Shikushimikila 9:9 - Baibo Busansulushi Bwa Libuku Ili

⁹ Sangalala mubuumi amukaako uyo ngoosuni munshiku shoonse sha buumi bwako ubo butaaku mbobubete alimwi ubo bwakakupa Lesa pacishi cino. Usangalale mubushiku bomwi abomwi ubo butaaku mbobubete ceebo ico ncecilambu cako ciswa mukuyuwaana kwako pano pacishi ca panshi.

Shikushimikila 9:9 Marejeleo ya Msalaba

Matalikilo 26:8

Isaki ndyaakekalaako ciindi cilaamfuuko uko, bumwi bushiku Abimeleki ndyaakalangilisha pambwelyo, wakabona Isaki batoolyana nkwela aLabeka.

Kulumbaisha 144:4

Muntu ulibo anga nkuyoya kwa linkanda lyomwi. Nshiiku shakwe shilibo anga ncimfule ciindilite.

Kulumbaisha 39:5

Inshiku sha buumi bwangu mwashifwiimpisha, Myaaka ya buumi bwangu njiniini abuumbi pameenso anu. Ncakwiila buumi bwa muntu uli woonse buli anga nkuyoya kwalinkanda lyomwi.

Tushimpi 18:22

Uyo ucana mwanakashi wakweeba, ulacana cintu cibotu alimwi Mwaami Lesa ulamunyumfwila nkumbu.

Tushimpi 19:14

Muntu ulakonsha kupyana buboni bwa bashali bakwe boonse, sombi mwanakashi ucenjete ncipo ciswa kuMwaami Lesa.

Shikushimikila 2:10

Shoonse nshendakalinga kusuni ndakashicana, Nshikwe kukaka kupa moyo wangu shakulisangalasha shili shoonse. Moyo wangu wakakondwa mumilimo yangu yoonse. Aboobo ici cakaba ncecilambu cakaswa mumilimo yangu.

Shikushimikila 2:24

Anu cintubo ciindaawo kubota muntu nceenga wacita nkulya, kunwa akusangalala musheesho nshaakayuwila. Ono ndaboona ayi ici acalo cilaswa kuli Lesa

Shikushimikila 3:13

Cipo cakwe Lesa kumuntu nkulya, kunwa akusangalala musheesho nshaakayuwila.

Shikushimikila 3:22

Munshila iyo ndakabona ayi taaku cimwi ceenga ceendaawo kusangalasha muntu kwiinda milimo yakwe mukwiinga yalo ncecipo ncaakapekwa. Taaku muntu eshi akakonshe kwishiba sheshi shikacitike pesule lya lufu lwakwe.

Shikushimikila 5:18

Kuswawaawo ndakayeeya ayi cintubo ciindaawo kubota muntu nceenga wacita nkulya, kunwa akusangalala musheesho nshaakayuwila pacishi ca panshi panshiku shiniini sha buumi isho Lesa nshaamupa. Mukwiinga ico ncecipo ncaakapekwa.

Shikushimikila 6:12

Buumi bwa muntu mbufwaafwi alimwi taaku mbobubete. Ncakwiila buleendabo anga ncimfule. Ino ngani ushi cibotu kuli nguwe? Ngani weenga wakonsha kwishiba ceshi cikacitike pacishi ca panshi lakwe aakufwa?

Shikushimikila 7:15

Mubuumi bwangu ubu butaaku mbobubete ndakabona shintu shobilo ishi: Muntu ululeme ulafwa cakufwambaana mubululami bwakwe, sombi mucita shibi ulekala buumi bulaamfu mububi bwakwe.

Malaki 2:15

Sa te Mwaami Lesa ngowakabapaankanya kuba mubili womwi? Mumubili amumuuya mbaakwe. Ino ceebonshi ngumubili womwi? Wakacita boobo ayi mube abaana bamulambila. Paceebo ceeci, amulilaame mubuumi bwanu kwaamba ayi kukabule nabi womwi eshi akabule kucita kweelana ambwaakalasha mukaakwe mutaanshi.