Shikushimikila 9:11 - Baibo Busansulushi Bwa Libuku Ili

¹¹ Kuli acimwi cintu ncendakabona pacishi ca panshi. Mulubilo lwakushiyana teshibo baabo boobite kumyeendo bashiya bamwi. Teshibo bayumu bakoma munkondo. Teshi basongo bacana shakulya lyoonse. Teshi bacenjete bacana buboni lyoonse alimwi teshi beeite basumpuka lyoonse, sombi boonse balashamwa pashiindi shipusenepusene.

Shikushimikila 9:11 Marejeleo ya Msalaba

2 Samwelo 17:14

Mpomunyaawo Abusalomu abene Isilaeli bamwi boonse bakaamba ayi, “Muyeeyo wapa Ushayi mwine Aki weendaawo kubota pawakwe Ayitofelo.” Ono cakacitika boobo mukwiinga Mwaami Lesa wakalinga weelibalabo kunyonyonganya muyeeyo ubotu wakwe Ayitofelo kwaamba ayi alete libona pali Abusalomu.

2 Samwelo 17:23

Ono Ayitofelo ndyaakabona ayi muyeeyo wakwe wakakwa, wakabika cakwikalaawo pambongolo yakwe akuya kuŋanda yakwe mundabala ine mishaabo. Mpeeke ndyaakamana kubamba shakalinga kweelete muŋanda yakwe, wakalyaangilila. Aboobo wakafwa akubikwa mucuumbwe ca baishi.

2 Makani 20:15

Mpeeke Jaasiyelo wakaamba ayi, “Nobaami amwebo nobene Juda abene Jelusalemu, Mwaami Lesa waamba ayi, ‘Mutatyongoli nabi kuloonda ceebo ca bashilumamba baanji aba. Nkondo teshi yanu, sombi njakwe Lesa.

Jobo 34:29

Na woongulusha, anu ngani ukonsha kumutongooka? Na wabafutatila ngani weenga wapekwa coolwe?

Kulumbaisha 76:5

Bashilumamba babo bakali mwakababwesela nshebakasaala, Mwakababika mutulo twa lufu. Ono nkusu alushibo lwabo lwa nkondo shakamana ncito.

Tushimpi 1:5

Tushimpi tulalengesha muntu musongo kunungawo maano alimwi akutanjilila baabo beeite

Shikushimikila 2:12

Lyalo ndakapilulula miyeeyo yangu akuyeeya busongo pantu pomwi ancinko alimwi abuluya. Sa kuliwo upyana bwaami ukonsha kucita shimwi kuleka sheesho shakacitwawo kale?

Shikushimikila 3:14

Ndishi kwaamba ayi isho shoonse Lesa nshaakacita, shinanoolikobo kwalyoonse alyoonse. Taaku ceenga ceelikwaawo nabi kukushikwaawo pashintu isho. Ncakwiila Lesa wakacita shintu shoonse kwaamba ayi tunoomulemeka.

Shikushimikila 3:17

Ndakayeeya mumoyo wangu ayi, “Lesa ulaakoombolosha baluleme abamucita shibi mukwiinga kulaakuba ciindi cakucitilawo shintu shoonse. Ee, kulaakuba ciindi ca micito yoonse.”

Shikushimikila 4:1

Ndakalangilisha alimwi akubona kulyatililana kucitika pacishi ca panshi. Ndakabona minsonshi ya bantu balyatililwa, tebakalinga kucite abeshikuboombulusha. Ndakabona ayi nkusu shakalinga kubaabo bakalinga kubalyatilila. Ncakwiila tebakalinga kucite abeshikuboombulusha.

Shikushimikila 4:4

Ndakabona alimwi ayi milimo yoonse akuswitilila koonse kwa muntu shilaswa kulunkumbwa lwa munyono pamubye. Ono ici coonse taaku mbocibete, cilibo anga nkutandaanya muuwo.

Shikushimikila 7:13

Koyeeya isho shakacita Lesa. Ngani weenga woolola cintu ncaakakonkomeka kale?

Shikushimikila 9:2

Boonse balacitikilwa shintu sha mushobo womwi, baluleme abamucita shibi, babotu abaabo bataciti shibotu, basalalite abatasalalite kweelana aMilawo, babenga milambu abaabo batabengi. Bweenka mbocibete kumuntu mubotu, mbweeke ubo mbocibete akumucita shibi. Bweenka mbocibete kubaabo bashomesha cakulumbila, mbweeke ubo mbocibete akubaabo baloonda kushomesha.

Shikushimikila 9:3

Ici mbobubi buli mushintu shoonse shicitika pacishi ca panshi. Shoonse cililo ca nkumo ncimwi. Kulilabo na bantu bacili boomi, balayeeya shintu shibiibi alimwi ashabushincinko. Lyalo kumeelelesho balafwa.

Jelemiya 46:6

“Balya boobu kumyeendo tabakoonshi kucica nabi beshinkusu tabakoonshi kubaloboka. Kumatwa kulubasu lwa Mulonga Yufuletisi balisuntula akuwa.

Jelemiya 48:14

“Ino inga mwaamba buyani ayi, ‘Swebo tuli bashilumamba beshinkusu bacibwene kulwana?’

Jelemiya 9:23

Mwaami Lesa waamba ayi, “Musongo atalilumbaishi ceebo ca busongo bwakwe. Muntu shinkusu atalilumbaishi ceebo ca nkusu shakwe. Alakwe mubile atalilumbaishi ceebo ca bubile bwakwe.

Danyelo 4:35

Kuli nguwe bantu boonse ba mucishi balabonekabo anga taaku mbobabete. Lakwe uleendelesha baanjelo ba kwiculu pantu pomwi abantu ba mucishi ca panshi. Taaku muntu weenga wamukasha kucita cintu, nabi kumwiipusha ayi, ‘Wacitilanshi bobulya?’

Sekaliya 4:6

Kuswawaawo wakaŋambila ayi, “Aya ngomaswi a Mwaami Lesa kuli Selubabelo. Waamba ayi, ‘Teshi ukakome ceebo ca nkusu sha bashilumamba nabi nkusu shako omwiine, sombi ulaakukoma ceebo ca Mushimu wangu. Nebo neMwaami Lesa Shinkusu shoonse ndaamba.

Malaki 3:18

Paciindi ico bantu alimwi balaakubona bupusano buli pakati ka bantu baluleme abataluleme, bansebensela alimwi abatansebenseli.”

Bene Efeso 1:11

Shoonse shintu shilacitwa kweelana amiyeeyo yakabamba Lesa alimwi akuyanda kwakwe. Aboobo Lesa wakatusala ayi tube bantu bakwe muli Klistu, nkokwaamba ayi ncaakatusalila kweelana ambwaakabamba kuswa kumatalikilo.

Dutolonomi 8:17

Ono aboobo tamweelete kuyeeya ayi mwaba abuboni buunji kwiinda munkusu shanu nobeene.

Dutolonomi 8:18

Amwiibaluke kwaamba ayi nguMwaami Lesa, Lesa wanu uyo umupa nkusu shakuba abuboni ubo. Ulacita boobo ceebo kushikila asunu ucishomeka kweelana acipangano ncaakashomesha cakulumbila kubamashali banu bakulukulu.

1 Samwelo 17:50

Munshila iyo Defedi wakakoma bene Filisiti acipaya cakuwaalisha mabwe alimwi alibwe. Taakalinga kucitewo mupeeni ndyaakooma mwine Filisiti uyo akumucaya.

1 Samwelo 6:9

Lyalo munoosheebelabo akubona nkweshi shiye. Na shilulame kundabala ya Beti Shemeshi, citoosansulula ayi nguLesa wa bene Isilaeli walengesha mapensho a mushobo uyu kucitika pakati kesu. Ono na cibule kuba boobo, tutooshiba ayi teshi ngowakatuma mwaalu, ingayi wakababo wiine.”