Kulonga 29:37 - Baibo Busansulushi Bwa Libuku Ili

³⁷ Ukanoocita mbomunya ubo kwanshiku shosanwe ashobilo shoonse. Lyalo cipaililo cilaakunoosalalite abuumbi, alimwi cintu cili coonse ceenga cakumyaako cilaakucisikwa ceebo cipaililo cilisalalite.

Kulonga 29:37 Marejeleo ya Msalaba

2 Makani 7:9

Kusekelela kubengwa kwa cipaililo kwakatola nshiku shosanwe ashobilo kubikaawo akusekelela kwa Shimpaka uko kwakatola nshiku ashimwi shosanwe ashobilo. Pabushiku bwakweelaako, bakaba akusekelela kwakucala.

Kulonga 40:10

Kuswawaawo ukabenge cipaililo alimwi ashintu sha ncico shoonse kuli ndime kwiinda mukushinanika mafuta asalalite, lyalo cilaakunoosalalite cakumaninina.

Esekelo 43:20

Ulyeelete kubwesa bulowa bumwi akubusanseela kushili anga ngameeca shone sha kumakonko one a cipaililo. Ukasanseele akumakonko one oonse a cipansha ca pakati ca cipaililo alimwi amumbasu sha ncico moonse. Munshila iyo ulaakucisalasha ayi ceelele kubengelwawo milambu kuli ndime.

Esekelo 43:25

“Bushiku bomwi abomwi, kwanshiku shosanwe ashobilo ulyeelete kubenga mpongo isankwa, mucende mwaana amwanaambelele kuswa mulitanga ayi njimilambu yakulekelelwa shibiibi. Shifubwa shoonse tasheelete kuba atumpenda.

Danyelo 9:24

“Myaaka ili 70 kufushikwa mankanda ali 7, nceciindi Lesa ncaapimina bene mishaanu andabala yanu isalalite kwaamba ayi bakaanguluke kuswa kushibiibi akububi. Shibiibi shilaakulekelelwa abululami butamaani bulaakulengeshekwa kwikalilila kwaamba ayi cili anga nciloto amakani a bulaluki shikacitike cancinencine ayalo Ŋanda yakwe Lesa ilaakusalashikwa alimwi.

Bene Lefi 16:16

Munshila iyi, ulaakucita kweelana aMilawo pakusalasha Musena Usalalite Wiindaawo kuswa kukutasalala kwa bene Isilaeli alimwi ashibiibi shabo shoonse. Ulyeelete kucita boobo kuTente ya Cipangano, ceebo iliyakitwe pakati lya misumba iyo itasalalite kweelana aMilawo.

Bene Lefi 6:11

Kuswawaawo ulaakufwala shakufwala shimwi akukusha milota iyo pansengwe lya misumba akwiitola kumusena usalalite kweelana amilawo.

Bene Lefi 8:11

Wakabwesa mafuta amwi akwaasanseela mankanda osanwe aobilo pacipaililo ashintu sha ncico, alimwi ambale ifongomene acapanshi ca njiyo kwaamba ayi ashibenge kuMwaami Lesa.

Agayi 2:12

Aŋambe ayi umwi wabwesa nyama isalalite yakabengwa kuswa pacipaililo akwiiyumuna mumungaanjo wakwe. Ino na mungaanjo wakwe wakumya shinkwa uli woonse, shilyo shakatelekwa kale, waini, mafuta a olifi nabi shakulya shimwi shili shoonse, sa inga nyama iyo yalengesha shakulya isho kuba shisalalite?” Mwiipusho ndiwakeepushikwa bapailishi bakakumbula ayi, “Sobwe.”

Mateyo 23:17

Mwebo nobamatanjilili boofu baluya! Ino cinene ncili, golodi nabi Ŋanda yakwe Lesa iyo ilengesha golodi ayi ibe isalalite?

Mateyo 23:19

Mwebo noboofu! Ino cinene ncili, cipo nabi cipaililo ico cilengesha ayi cipo cibe cisalalite?