Mateyo 23:15 - Baibo Busansulushi Bwa Libuku Ili

¹⁵ “Mapensho kuli ndimwe nobafundishi ba Milawo abaFalisi, mwebo nobantu nomwaamba nshemutaciti! Muleenda nyendo shakusubuka lweenge ashishi kwaamba ayi mukasandule muntu womwi. Na wasanduka, ulaba muntu weelete mumulilo utamaani kwiinda ndimwe nobeene.

Mateyo 23:15 Marejeleo ya Msalaba

Esita 8:17

Mumandabala oonse amushipansha shoonse sha cishi umo mwakaambilishikwa mulawo wa mwaami, kwakaba kukondwa akusangalala pakati ka baJuda. Bakasekelela akulya shakulya shiinji. Mpeeke bantu baanji ba mishobo imwi bakatalika kupaila pantu pomwi abaJuda ceebo bakalinga kubaloonda.

Mateyo 23:13

“Mapensho kuli ndimwe nobafundishi ba Milawo abaFalisi, mwebo nomwaamba nshemutaciti! Mulacalila bantu mulyango wa muBweene bwa kwiculu. Mwebo nobeene tamusuni kwinjila alimwi mulakasha baabo basuni. [

Mateyo 3:7

Ono Joni ndyaakabona baFalisi abaSaduki baanji kabesa kuli nguwe mukubombekwa, wakabaambila ayi, “Nobana ba nsoka mwebo! Ngani wamucenjesha kuloonda bukali bwakwe Lesa butoosa?

Mateyo 5:22

Sombi nebo ntoomulwiita ayi uyo woonse ucitile mfundilishi mubye, ulyeelete koomboloshekwa. Awooyo waambila mubye ayi, ‘Taaku mboobete!’ ulyeelete koomboloshekwa munkuta inene. Sombi uyo waamba ayi, ‘Webo omuluya!’ ulyeelete wawaalwa mumulilo utamaani.

Mateyo 5:29

Ono na liinso lyako lyakululyo lyakulengesha ayi ubishe, ncibotu kulilobolaamo akulisowa. Mukwiinga ncibotu kusowekelwa cipansha ca mubili, kwiinda kwaamba ayi mubili woonse ukawaalwe mumulilo utamaani.

Joni 8:44

Mwebo muli kulubasu lwakwe ishiwanu Satana, aboobo mulisuni kucita sheesho shisuni ishiwanu. Lakwe wakalinga mucayi kuswa kumatalikilo. Taana kucitawo kale shalushinisho mukwiinga muli nguwe taamu lushinisho. Na waamba sha bubeshi ingayi waamba mbwaabete mukwiinga ngumubeshi alimwi ngoishi wa bubeshi.

Milimo ya Batumwi 13:10

akumwaambila ayi, “Webo omwanaakwe Satana, noopatite shiluleme shoonse, uliswitebo bucenjeshi alimwi abubeshi akukakatilabo kufulunganya shintu sha lushinisho sha Mwaami Lesa.

Milimo ya Batumwi 13:43

Bantu ndibakapalangana, baJuda baanji alimwi abaswamashi bakunsengwe, abo bakalinga kukonkela kwiisha kwa baJuda, bakakonkela Paulo aBanabasi. Lyalo aba bobilo bakalwiita likoto ilyo maswi akubayuminisha ayi batolelele kwikala muluse lwakwe Lesa.

Milimo ya Batumwi 14:19

Lyalo kwakesa baJuda bamwi kuswa kuAntyoki mucishi ca Pisidya alimwi akuIkoniyamu. Bakayungoola bantu ayi banyumfwile mbabo akutalika kuuma Paulo mabwe. Kuswawaawo bakamukwelela pansengwe lya ndabala kabayeeya ayi wafwa.

Milimo ya Batumwi 14:2

Sombi baJuda abo batakwe kushoma, bakayungoola baswamashi bakunsengwe ayi babukile baabo bakashoma.

Milimo ya Batumwi 17:13

Sombi baJuda ba muTesalonika ndibakanyumfwa ayi Paulo utooshimikila maswi akwe Lesa muBiliya amwalo, bakayaako akutalika kuyungoola bantu ayi batalike shimfulunganya.

Milimo ya Batumwi 2:10

Bamwi balaswa kucishi ca Fuligiya akuPamfilya, kuIjipiti alimwi akumisena ili mucishi caLibya kufwaafwi aSailini. Swebo sobamwi tuli beensu tulaswa kuLoma,

Milimo ya Batumwi 6:5

Mpeeke likoto lyoonse lya bantu lyakakondwa amakani akaamba batumwi. Lyalo bakasala Sitifini, musankwa wakalinga kuswite lushomo alimwi aMushimu Usalashi. Alimwi bakasala Filipo, Pulokolasi, Nikana, Timoni, Pamenasi alimwi aNikolasi wa kuAntyoki, uyo wakalinga kukonkela kwiisha kwa baJuda kalekale.

Bene Galatiya 4:17

Beshikukonkela kwiisha kwa baJuda abo batoobonesha lusuno lunene kuli ndimwe, sombi lusuno lwabo taaku mbolubete. Balisunibo kwaamba ayi bamupatule kuli ndiswe ayi mubacafweeko amoyo woonse.

Bene Galatiya 6:12

Abo boonse basuni kulibotesha kubantu, mbobatoomukakatisha ayi mupalulwe. Ncebacitila boobo nkwaamba ayi batapenshekwi ceebo ca mucilingano wakwe Klistu.

Bene Efeso 2:3

Ncakwiila aswebo soonse mbotwakalinga mbomunya ubo alimwi twakalinga kwikala mubuumi bwakulisangalasha sobeene. Twakalinga kucita shintu shiyanda mibili amiyeeyo yesu. Mubuumi ubo, twakalinga kweelete kutondeshekwa bukali bwakwe Lesa kweelana abantu bamwi boonse.