2 Timoteo 2:24 - Manobo Western Bukidnon

²⁴ Ne netuenan nu zaan he kinahanglan he kenà mebpekid-eg̵et is sulug̵uen te Nengazen, kekenà, purungi zin layun is minsan hentei he etew. Kinahanglan he metau he ebpenurù ne mepelevayen daan sikandin.

2 Timoteo 2:24 Marejeleo ya Msalaba

Mateo 12:19

Ne kenà sikandin ebpekidlawan; kenà daan ebpemensag; kenà daan egkezineg sikandin he edikursu ziyà te menge kersada te inged.

Juan 6:52

Ne zutun egkesumpakì is menge punuan he menge Hudiyu. Ke sikandan te, “Ebmenmenuwen kayi te etew is kebeg̵aya zin kenitew te lawa zin su wey tew mekaan?”

Nengeulaula 15:2

Ne si Pablo wey si Bernabe, wazè dan dewata haazà is impenurù dutun te menge etew, ne utew mezesen is kebpekidlewanè dan, umba, is menge tumutuu zutun, midsug̵ù dan si Pablo, si Bernabe, wey is duma pa kandan he medhendiyè dan te Hiruselim wey zan ikeinsà haazà diyà te menge epustul wey menge ebmeg̵urangen te menge tumutuu ziyà.

Nengeulaula 23:9

Umba, mid-iseg dan mebmeg̵urub dutun is ebpevenbensag̵ey. Ne zutun midhitindeg is menge Perisiyu he menge menunudlù te kesug̵uan ne ke sikandan te, “Wazà mezaat he netuenan dey he mibeelan kayi te etew. Kela ke tutuu iyan he zuen mulin-ulin wey ke velinsug̵uen be te Megbevayà he mibpekidlalag kandin.”

Nengeulaula 7:26

Ne hein nepawà dutun, midlikù med-uman si Moises. Ne zuen neehè din he zezuwa he menge Hudiyu he ebpetebekà. Ne ebpelangen din pezem haazà is dezuwa su ke sikandin te, ‘He menge suled, kenè kew medtebek su teltelesuled kew.’

2 Kurintu 10:1

Duen egkag̵i he siak, si Pablo, telawen a emun diyan a te keniyu, iyan, memeg̵arang kun is menge lalag ku keniyu emun edlelag̵an ku sikiyu pinaag̵i te surat. Iyan, guntaan, kenà meg̵arang is menge lalag ku, kekenà, edhangyù a keniyu pinaag̵i te menayù he menge lalag iring te menayù wey velig̵eg̵awen si Kristu.

2 Kurintu 10:4

Su is menge ketezengan, he ke và dà gumaan, he idsukul zey te mezaat, ne kenà ebpuun te etew, kekenà, mekeg̵eg̵ehem utew su ziyà ebpuun te Megbevayà. Ne heini is menge ketezengan, kenà egkesukulan te minsan hengkey he tarù he ketezengan he igkuntada te Megbavayà minsan ke utew melig-en.

2 Kurintu 6:4

Ne umba ebpurungan dey is ulaula zey su wey zey ikepaahà he menge sulug̵uen key te Megbevayà te minsan hengkey he paag̵i. Ne tenged kayi ed-antus key te minsan hengkey he kemereg̵enan, kemeresayan, wey menge samuk.

Gelasya 5:22

Egketuusan ta zaan is menge ulaula he egkehimu pinaag̵i te g̵ehem te Wag̵as he Mulin-ulin. Su emun ed-uwiten ki te Wag̵as he Mulin-ulin, mahal zini te g̵ehinawa ta is menge zuma ta, layun ki egkelipey, melinawen layun is gehinawa ta, mepelevayen ki, belig̵eg̵awen ki, metulanged ki, metinumanen ki,

Ipisu 4:2

Kinahanglan he kenè kew pegalbu, kekenà, peketulanged kew wey mebmeinentusen kew. Ipeehè niw is gag̵ew niw ziyà te kada sevaha keniyu pinaag̵i te kebmepelevayen niw.

Pilipus 2:14

Is langun he ebpeveelan din keniyu, tumana niw te wazà kebpeneremudtemud wey kebelivad.

Pilipus 2:3

Kinahanglan he kenà kew mebpekidlawan ne kenè kew mebpelavew, kekenà, isipa te minsan hentei keniyu he minus is pid-etawan din kenà te zuma zin.

Kulusas 3:13

Ed-entusen ta, ne ebpeseyluwen ta is menge zuma ta he ebpekesupak kenita. Kinahanglan he iring te mibpesaylu kiw te Nengazen tew ebpepespeseyluwè kiw zaan.

1 Tiselunika 2:7

Mibpurungan dey sikiyu; iring key te iney he metulanged te menge anak din.

1 Timoteo 6:11

Ne sikew mulà, sulug̵uen ka te Megbevayà; likayi nu is langun he iring kayi he menge ulaula. Hemeni nu is metazeng he ulaula, is kedtumana te egkesuatan te Megbevayà, is kedsarig kandin, is kegkeg̵eg̵awi nu te menge zuma nu, is kebmeinentusen te menge supak dan, wey is kelinew te ulaula nu.

Tito 1:1

Sikew, Tito, ebpesuratan ku sikew. Iring ka te tutuu he anak ku su is kedtuu nu te Nengazen, ne iring daan te kedì he kedtuu kandin. Berakat he ikeg̵ag̵ew ka te Megbevayà wey te Menluluwas tew he si Jesu Kristu wey veg̵ayi ke zan te melinawen he kebpekesavuk. Iyan a si Pablo is sulug̵uen te Megbevayà wey is epustul, he ke và dà egkeg̵iya, sug̵ù ni Jesu Kristu. Iyan insug̵ua zin kedì su wey ku meheg̵et is kedtuu te menge etew he pinilì te Megbevayà, ne wey ku zaan meheg̵et is kedsavut dan te tutuu he tuluuwen he iyan edtuuwan ta. Elin daan insug̵ua zin kedì is wey zan mesavut he ebpekeperateng dan te untung he wazà pidtemanan. Dengan te wazè pa limbag̵a is minsan hengkey, migkag̵i te Megbevayà he ibeg̵ey zin kenitew heini is untung ne netuenan ta he kenà egkehimu he kenè din edtumanen is egkeg̵iyen din. Ne g̵untaan iyan en timpu te kebpetueni zin kayi te untung pinaag̵i te Meupiya he Tudtulanen. Ne heini he tudtulanen, insarig kediey te Megbevayà he menluluwas tew.

Tito 1:7

Ne g̵eina te insarig kandin te Megbevayà is kedumala te menge tumutuu, kinahanglan he wazà supak din. Kenà sikandin mebmandarmandar zà; kenà sikandin eengeren. Kinahanglan he kenà sikandin lelenguten, kenà sikandin ebpemeg̵espeg̵es ne kenà iyan dekelà diyà te g̵ehinawa zin is selapì.

Tito 1:9

Kinahanglan he zutun te kebpenurù din, kenè din suwayi is tutuu he tuluuwen he iyan impenurù ta. Su emun iyan ibpenurù din is tutuu he tuluuwen, egkeheg̵et is kedtuu te ebpememineg kandin ne igkepesavut din he utew nengesayep is edsumpalit te penurù din.

Tito 3:2

Keg̵iya nu kandan he kenè dan med-ituk te minsan hentei, kekenà, melinawen is kedepitè dan te langun, mebpekid-emig̵u zan te langun, wey kenè dan mepelevawen.

Santiago 1:1

Iyan a si Santiago is teg̵isurat kayi. Sulug̵uen a te Megbevayà wey te Nengazen tew he si Jesu Kristu. Kemusta kew is langun he menge g̵aked te Megbevayà he nekedsusuwey zini te tungkup te kelibutan.

Santiago 3:17

Is etew he ziyà ebpuun te Megbevayà is ketau zin, wazà igkesewayi kandin. Melinew is kedepitè din te zuma he etew, ebpurungan din is menge zuma zin; kenà sikandin mevurut, kekenà, mepezumdumahan. Hihizuwen wey metulanged sikandin; wazè din ibpelavi he minsan hentei ne kenà uvag dà is kedtuu zin.

Santiago 4:2

Duen egkesuatan niw he kenè niw egkekuwa ne tenged dutun ebpekeisip kew te kebpemumunù. Duen egkeimahan niw, iyan, kenè niw egkeangken ne tenged dutun ebpekidsavè kew wey ebpekidtebek kew. Umba kenè niw egkekuwa is egkesuatan niw su kenè niw ebuyuen diyà te Megbevayà.

1 Pedro 3:8

Duen pa egkeg̵iyen ku keniyu te langun ne iyan is: kinahanglan he mesevaha is isip niw wey g̵ehinawa niw. Mebpepurpurungè kew wey megig̵ineg̵awè kew su iring kew en te teltelesuled. Kinahanglan he memetulanged kew wey kenè kew menge mepelevawen.

Hudas 1:3

Minahal ku he menge suled, minsan pa te iyan aney he egkesuatan ku is ebaal a te surat he ibpeuwit ku ziyan wey ku ikeseysey ziyan te keniyu is kedlibriya kenitew te Megbevayà, iyan, utew en guntaan epiki he ebpesuratan ku sikiyu wey ku sikiyu mesembag̵i. Kinahanglan, menge suled, he pekezesen kew sukul te menge etew he edhelinen dan pezem is tutuu he tuluuwen he imbeg̵ey te Megbevayà. Haazà is tuluuwen, imbeg̵ey zin kenitew te menge g̵aked din ne kinahanglan he kenè en ed-umanan te minsan hentei.