanglis kandan he g̵umaan is idhimatey kandan, gumaan iyan is idhimatey kandan. Kinahanglan he sikitew is menge tumutuu te Nengazen, edsarig kiw kandin wey ed-antus kiw te kemereg̵enan.

Impezayag 22:16

“Siak si Jesus, midsug̵ù ku ziyan te keniyu te menge tumutuu is belinsug̵uen ku wey zin metudtul heini is langun. Iyan a sikan is kevuwazan te hadì dengan he si David. Iyan a sikan is iring te mekevugwas, kes bituen he ed-anlag ke egkepkepawè en,” ke si Jesus.

Impezayag 3:10

Ne tenged te metinumanen kew te sug̵ù ku he med-antus kew, ebentayan ku sikiyu wey kew kenè en ebpekesag̵ad te limas he egkeantus te tivuuk he menusiyà he ibpenggezam kandan.