John 17:3 - Annaahk John Manistsitsinikatahpi Jesus Manistsipaitapiihpiai 1979

³ Omi̱i̱ksi niita̱ʼpssksinookiksi, a̱nniksaoʼki a̱kaissksipaitapiiyaawa. Omi̱i̱ksi ki̱niitaʼpsskinookiiksi kiisto̱ahkaoʼka niʼtsita̱piiwahka nita̱ʼpanistapssiwahka A̱ʼpistotooki, omi̱i̱ksi ni̱niitapsskinookiksi niisto̱ahkaoʼk annaahk Jesus Christ, annaahka kitoʼtsskoaawahka, a̱nniksaoʼki a̱kaisskipaitapiiyaawa.

John 17:3 Marejeleo ya Msalaba

John 10:36

Ki a̱a̱mohka kita̱kohkottohtoʼtssksiniihpoaawa ma̱tokaʼpiiwa ta̱a̱niihpi, takaa niisto̱akaoʼka o̱tssikahksipoʼtoayi ni̱nna A̱ʼpistotookiwa. Nitsi̱toʼtsskooka anno̱o ksa̱a̱hkommi. Kita̱kohkottsawaaniihpoaawa iiko̱kaʼpiiwa tani̱stohtaiʼpoyiihpi A̱ʼpistotooki aniihka nita̱a̱niihpihka nisto̱wa a̱nniskaoʼkinai A̱ʼpistotookiwa ohko̱yi.

John 11:42

Nisto̱wa ni̱tssksiniihpa kita̱i̱ssksayisstsiwokssi. A̱a̱mohka ko̱mohtanisto a̱a̱moksi na̱o̱ʼtsipoyiiksi mata̱piiksi ma̱a̱hkitoohtsissaawa, ma̱a̱hkohtsitomatapomaiʼtsissaawa kiisto̱wa kito̱ʼtsskokssi.”

John 14:26

Ki oma̱ahka kita̱ka̱i̱sspommokoaawahka oma̱a̱hka natowo̱ttakahka, kita̱kssksinima̱atsookoaawa kana̱ʼpaisistsi. Kita̱ksspommookoaawa ka̱a̱hksskssksinissoaayi kana̱ʼpaisistsi kita̱a̱nistohpoaawaistsi. Oma̱a Natowo̱ttaka, a̱nniskaoʼkinai ota̱koʼtsskoai ni̱nna. Niisto̱yi a̱kohtoʼtsskoyiiwayi.

John 17:18

Kansitsi̱poohsapsskookihpi anno̱o ksa̱a̱hkommi, niiʼto̱i̱ nanistsi̱tsspisskoaayaawa ksa̱a̱hkommi.

John 17:21

A̱yo ni̱nna. Ni̱tohkanawaatsi̱moihkaahtamoayaawa ma̱a̱hkohkanawanistapssaawa a̱nni niʼtsita̱piiyi, niʼto̱i nani̱stohpipaitapiiyihpi kiisto̱wa, kani̱stohpipaitapiiyihpi niisto̱wa ma̱a̱hkoohkattohpipaitapiiʼssaawa kiisto̱nnooni. Ki a̱nnihkayii ka̱taʼyaomaiʼtakiiksi a̱kohtsitomaiʼtsimiaawa kiisto a̱nnayii kito̱ʼtsskookssi.

John 17:23

Niisto̱wa no̱mohpipaitapiiyi amo̱ksi, kiisto̱wa ko̱mohpipaitapiiyi niisto̱wa. Ta̱waatsi̱moihkaahtamoayaawa ma̱a̱hkikkiaʼyaohkanaanistapssaawa a̱nni niʼtsita̱pii. Ki a̱nnihkayii ka̱taʼyaomaiʼtakiiksi a̱kohtsitssksinimiaawa kiisto a̱nnayi kito̱ʼtsskookssi. Ki a̱kitssksinimiaawa niʼto̱i kanista̱komimmahsi amoksi kanista̱komimmokihpi.

John 17:25

A̱yo ni̱nna. Kiisto̱wa kitsiko̱kamoʼtaʼpssi. Ka̱taʼyaomaiʼtakiiksi kima̱tssksinookiaawa. Niisto̱wa kitsi̱naoʼkssksinoo ki amo̱ksi ki̱tssksinookiaawa kiisto a̱nnayii kito̱ʼtsskookssi.

John 17:8

Ki̱tohkokkihpi issksksi̱moʼtaani, nitsi̱i̱stapohkotayaawayi, ki sota̱moʼtsimiaawa. Sota̱mitsiitaʼpssksinimiaawa no̱mohtoʼtoohsi kiisto̱i. Ki sota̱momaiʼtsimiaawa kito̱ʼtsskookssi.

John 3:17

A̱ʼpistotookiwa na̱o̱ʼtsskoyiwa ohko̱yi anno̱o ksa̱a̱hkomma. Ma̱tohtoʼtsskoyiiwaatsiksi ma̱ahkohtsitokakihtsimatahsi o̱tapiʼsini otoka̱ʼpipaitapiʼssoaawaistsi. Iihto̱ʼtsskoyiiwayi ma̱a̱hkohtohkoyikissayi ma̱a̱hkohtsikamotsi̱i̱piaahsi o̱tapiʼsini.

John 3:34

A̱ʼpistotookiwa anniiska oto̱ʼtsskoayiska, Jesusiska a̱i̱ʼpoatoominayi otsi̱ʼpoahsistsi annaahka A̱ʼpistotookiwahka. A̱ʼpistotookiwa ma̱tohkoissikihtsiiwa mani̱stohkotahpi Jesusi Natowo̱ttaki. Ki a̱nnihkayii Jesus iihtohko̱ttsiʼpoatoomi A̱ʼpistotokiiyi otsi̱ʼpoahsists.

John 5:44

Kika̱a̱ksstaahpoaawa ka̱a̱hksokimmi̱yissoaayi mata̱piiwa. Ki a̱nnihkayi ko̱mohtsaohkottomaiʼtakihpoaawa. Kita̱kohkottaʼpaisskiihpoaawa ka̱a̱hksokimmi̱yissoaayi annaahka A̱ʼpistotookiwahka ka̱kiʼtsitsstsiiwahka.

John 6:57

Annaahka Ni̱nnahk A̱ʼpistotookiwahka nito̱ʼtsskookahka a̱i̱ssksipaitapiiwa kii no̱mohtsiistapipaitapiiyi ota̱i̱ssksipaitapiʼssini. O̱ki. Niʼto̱i niitsiiwa iihka̱nohta̱ooyiiksi niisto̱yi. A̱kohtsistapipaitapiiyaawa nitsipa̱i̱tapiʼssini.

John 7:29

Niisto̱wa ni̱tssksinoaawa, takaa osto̱yi no̱mohtoʼtoo. Ki nito̱ʼtsskooka.”

John 8:19

Ki omi̱i̱ksi sota̱manistsiiyaawa Jesus, “Ki anna̱ annaahka ki̱nna?” Itani̱stsiiwaiksi, “Kiisto̱waawa kima̱tssksinookihpoaawa ki kima̱tssksinoaawaawa ni̱nna. Kitssksino̱o̱kihpoaawahtopi, kita̱koohkattssksinoawaawa ni̱nna.”