Kulonga 12:15 - Baibo Busansulushi Bwa Libuku Ili

¹⁵ Mwaami Lesa wakaamba ayi, “Munshiku shili shosanwe ashobilo, tamweelete kulya shinkwa, sombibo cimaande. Pabushiku butaanshi munshiku ishi, mulyeelete kukusha cimena coonse mumaandaanu mukwiinga uyo woonse weshi akalye shinkwa munshiku shosanwe ashobilo ishi, ulaakukushikwa mubantu bangu bene Isilaeli.

Kulonga 12:15 Marejeleo ya Msalaba

Matalikilo 17:14

Musankwa uli woonse utana kupalulwa teshi anoociyeeyelwa kuba mulikoto lya bantu bangu, ceebo taakwe kulama cipangano cangu.”

2 Makani 30:21

Kuswawaawo bantu bakalinga kubungene muJelusalemu, bakasekelela bushiku bwakulya Cimaande kwanshiku shili shosanwe ashobilo cakusangalala. Bene Lefi abapailishi bakalinga kwiimbila Mwaami Lesa bushiku abushiku akulisha nshebakalinga kulisha pakulumbaisha Mwaami Lesa.

Esila 6:22

Lyalo bakaba akusekelela kwakulya cimaande. Bakacita boobo kabasangalete kwanshiku shosanwe ashobilo. Bakasangalala mukwiinga Mwaami Lesa wakasandula moyo wa mwaami wa kuAsilya ayi abacaafwe kuyaka alimwi Ŋanda yakwe Lesa, Lesa wa bene Isilaeli.

Kulonga 12:8

Mashiku pabushiku mbomunya ubo, nyama ilyeelete kuyokwa, akwiilya pantu pomwi abucisa bulula alimwi acimaande.

Kulonga 13:3

Mpomunyaawo Mose wakaambila bantu ayi, “Amwiibaluke bushiku ubu, ubo mbomwakaswa mucishi ca Ijipiti umo momwakalinga basha. Ubu mbobushiku Mwaami Lesa mbwaakamukusha kwiinda munkusu shakwe shiteelekwa acimwi cintu. Pabushiku ubo tamweelete kulya shinkwa.

Kulonga 23:15

Mumweenshi wa Abibu, uyo ngomwakaswitamo muIjipiti, mulyeelete kusekelela kulya Cimaande akucita kweelana ambondakamwaambila. Munshiku shili shosanwe ashobilo shakusekelela uku, tamweelete kulya shinkwa nabi kwisa mukunambila maansabo.

Kulonga 30:33

Uyo woonse ngweenga wapanga mafuta ali mbuli ngawo, nabi kunanika muntu umwi uteshi mupailishi, teshi akanoociyeyeelwa kuba mulikoto lya bantu bangu.’ ”

Kulonga 30:38

Na umwi muntu wapanga tununkila kabotu tuli mbuli ntuto ayi atusebenseshe mbuli mafuta anunkila kabotu, teshi akanoociyeyeelwa kuba mulikoto lya bantu bangu.”

Kulonga 31:14

Mulyeelete kulama bushiku bwakookesha mukwiinga bulisalalite. Uyo woonse ngweshi akabule kulama bushiku ubo akunoosebensa pali mbubo, uyo ulyeelete kucaikwa.

Kulonga 34:18

“Mulyeelete kulama bushiku bwakusekelela kulya cimaande. Kweelana ambondakamwaambila, mukanoolya cimaande kwa nshiku shili shosanwe ashobilo mumweenshi wa Abibu, ceebo ngomweenshi ngomwakaswa mucishi ca Ijipiti.

Kulonga 34:25

“Pakubenga munyama ayi ngumulambu kuli ndime, tamweelete kubenga shinkwa. Alimwi mutakeeleshi kushiyako cipansha ca nyama yakacaikwa pabushiku bwa Pasika bwakwiibaluka kusotokela nabi comwi ayi cikalikwe ciilo.

Bene Lefi 17:10

“ ‘Na mwine Isilaeli nabi muswamashi umwi woonse ushiite mulikoto lyabo walya nyama icite bulowa, nebo neMwaami Lesa ndaakumufutatila alimwi teshi akanoociyeeyelwa kuba mulikoto lya bantu bangu.

Bene Lefi 17:14

Mukwiinga buumi bwa cintu cili coonse cuumi buli mubulowa, nceceeco nebo neMwaami Lesa ncendalwiitila bene Isilaeli boonse ayi tabeelete kulya nyama icite bulowa, alimwi ayi uyo woonse weenga weelya, teshi akanoociyeeyelwa kuba mulikoto lya bantu bangu.

Malaki 2:12

Anu ncibotubo kwaamba ayi Mwaami Lesa atanoolanga lyobilo bantu bacita boobo ayi mbene Isilaeli. Mutabasuminishi tubili kuleta milambu kuMwaami Lesa Shinkusu shoonse.

Shakubelenga 28:17

Lyalo pabushiku bwalikumi ashosanwe balyeelete kuba akusekelela kumwi kwanshiku shosanwe ashobilo. Munshiku isho balyeelete kulya cimaande.

Shakubelenga 9:13

Sombi muntu woonse usalalite kweelana aMilawo alimwi utabete pamushinso alimwi utalami bushiku bwa Pasika bwakwiibaluka kusotokela, teshi akanoociyeeyelwa kuba mulikoto lya bantu bangu mukwiinga taakwe kubenga mulambu kuli ndime paciindi ceelete. Ulyeelete kupenshekwa pacibiibi cakwe.

Mateyo 16:12

Lyalo bashikwiiya bakwe bakanyumfwisha ayi taakalinga kubaambila kucenjela kucimena cakuseenkanya mushinkwa, sombi kwiisha kwa baFalisi abaSaduki.

Luka 12:1

Paciindi ico, bantu bali shuulu shuulu ndibakabungana cakwaamba ayi bantu bakatalika kulyatana, Jesu wakataanguna kwaambila bashikwiiya bakwe ayi, “Amucenjele acimena ca baFalisi, nkokwaamba ayi kwaamba nshebataciti.

Luka 2:43

Ndikwakamana kusekelela bakatalika kuboolela kuNasaleti kabateshi kwaamba ayi Jesu wacaala kwisule kuJelusalemu.

Milimo ya Batumwi 12:3

Ono ndyaakabona ayi ici casangalasha baJuda, wakaambila bashilumamba ayi baye bacate Pita akumwaanga. (Ici cakacitika ciindi cakusekelela kulya Cimaande.)

Bene Galatiya 5:12

Inga cabota bantu abo batoomufulunganya kulitungula beene.

Dutolonomi 16:3

Pakunoosekelela, tamweelete kulya shinkwa. Sombi kwanshiku shosanwe ashobilo, mulyeelete kunoolyabo cimaande, bweenka mbomwakacita pakuswa calubilo mucishi ca Ijipiti. Cimaande ico cilaakunokwiitwa ayi cimaande ca mapensho. Mukanoocilya kwaamba ayi mukanokwiibaluka bushiku ndimwakaswa mucishi ca mapensho ca Ijipiti kwa buumi bwanu boonse.

Dutolonomi 16:5

“Nyama ya pabushiku bwa Pasika bwakwiibaluka kusotokela tayeelete kucailwa mundabala imwi ili yoonse Mwaami Lesa, Lesa wanu njeshi akamupe.

Dutolonomi 16:8

Mpomunyaawo kwanshiku shosanwe abomwi mukanoolyabo cimaande. Ono pabushiku bwasanu ashobilo mukabungane ayi mulambile Mwaami Lesa, Lesa wanu alimwi tamweelete kucita mulimo nabi womwi.