Ɛ́bɛlʉʉ 3:6 - Kɑɑ Fí

⁶ Lɑ́ ɛ́ ɡʉ nǔu Kɛlístɔ, ɑ jí yɛ́ pɔ ndɑꞋ yúu mi Sɛ́ kɑ cúnɛ ŋɡɔ ɛ́ ŋ́ɡɛ mbɔ́ ɡú, ḿbɔ́ mɔ́ɔ-ndɑ́, ẅí pɛ́ kɑ tíknɛ wɛ́ pɑ́Ꞌ ɑ ɡʉ ɛ́sɑ́Ꞌ pʉɔ-Sɛ́. Pʉɔ-Sɛ́ lɔk ḿbɔ́ pɔ wɛkŋɛ, pɑ́Ꞌ pɛkŋɛ lɑɑ ŋ́kúꞋlɛ yúu mi pɛkŋɛ kɑ pɛ́mnɛ tɛ pɛkŋɛ pɔɔ ḿmʉꞋlɛ, ḿbɛn ńnɑ́ŋ ḿbɔ́ ńdɔk pɔ kɑꞋmɛ ńzẅíꞋlɛ yúu mi Sɛ́ kɑ kɑꞋnɛ mbɔ̌ pɛkŋɛ.

Ɛ́bɛlʉʉ 3:6 Marejeleo ya Msalaba

Mɑtʉ̈ɔ 10:22

Pʉɔ tsʉʉ ɡʉ ńdɑ́Ꞌ ḿbɑɑ wʉ́ʉ mɛlɑ́Ꞌ wɑ́ɑ, lɑ́ ŋu ẅí ɑ sʉknɛ kɛ́ kɑ́ɑ ɡʉ ŋ́ɡɛ ńduk.

Mɑtʉ̈ɔ 16:18

Ŋ ɡʉ ŋ́kɛ́ ḿbɛn ɛ́sẅíi wú, kwɑꞋ nɛ́nẅín, ŋɡɔ: «Ɔ Pyɛ̂, ńdɔk ńcú ŋɡɔ ŋɡɔꞋ, ŋ ɡʉ ŋ́ɡɛ ńtík cúꞋlɛ-pʉɔ pɑ́ɑ ndǔ ŋɡɔꞋ ɛ̂yɑ́. Tɛ mbɑ nɛvú pɔɔ lɑ́Ꞌ ŋ́kuꞋ nɛnʉꞋnɛ yîyɑ́ cúꞋlɛ pɔ́.

Mɑtʉ̈ɔ 24:13

Lɑ́, ŋu ẅí ɑ ɛ́sʉk sʉknɛ kɛ́ kɑɑ ɡʉnɛ ŋ́ɡɛ ńduk.

Pʉɔ-Lɔ́mɑ 11:22

Jí ŋɡɔ Sɛ́ lɑɑ ḿbɔ́ yi ɑ ɡẅɛɛ pɔŋtʉ́m, mbɔ ɑ pɛn cʉ́ɔk. A kɑ cʉ́ɔk pʉɔ pi pɔ́p kɑ vunɛ sɛ́. M bɛn ḿbɔ́ ŋ́ɡẅɛɛ pɔŋtʉ́m nǔu ɡu. Lɑ́ ɛ́ sɛ́ ḿbíkŋɛ ŋɡɔ ɔ kɛ́ ḿbɔ́ ŋ́kẅiꞋ ŋ́ɡɛ pɔ yúu mi ɛ́ pɔŋnɛ wɛ́, tɛ ɛ́ pɔɔ pɔ́Ꞌɔ pɔ́, mbɔ ɑ ɡʉ ńzɑ́Ꞌ wú mɛꞋ pɑ́Ꞌ pɔ́tʉ́ lɑ́.

Pʉɔ-Lɔ́mɑ 12:12

Pʉʉ ńnɑ́ŋ nɛ́ tsɑ́ɑtɛ mbíꞋ yúu mi pʉʉ sɛ́ ńzẅíꞋlɛ. Ŋɡʉ̈ɔ́Ꞌ lɑɑ ŋ́kúu wʉ́ʉ, pʉʉ sʉk sʉknɛ. Pʉʉ kɛ́ ḿbɔ́ ḿbúꞋ mbɔ́ pɔ mbɔ̌ Sɛ́ kɛ́ kɑ́ɑ.

Pʉɔ-Lɔ́mɑ 15:13

Pɔ́Ꞌɔ, mɔ sɛ́ ńtsɑ́ɑ ŋɡɔ Sɛ́ ẅí jʉ́ ɡɛnɛ lɑ pɛ́ nɑ́ŋ ḿbɔ́ ńzẅíꞋlɛ yúu, ɑ lɛɛ nǔu pɑ́Ꞌ pʉʉ zɑ́pnɛ tʉ́m nǔu wɛ́, ŋ́ɡɛ tsɑ́ɑtɛ pɔ́p mɔ́fíitɛ jʉ́ tʉ́m yʉ́ʉ, ńjí ŋɡɔ Zẅikŋɛ Lɛ́ɛnɛ́nɛ ɡʉ ńdɔk mɛtʉʉ mɛ́ ŋ́ɡɛ pʉʉ pɔ́ kwɑꞋ pɑnɑ́ŋ ńzẅíꞋlɛ yúu mi Sɛ́ kɑ kɑ́Ꞌnɛ.

Pʉɔ-Lɔ́mɑ 5:2

Jʉ́ Yɛ́su kɑ tsɔ́Ꞌnɛ sɛ̂ndúŋ lɑ Sɛ́ ɡɑ́ fuꞋ níinɛ yɛkŋɛ pɑ́Ꞌɑ, tɛ ɛ́ tsʉ́Ꞌ ŋ́ɡɔ́ ḿbɔ́ pɔ mbɔ̌ pɛkŋɛ pɔ́Ꞌɔ ɛ́fú nǔu pɑ́Ꞌ pɛkŋɛ zɑ́pnɛ tʉ́m nǔu jʉ́ Yɛ́su. Pɛkŋɛ pɑ́Ꞌɑ tsɑ́ɑtɛ pɔ́ tʉ́m pɛkŋɛ tɛꞋ, mbíꞋŋɡɔ pɛkŋɛ nɑ́ŋ ḿbɔ́ ńzẅíꞋlɛ pɑ́Ꞌ Sɛ́ ɡʉ ŋ́ɡɛ ŋ́ɡɑp yúu mi ɛ́ nǔu nɛɡúꞋ wɛ, ŋ́ɡɑ́ yɛkŋɛ.

1 Kɔlɛ̂ŋtɛ 3:16

Pʉʉ kɑ pɔ́ ńjí ŋɡɔ pʉʉ pɑ́Ꞌɑ ḿbɔ́ ndɑ́-nɔŋpɔꞋ, Zẅikŋɛ-Sɛ́ pɔ́ tsẅɛ́ tsɛtú pɔ́ ɔɔ?

1 Kɔlɛ̂ŋtɛ 6:19

Pʉʉ kɑ́ pɔ́ ńjí ŋɡɔ mbʉʉ yʉʉ ndɑ́-Zẅikŋɛ Lɛ́ɛnɛ́nɛ pɔ́ kíi? Yîyɑ́ Zẅikŋɛ tsẅɛ́ tsɛtú, mbɔ Sɛ́ kɑ ɡɑ́nɛ mbɔ̌ pʉʉ. Pʉʉ pɔɔnɛ ɡẅɛɛ túmbʉʉ yʉ́ʉ pɔ́.

2 Kɔlɛ̂ŋtɛ 6:16

Mbɔ pɛ́ lɔk ndɑ́-nɔŋpɔꞋ-Sɛ́ pɔ́p yúu mi pɛ́ ɡúꞋlɛ ŋɡɔ ɛ́ mɛsɛ́ ńdɔk ɛ́fúŋ tɑ́Ꞌ yúu ŋɡɔ́ku? Pɛkŋɛ zɛɛ ḿbɔ́ ndɑ́-nɔŋpɔꞋ-Sɛ́ ẅi ɑ ḿbɔ́ ńcú mbɔ̌ pɔ́p, pɑ́Ꞌ kwɑꞋ jʉ́ kɑ cúnɛ ŋɡɔ: Mɔ, ŋ ɡʉ ŋ́ɡɛ ńtsʉ́Ꞌ ńnɑ́ŋ pɔ tsɛtsɛt pɔ́p, ḿbɔ́ nɛn tsɛtsɛt pɔ́p. Mɔ ŋ́ɡɛ ḿbɔ́ Sɛ́ wɔp, pɔ́p pɔ́ pʉɔ pɑ́ɑ.

Ŋɡɑlɑ̂t 6:10

Pɔ́Ꞌɔ lɑ́, pɛkŋɛ lɑɑ ḿbɛ́t ŋ́ɡẅɛɛ shʉ́, pɛkŋɛ ɡɛ nu sʉ́Ꞌnɛ mbɔ̌ pʉɔ tsʉʉ, ńtsuŋ ŋ́ɡɛ pɔ mbɔ̌ pɔ́ɔpɛ́mɑ́ pi pɛkŋɛ pɛpɔ́p zɑ́pnɛ tʉ́m nǔu Kɛlístɔ.

Ŋɡɑlɑ̂t 6:9

Kɔɔ pɛkŋɛ kɛ ŋ́kɑ́ɑ nɛɡɛ nu sʉ́Ꞌnɛ, mbíꞋŋɡɔ pɛkŋɛ lɑɑ ŋ́ɡɛ nu sʉ́Ꞌnɛ ńdɔk ŋ́ɡʉ pɔ nɛ́ mbi, mbɔ ŋkɑ́ ɡʉ ńdɑ́Ꞌ ŋ́kuꞋ, Sɛ́ ɡɛ pɛkŋɛ lɑk yúu tɛꞋ.

Ɛ́fɛ̂zɛ 3:12

Pɑ́Ꞌ pɛkŋɛ lɑtnɛ mbʉʉ, ḿbɛn ḿbɔ́ ńzɑ́p tʉ́m nǔu jʉ́ Kɛlístɔ lɑ́, pɛkŋɛ ɡẅɛɛ pɑ́Ꞌ mbɔ pɛkŋɛ ɡʉ nɛjɔ́ŋ Sɛ́ tɛ yɛcɔ́ yúu pɔɔ wɛkŋɛ tɔꞋ, pɛkŋɛ kɛ́ ḿbɔɔ pɔ́k.

Kɔlɔsíyɛ̂ŋ 1:23

Lɑ́, ɛ́ kɛ́ ḿbɔ́ ḿbíkŋɛ ŋɡɔ pʉʉ zɑ́p tʉ́m nǔu jʉ́ Yɛ́su ńjí ŋɡɔ pʉʉ ɡʉ tʉ́ʉ kɛ́ zɔŋɛ, kwɑŋɛ yʉ́ʉ kɛ́ ńtʉ́ʉ pɔ nǔu yúu mi pʉʉ sɛ́ ńzẅíꞋlɛ mbɔ̌ Sɛ́, mbɔ pʉʉ kɑ zúꞋ yîyɑ́ yúu ŋkɑ́ yi pɛ́ kɑ pɔ́ ńcẅii Ŋkʉʉ Sʉ́Ꞌnɛ mbɔ̌ pʉʉ, ɛ́ pɔ́ pɔ wɛ́tɛ́ ẅí pɛ́ cẅinɛ mbɔ̌ ŋumɛsɔŋ tsʉʉ ndǔ ŋɡɔŋ. Mɔ Pɔ̂l yɑ́ɑ fɑꞋ nɛcẅi ẅîwɑ́ Ŋkʉʉ.

1 Tɛsɑlɔník 5:16

Pʉʉ pɔ́ ńtsɑ́ɑtɛ tsɑ́ɑtɛ́nɛ ŋkɑ́ tsʉʉ.

2 Tɛsɑlɔník 2:16

Tɑ̌ɑ wɛkŋɛ Sɛ́ kɑ kɔŋ wɛkŋɛ, ńdɔk ŋ́ɡɑ́ fuꞋ fɛ̌ɛ yɛkŋɛ, ńní mɛtʉʉ mʉ́kŋɛ nǔu ntɛ́ yi ɛ́ ŋ́ɡʉ ńdɑ́Ꞌ ḿmɛ pɔ́, ḿbɛn ŋ́ɡɛ pɛkŋɛ nɑ́ŋ ḿbɔ́ ńzẅíꞋlɛ yúu sʉ́Ꞌnɛ yi ɑ kɑ kɑꞋnɛ mbɔ̌ pʉɔ pɛ́. Pɔ́Ꞌɔ, pɛk sɛ́ ńdɔ́ɔ mbɔ̌ wɛ́ mbɑ mbɔ̌ Tsɑpʉɔ wɛkŋɛ Yɛ́su Kɛlístɔ ŋɡɔ:

1 Timɔtɛ́ɛ 3:15

nɛpɔ́ yi n dɑɑ mbɔɔ fɛ́Ꞌnɛ ńtɔ́ pɔ́, ɔ fúŋ yɔ ŋwɑꞋnɛ, ńzúꞋ pɑ́Ꞌ pʉɔ-Sɛ́ ɡẅɛɛnɛ nɛnɛn pɔ́Ꞌɔ, tsɛt cúꞋlɛ-pɔ́ɔ-Sɛ́. Yîyɑ́ cúꞋlɛ pɔ́ yi pʉɔ-Sɛ́ ẅi ɑ ntʉʉ. CúꞋlɛ ɛ̂yɑ́ tík ntɔ́ɔ nǔu nu nɛ́nẅín pɑ́Ꞌ ntɔ́ɔ-ndɑ́.

Ɛ́bɛlʉʉ 1:2

Ɛ́ kɛ́ ḿbɔ́ nǔu yɛkŋɛ kɛm-njí yɔ yí ɛ́ tsʉ́Ꞌ ḿbɔ́ pɔ yɛ́ lɔk ndẅiklɛ, ɑ cú nu mbɔ̌ pɛkŋɛ, ŋ́ɡɔ ńcú, ńdɛɛ pɔ nǔu Mɔ́ɔ nɛ. A pɔ́ jʉ́ ẅi ɑ kɑ lɛɛnɛ nǔu wɛ́, ńniitɛ ndǔmbí tsʉʉ, ḿbɛn ńzɑ́p wɛ́ pɑ́Ꞌ mbɑ kʉ̈ɔ́lɑ́ ɡʉ ńdɑ́Ꞌ ḿbɔ́ pɔ yɛ́.

Ɛ́bɛlʉʉ 10:19

Pɔ́ɔpɛ́mɑ́ pɑ́ɑ, pɑ́Ꞌ ɛ́ pɔ́Ꞌɔ lɑ́, pɛkŋɛ ŋkɔ̂ɔnɛ, ńtsuŋ ḿbɔ́ ńjí sʉ́Ꞌnɛ ŋɡɔ yɛcɔ́ yúu kɑ́ pɔ́ ńtɔꞋ wɛkŋɛ nɛlɛɛ ŋ́kúu nǔu kwɑꞋ zʉꞋ-Sɛ́ pɔ́, pɔ́Ꞌɔ, ńdɛɛtɛ nǔu pɑ́Ꞌ Yɛ́su kɑ tswɛtnɛ mɛci mɛ́.

Ɛ́bɛlʉʉ 10:21

Pɛkŋɛ lɔk pɔ́Ꞌɔ, ŋ́ɡẅɛɛ nɔŋpɔꞋ wɛ ɡwɛ́ ẅi ɑ kwɑꞋ wɛ́tɛ́, jʉ́ líŋɛ́nɛ pʉɔ-Sɛ́.

Ɛ́bɛlʉʉ 10:23

Sɛ́ kɑ kɑꞋnɛ yúu mbɔ̌ pɛkŋɛ. A pɛn ŋ́kɑꞋ yúu, ŋ́ɡɛ pɔ yîyɑ́. Pɔ́Ꞌɔ lɑ́, pɛkŋɛ kɛ́ ḿbɔ́ ŋ́kẅiꞋ ɛ́sɑ́ɑnɛ sɑ́ɑnɛ ńcú ŋɡɔ, pɛkŋɛ sɛ́ ńzẅíꞋlɛ yúu mi ɑ kɑ kɑꞋnɛ tɛ pɛkŋɛ pɔɔ ḿbɔ́ ḿmʉꞋlɛ pɔ́.

Ɛ́bɛlʉʉ 10:35

Pɔ́Ꞌɔ lɑ́, Kɔɔ pʉʉ kɑ́ɑ nɛzɑ́p tʉ́m nǔu Sɛ́, mbíꞋŋɡɔ mɑ́mɑ́ tsɔ́ꞋfɑꞋ nǔu.

Ɛ́bɛlʉʉ 11:1

Nɛzɑ́p tʉ́m nǔu Sɛ́, ɛ́ nɛtsuŋ ńjí sʉ́Ꞌnɛ ŋɡɔ, yúu mi pɛ́ sɛ́ ńzẅíꞋlɛ ŋɡɔ Sɛ́ ɡɑ́, ɑ ɡʉ ńdɑ́Ꞌ ŋ́ɡɑ́, ḿbɛn ḿbɔ́ nɛtsuŋ ńjí ŋɡɔ, yúu mi pɛ́ kɑ́ pɔ́ ńdɔk mík ńjʉ́ɔ pɔ́ ńtsuŋ ḿbɔ́ ɡú.

Ɛ́bɛlʉʉ 3:14

Pɛkŋɛ pɛ́ Kɛlístɔ zɛɛ ńtsʉ́Ꞌ ńtɛmtɛ ḿbɔ́ pɔ nǔu tɑ́Ꞌ nu, lɑ́ ɛ́ sɛ́ ḿbíkŋɛ tɑ́Ꞌ yúu wɛ́mɔ́Ꞌ, ɛ́ pɔ́ nɛkúꞋlɛ yúu mi pɛ́ kɑ sẅíinɛ wɛkŋɛ lɑ́ pɛkŋɛ zɑ́p tʉ́m nǔu Sɛ́, ŋ́kúꞋlɛ kúꞋlɛ́nɛ tɛ ńdɑ́Ꞌ ŋ́kúu nǔu ndẅiknzʉʉ lɛ́Ꞌ.

Ɛ́bɛlʉʉ 4:11

Pɔ́Ꞌɔ lɑ́, pɛkŋɛ sɑ́Ꞌ tʉʉ, ŋ́kúu tsɛt wîwɑ́ mɔ́fíitɛ, pɛkŋɛ ɡɛ nǔu ntɛ́ yi wɛcɔ́ tɑ́Ꞌ ŋu nǔu pɛkŋɛ kɛ́ pɔ́ ŋ́ɡɛ tʉʉtú pɑ́Ꞌ pɛtɑ́t pɛkŋɛ, ɛ́sɑ́ɑ pɔ́.

Ɛ́bɛlʉʉ 4:14

Pɑ́Ꞌ pɛkŋɛ ɡẅɛɛnɛ tɑ́Ꞌ NɔŋpɔꞋ wɛ ɡwɛ́ ẅí ɑ kwɑꞋ ẅîwɑ́ lɑ́, ẅi ɑ kɑ ɡʉnɛ tɛ ŋ́kúu nɛjɔ́ŋ Sɛ́ ntɛ́ wɛkŋɛ lɑ́, ɑ pɔ́ Yɛ́su, ḿbɔ́ mɔ́ɔ-Sɛ́ lɑ́, pɛkŋɛ kúꞋlɛ nu yi pɛ́ kɑ sẅíinɛ wɛkŋɛ, pɛkŋɛ zɑ́p tʉ́m nǔu, ḿbɛn ḿbɔ́ ɛ́sẅíi yîyɑ́ nu mbɔ̌ pɛcɔ́ pʉɔ.

Ɛ́bɛlʉʉ 4:16

Pɔ́Ꞌɔ lɑ́, kɔɔ pɛkŋɛ mʉꞋlɛ nɛkẅɛ́Ꞌlɛ ŋ́ɡʉ nɛ́ zʉꞋ yi kɔꞋ-nɛfɔɔ-Sɛ́ zúꞋu, nɛlɔk pɔ́Ꞌɔ, ḿbɔ́ nɛjɔ́ŋ jʉ́ Sɛ́ ẅí ɑ ɡẅɛɛnɛ pɔŋtʉ́m. Pɛkŋɛ kẅɛ́Ꞌlɛ pɔ́Ꞌɔ, lɑ Sɛ́ tsɑ́ɑ mɛjʉ́ŋ mɛkŋɛ, ńnyɛt wɛkŋɛ nɛ́ pɔŋtʉ́m yɛ́, ḿbɔ́ ńcẅɛ́lɛ wɛkŋɛ nǔu ŋkɑ́ yi pɛkŋɛ jɑ́knɛ nɛɡɛ.

Ɛ́bɛlʉʉ 6:11

Yúu mi pɛk kɛ́ ḿbɔ́ ńtsɑ́ɑ pɔ́ pɔ ŋɡɔ mbɑ wɔ̌ lɑ́ tsɛtsɛt pʉʉ, kɛ́ ḿbɔ́ ɛ́sɑ́Ꞌ tʉʉ pɔ pɔ́Ꞌɔ, ńdɔk ŋ́ɡʉ nɛ́ mbi, tɛ ńdɑ́Ꞌ ŋ́kúu ndẅiklɛ nɛpɔ́ ẅi mbɑ kʉ̈ɔ́ lɑ́ yi ɑ sɛ́ ńzẅíꞋlɛ mbɔ̌ Sɛ́ ɡʉ ŋ́ɡɛ ḿbuutɛ.

Ɛ́bɛlʉʉ 6:18

Pɔ́Ꞌɔ lɑ́, yúu ɡú yɛ́pɑ́ yi ḿbɔ́ ɛ́ pɔɔ kúpmɛ, pɑ́Ꞌ Sɛ́ kɑ kɑꞋnɛ nu mbɑ pɑ́Ꞌ ɑ kɑ kɑ́ɑnɛ, ɛ́ pɔ́ mɛnu mi ɛ́ tɛnnɛ tɛ Sɛ́ cú pɛ́ lɔɔ kɛ́kɑ́ŋ. Ẅîwɑ́ nɛpɔ́ níꞋ mɛtʉʉ mɛ́k tɛꞋ, pɛk pi pɛk kɑ nɑ́nɛ mbɑ kʉ̈ɔ́ lɑ́, kwɑŋɛ wɛ́k tsʉ́Ꞌ ńtʉ́ʉ pɔ nǔu yúu mi pɛk zẅíꞋlɛ́nɛ mbɔ̌ wɛ́.

Ɛ́bɛlʉʉ 7:19

Pɔ́Ꞌɔ mbíꞋŋɡɔ nɛpʉ́ʉ-Mɔ̌sɛ̂ɛ ŋkɑɑ ɡɛ tɛ yɛcɔ́ yúu kuꞋ nǔu ntɛ́ yi Sɛ́ sɛ́ ŋ́kɔŋ pɔ́. Ɛ́ ŋkɔ̂ɔnɛ, mbɔ Sɛ́ kɑ tík yɛcɔ́ ndúŋ fí, kwɑŋɛ yɛkŋɛ nɑ́ŋ ŋkɔ̂ɔnɛ ńtsʉ́Ꞌ ńtʉ́ʉ pɔ nǔu. Ɛ́ pɔŋ ńdɛɛ wɛcɔ́, mbíꞋŋɡɔ pɛkŋɛ ńdɛɛ nǔu ŋ́ɡʉ tɛ ŋ́kúu nɛjɔ́ŋ Sɛ́.

1 Pyɛ̂ 1:8

Pʉʉ ŋ́kɑɑ mɔ́ Yɛ́su jʉ́ɔ, lɑ́ ŋ́kɛ́ ḿbɔ́ ŋ́kɔŋ wɛ́. Pʉʉ sɛ́ ńzɑ́p tʉ́m nǔu wɛ́, tɛ mbɑ pɑ́Ꞌ pʉʉ pɛ́t kɛ́ ɡɔ́ɔ ńjʉ́ɔ wɛ́. Mɑ́mɑ́ tsɑ́ɑtɛ pɔ́ tʉ́m pʉʉ tɛ ɛ́ lɑɑ ḿbɔ́ pʉʉ pɔɔ jí nɛsẅíi ŋu pɔ́.

1 Pyɛ̂ 2:5

Ɛ́ pɔŋ ŋɡɔ pʉʉ ɡúu pi pʉʉ ɡẅɛɛnɛ kwɑꞋ luk, pʉʉ pɛ́m, Sɛ́ lɔk wʉ́ʉ ŋ́ɡɛ mɛŋɡɔꞋ, ńdɔk ŋ́kút ndɑ́-Zẅikŋɛ Lɛ́ɛnɛ́nɛ. Pʉʉ pɔ́ tsɛtú ḿbɔ́ pɑnɔŋpɔꞋ pi Sɛ́ kɑ tsɔ́Ꞌnɛ, pi pɔ́p ɡʉ ńdɛɛtɛ nzʉʉ Yɛ́su Kɛlístɔ, ńnɔŋ pɔꞋ ẅí ɛ́ pɔŋnɛ Sɛ́.

1 Pyɛ̂ 4:17

Ŋkɑ́ pɑ́Ꞌɑ, mbɔ ɛ́ kuꞋ pɑ́Ꞌ Sɛ́ ɡʉ ńzɑ́Ꞌ ntsɑŋ-pʉɔmɛsɔŋ, ɑ ɡʉ ńzɛ pɔ nǔu pʉɔ pɛ́. A lɑɑ ńzɛ nǔu pɛkŋɛ, mbɔ ɛ́ ɡʉ ńtsʉ́Ꞌ nɛlẅiklɛ ɛ́ pɔ́ ŋɡɔ́ku nǔu pʉɔ pi pɔ́p kɑ́ kɔŋ nɛpɛ́m Ŋkʉʉ Sʉ́Ꞌnɛ-Sɛ́ pɔ́ ɔɔ?

Mɛnu ɛ́ ńdɑ́Ꞌ ńcẅɛt 2:18

Ŋ ŋwɑꞌnɛ mɛnu mɔnɛ, ńtúu ŋ́ɡɑ́ mbɔ̌ Cʉ̈ɔꞋ-Sɛ́ ẅi ɑ líŋɛ́nɛ cúꞋlɛ-pʉɔ-Kɛlístɔ yi ɛ́ tʉ́sɔŋ-Tyɑtîi. Ŋwɑꞌnɛ ŋɡɔ: mɔ́ɔ-Sɛ́ ẅi mík mɛ́ kyɛꞋnɛ zʉꞋ pɑ́Ꞌ lʉ́m-múk lɑ́, mɛku mɛ́ pɔ́ pɑ́Ꞌ tʉ́n Mbɛlɔŋzɛ lɑ́, ɑ sɛ́ ńcú ŋɡɔ:

Mɛnu ɛ́ ńdɑ́Ꞌ ńcẅɛt 2:25

Mɔ sɛ́ ḿbíkŋɛ pɔ ndɑꞋ ŋɡɔ, yúu mi pʉʉ ɡẅɛɛnɛ, pʉʉ niitɛ ŋ́ɡẅɛɛ sʉ́Ꞌnɛ tɛ ŋ́kúu ŋkɑ́ yi ŋ ɡʉ ŋ́ɡɛ ńtɔ́.

Mɛnu ɛ́ ńdɑ́Ꞌ ńcẅɛt 2:26

Ɛ́ ɡʉ nǔu ŋu ẅí ɑ ɡʉ ŋ́ɡɛ ńdʉ̈ɔ́Ꞌ ntsɔ tɛ ńdɛɛ nu kɛpɔŋ, ɑ ŋu ẅí ɑ ɡʉ ŋ́ɡɛ ŋ́kɛ́ ḿbɔ́ ŋ́ɡɛ pɔ yúu mi ŋ kɑ cúnɛ ŋɡɔ pɛ́ pɔ́ ŋ́ɡɛ, ɛ́ nɛɡɛ pɔ pɔ́Ꞌɔ, tɛ ŋ́kúu ndẅiknzʉʉ lɛ́Ꞌ, mbɔ mɔ, ŋ ɡʉ ńdɑ́Ꞌ ŋ́ɡɑ́ mɛtʉʉ mbɔ̌ wɛ́, ɑ lɔk ɛ́sɑ́Ꞌ pɑkɛ́jí Sɛ́.

Mɛnu ɛ́ ńdɑ́Ꞌ ńcẅɛt 3:11

Ŋ ɡʉ fɛ́Ꞌnɛ ńtɔ́. Pʉʉ ɡẅɛɛ yúu mi ɛ́ mbɔ̌ pʉʉ tɛ ɛ́ tɛn ńjí ŋɡɔ wɛcɔ́ ŋu kɛ́ cẅɛ́ɛ yʉʉ ŋɡúꞋ pɔ́.